Read kumam 2 Corinto 2 Bible Online

2 Corinto 2 - kumam bible

2 Corinto 2

¹Kyja'tzun kub' nximane tu'n mi'n ttzaj kyb'ise ok npone juntl maj kyuk'ile.

²Ex qa ma tzaj kyb'ise wu'ne, ¿tza'ntzun tten tu'n ntzalaje? Noq o'kx kyu'ne tu'n ntzalaje, aqeye otoq tzaj kyb'ise wu'ne.

³Axtzun jlu xi ntz'ib'ane kyeye tu'ntzun mi'n ttzaj nb'ise tu'n kylaje ok npone kyuk'ile, o'kxwitlo tu'n ntzalaje kyi'je; porke q'uql nk'u'je kyi'je kykyaqile, aju in chin tzalaje ti'j ikx kyeye kykyaqile in che tzalaje ti'j.

⁴Xi ntz'ib'ane jlu kyeye tu'nju at nim nb'ise kyi'je ex at ta'w tuj wanmiye ex nimku in chin oq'e; xi ntz'ib'ane, ex mya tu'n ttzaj kyb'ise, noq o'kx tu'n kyb'inteye nimxix nk'ujlalile at kyi'je.

⁵Aju erman tzaj nb'ise ti'j, mya o'kx aqine tzaj nb'ise, ax ikx kyeye kykyaqile tzaj ch'in kyb'ise. Ma txi nma'ne jlu tu'ntzun mi'n tel kyuw te kyeye.

⁶Akux tcastiw xjal tu'nju ma b'aj kykawine, tu'n nimku kyb'aje ẍe kawin te.

⁷Ja'lotzun, noq o'kx tu'n tkub' kynajsa'ne til ex tu'n t-xi kyq'uqb'a'ne tk'u'j tu'ntzun mi'n tkyaj ten tuj nim b'is.

⁸Kyja'tzun chin kub'sale kywitze, kyk'ujlame juntl maj.

⁹Kyja'tzun xi ntz'ib'ane kyeye nej, tu'ntzun tel nnik'e kyi'je qa b'a'n che nimane tuj tkyaqil.

¹⁰Qa ma kub' kynajsa'ne til jun erman, ikx weye kb'el nnajsa'ne; porke aju til ma kub' nnajsa'ne, twitz Crist ma kub' nnajsa'ne tu'n kylaje,

¹¹tu'ntzun mi'n tkub' qi'j tu'n Satanás; porke b'a'n qu'n tza'n tten tmod, nim mañ b'a'n tu'n.

¹²Tej npone tuj tnam Troas pakb'alte tqanil b'a'n in yolin ti'j Crist, tzaj q'o'n amb'il weye tu'n wajb'ene tuj taq'un Qajaw.

¹³Ex minti' in tzalaje tu'nju minti' knet Tito wu'ne, aju wermaniye; kyja'tzun e kyaj nq'olb'e'ne qe okslal ex inxe tuj tx'otx' Macedonia.

¹⁴Ex chjonte Dios ma kub' ti'j tkyaqil tu'n Jesucrist, ex lepchqo'k ti'j; tu'n qaq'unb'ene in tyek'un Dios tyol kye xjal tuj tkyaqil lugar, tu'n kyojtzqinte xjal Jesucrist. Ik tten jlu ik tza'n jun tk'ok'jal in xi t-sipan tib'.

¹⁵Porke ik qtene ik tza'n tk'ok'jal in xi tq'o'n Crist te Dios, ex in xi t-sipan tib' tk'ok'jal kyxol qe xjal in che klet ex kyxol qeju in che naj.

¹⁶Aju tyol Dios in xi qma'ne kye xjal in che naj, ma tz'ok mer ik tza'n t-xew kamik tu'n kynaj; atzun kye qeju in che klet, ma tz'ok ik tza'n tk'ok'jal chwinqlal tu'n tten kychwinqlal. ¿Ex alkye jaku tzik'x tu'n ti'j aq'untl lu?

¹⁷Ex mya ik qtene ik tza'n nimku xjal in b'aj kysmo'n tyol Dios kyuk'il kyex kyyol tu'n kykamb'ante ch'in pwaq ti'j; atzun qeye junx ti'j qyole, sama'n qo'ye tu'n Dios, in qo yoline twitz Dios ex ajb'el qo'ye te Crist.