Read kumam 2 Corinto 13 Bible Online

2 Corinto 13 - kumam bible

2 Corinto 13

¹Atzun toxinmaji'n jlu tu'n nxi'ye kyuk'ile. Kb'antel ti'j tkyaqil qa ma che yolin kab' ex qa ox testiw.

²Tej nxi aje kyuk'ile tkab'maji'n, at jun yol xi nma'ne kyeye, ex ja'lo maske mi a'l qine kyuk'ile, pero kxel nma'ne juntl maj kye qeju o che b'inchan il ex kyeye kykyaqile: Qa ma chin pone juntl maj kyxole, mlay ten npasense kyi'je.

³Porke atzun kyajb'ile tu'n tel kynik'e wi'je qa tu'n Crist in chin yoline; aju Crist at kyuk'ile, mya minti'wt tipun, at tipun kyxole.

⁴Maske minti' tipun Crist tej tjaw q'o'n twitz crus, pero itz'x tu'n tipumal Dios; ikx qeye ato'ye tuk'il Crist minti' qipune, pero qo anq'ile tuk'il tu'n tipumal Dios tu'n qajb'ene kyxole.

⁵Che ximane kyi'jxe qa wa'l qe'xe tuj kyokslab'le; tzik'wit kywitze kyi'jxe. ¿Minti'pe nne'l kynik'e ti'j qa at Jesucrist tuj kyanmiye? O'kxtzun qa mya ax tok okslal qeye, minti'tzun Crist tuj kyanmiye.

⁶Kuchiwt tu'n tel kynik'e qi'je qa ax tok okslal qo'ye.

⁷In qo kub'sane twitz Dios tu'n mi'n kyb'inchanteye jun mya b'a'n; myatzun o'kx qajb'ile tu'n qele b'a'n tuj kywitze, atzun qajb'ile tu'n kyb'inchanteye aju b'a'n, maske mya b'a'n ma qo ele tuj kywitze.

⁸Porke mlay qb'inchaye jun mya b'a'n ti'j ju yol axix tok, noq o'kx in qkyuwsa'ne ju yol axix tok.

⁹Kyja'tzun in qo tzalaje qa aqo'ye minti' qipune, atzun kyeye at kyipune. Ex in qo na'ne Dios kyi'je tu'n ttz'aqet-xix kynab'le.

¹⁰Kyja'tzun in xi ntz'ib'ane jlu kyeye na'nxtoq npone kyuk'ile, tu'ntzun mi'n nyoline kyuw ok npone kyuk'ile ik tza'nx woklene tzaj tq'o'n Qajaw, tu'ntzun kych'iye tuj kyokslab'le ex mya tu'n kykub' numje.

¹¹Kyja'tzun erman, kylom kyib'e, tz'aqet-xwit kynab'le, kyq'uqb'am kyk'u'je, junxwit kyximb'etze, tenwt kymojb'ab'l kyib'e. Ex aju Dios q'olte qmojb'ab'l qib' ex at tk'ujlalil, ktel kyuk'ile.

¹²Kyq'olb'em kyib'e kyxolxe, ex kytz'ub'an el kywitze tu'n tkyaqil kyk'ujlalile.

¹³In che'x q'olb'e'ne kyu'n kykyaqil okslal.

¹⁴Aju t-xtalb'il Qajaw Jesucrist tenwt kyuk'ile, tuk'ix tk'ujlalil Dios, ex tenwt kymojb'ab'l kyib'e kyxole tu'n Xewb'aj Xjan. Ikxwitju.