Read kumam 2 Corinto 4 Bible Online

2 Corinto 4 - kumam bible

2 Corinto 4

¹Kyja'tzun minti' in qo kub' numje, porke ma qk'ame ju qoklene lu tu'nju ma tzaj q'aq'an tk'u'j Dios qi'je.

²Ex ma tz'el qpa'n qib'e ti'j ju in b'ant kyu'n xjal tuj ewaj ch'ixb'ajilxix; minti' in qo sb'une ex minti' in b'aj qsmo'ne tyol Dios; o'kx in qo anq'ine twitz Dios ex nno'k tilil qu'ne tu'n qele b'a'n tuj kywitz kykyaqil xjal, tu'nju in xi qchik'b'a'ne ju yol axix tok.

³Qa minti' nne'l kynik' xjal ti'j tqanil kolb'il in xi qpakb'a'ne, pero mya kykyaqil, o'kx qeju in che'x tuj najen minti' nne'l kynik' ti'j.

⁴Qe xjal lu mya okslal qe, kyja'tzun ma moẍsanjtz kynab'l tu'nju kydios xjal at tuj tq'ijlalil ja'lo, tu'ntzun mi'n tel kynik' ti'j ju spik'un in qoptz'aj kyib'aj; aju spik'un lu atzun tqanil b'a'n ti'j Crist, ex ate Crist tb'anilxix ex tilb'ilal Dios.

⁵Aju yol in xi qpakb'a'ne mya qi'jxe, noq o'kx ti'j Jesucrist; atzun in xi qma'ne, ate Jesucrist Qajaw; atzun qeye ma qo oke te kymajene noq tu'nju at qk'u'je ti'j Jesús.

⁶Porke tu'n Dios tzaj tma'n tu'n tkub' qoptz'aj ju spik'un tuj qlolj, ex tu'n Dios ma tzaj qoptz'aj ju spik'un tuj qanmi, tu'ntzun tel qnik' ti'j tza'n tten Dios tu'nju in qoptz'aj t-spik'umal ti'j twitz Jesucrist.

⁷Aju q'inumab'l lu atzun ta' qujxi, aqo' ik qten ik tza'n k'il, tx'otx' qtx'otx'il, tu'ntzun tel qnik' ti'j, ate Dios in tzaj q'onte nimxix qipumal, mya qu'nxqe.

⁸In qo yajlanjtz tuj tkyaqil, ex at jatum tu'n qex tu'n qtzoqpaj; nim nnik' qi'j, ex at jatum tu'n tok qe' qk'u'j ti'j.

⁹In qo jaw lajo'n, ex minti' in qo kyaj kolin tu'n Dios; in qo kub' xo'n twitz tx'otx', ex minti' in qo naj.

¹⁰Noq jachaq kukx nne'lje' qi'j tu'n qkyim, ik tza'n b'aj ti'j Jesús, tu'ntzun tyek'unjtz ti'j qximlal qa ax tchwinqlal Jesús in tzaj tq'o'n qe.

¹¹Porke itz'xku qo'ye, kukx nne'lje' qi'je tu'n qkyime tu'n tlaj Jesús, tu'ntzun tyek'unjtz ti'j qximlale qa ax tchwinqlal Jesús in tzaj tq'o'n qeye, maske kyja' tnaj qximlale.

¹²Kyja'tzun qq'on qib'e tu'n qkyime, ex tu'n jlu ma kykamb'aye kychwinqlale.

¹³At jun yol in tma'n tuj Tu'jil: Xi woksla'ne, kyja'tzun in chin yoline, chi tuj Tu'jil. Ikx qeye ax qnab'le jlu, ma txi qoksla'ne, kyja'tzun in qo yoline.

¹⁴Porke b'a'n qu'n, jaw anq'in Qajaw Jesús tu'n Dios, ikx qe qo jawil anq'in tu'n junx tuk'il Jesús, ex qo xel q'i'ne junx kyuk'ile tu'n qpon twitz.

¹⁵Ex tkyaqil jlu nnik'x qu'ne tu'n kyk'monteye jun b'a'n; qa ma kyk'am nimku xjal t-xtalb'il Dios, ax ikx nimku xjal tu'n t-xi kyq'o'n chjonte te Dios, tu'ntzun tjaw nimsa'n tb'i.

¹⁶Kyja'tzun, minti' in qo kub' numje maske kyja' tb'aj tipun qximlale, pero aju qanmiye in tk'mo'n ak'aj tipumal junjun q'ij.

¹⁷Porke aju yajb'il qeye ja'lo mya nim ex noq te jurat, ex tu'n jlu ktzajel q'o'n jun qoklene ma'xix ex te jumajx.

¹⁸Porke myatzun tok qwitze ti'j ju q'ancha'l, atzun tok qwitze ti'j ju minti' q'ancha'l; porke aju q'ancha'l, noq te kab' q'ij, atzunju minti' q'ancha'l, te jumajx.