Read kumam 2 Corinto 9 Bible Online

2 Corinto 9 - kumam bible

2 Corinto 9

¹Mya il ti'j tu'n t-xi ntz'ib'ane jun u'j kyeye ti'j ju onb'il tu'n t-xi q'ot kye okslal.

²Porke ojtzqi'n wu'ne at kyganiye tu'n kyq'onteye, ex o chin tzalaje kyi'je kyxol qeju ate' tuj tx'otx' Macedonia, xi nma'ne kye qa ma b'ant-xi jun ab'q'i b'anin kytene tu'n kyq'onteye oyaj, aqeye ate'ye tuj tx'otx' Acaya; ex tu'nju at-xix kyganiye ti'j jlu, ma tz'el kykano'n mas nim okslal kyxol qeju ate' tuj tx'otx' Macedonia.

³Ex ma che'x nsama'ne qe erman lu tu'ntzun mi'n tel qyole noqx gan, aju xi qma'ne kyi'je. Wajb'ile tu'n tb'ant naj kytene tu'n ttzaj kyq'o'ne kyoyaje ik tza'n ma txi nma'ne kye,

⁴mya yajku che'x wuk'ine junjun aj Macedonia, ex mya b'anin kytene ok qpone. Tu'n jlu ktzajel qch'ixwiye tu'nju otoq qe' qk'u'je kyi'je, ikx kyeye mas jaku tzaj kych'ixwiye.

⁵Kyja'tzun kub' nximane qa il ti'j tu'n t-xi nma'ne kye erman tu'n kyxi' nej nwitze tu'n kypon kyuk'ile, ex tu'n tb'aj chmet naj kyoyaje tzaj kytziyane ojtxi, tu'ntzun ttzaj kyq'o'ne ik tza'n jun oyaj, mya tu'n tel qxk'ayine kyi'je.

⁶Lu jun tumel kxel nma'ne kyeye: Aju xjal noq ch'in in ku'x tawa'n, ax noq ch'in kjawil tchmo'n; atzunju xjal nim in ku'x tawa'n, ax nim kjawil tchmo'n.

⁷Teyle junjun q'onx jun oyaj ik tza'n ma kub' t-ximan tuj tanmi; mya tuk'il b'is tu'n t-xi tq'o'n ex mya lajwers, porke aju xjal in xi tq'o'n oyaj tuk'il tzalajb'il, in tzalaj Dios ti'j.

⁸Ate Dios at tipumal tu'n tq'onte nimku t-xtalb'il kyeye, tu'ntzun kukx tu'n tkanun kyeye tuj tkyaqil ex tu'n tkyaj ten ch'intl kyeye, tu'ntzun kyonine ti'j tkyaqil aq'untl b'a'n.

⁹Ik tza'n in tma'n tuj Tu'jil: Xi t-sipan kykotz qe meb'a. Aju tten tz'aqlxix, kukx ktel te jumajx, chi tuj Tu'jil.

¹⁰Ate Dios in tzaj q'onte iyaj teju xjal in awan ex in tzaj tq'o'n wab'j te twa, ktzajel tq'o'n aju in ajb'en kyeye, tu'n tchmet twitz kyawale tu'n, ex ktzajel tq'o'n mas kyipumale tu'n kyb'inchanteye xtalb'il kye nimku xjal.

¹¹Kyja'tzun tzul tq'o'n Dios nimku kyeye, tu'ntzun tb'ant kyq'onteye oyaj. Ex aju oyaj kjawil qchmone kyxole, kxel kyq'o'n erman chjonte te Dios ti'j.

¹²Porke tu'nju in xi kyq'o'ne ju oyaj lu kye erman, mya noq o'kx in che onine ti'j ju atx taj kye, ax ikx nimku erman in xi kyq'o'n chjonte te Dios ti'j jlu.

¹³Ex tu'nju kyajb'eb'le lu k'elel kynik' okslal kyi'je, ex kxel kyq'o'n chjonte te Dios tu'nju ma txi kynimane tqanil b'a'n in yolin ti'j Crist. Ex kxel kyq'o'n chjonte te Dios kyi'je tu'nju oyaj kxel kyq'o'ne kye ex kye kykyaqil.

¹⁴Ax ikx che na'l Dios kyi'je, tu'nju at kyk'ujlalil kyi'je, tu'nju nimxix t-xtalb'il Dios ma tzaj tq'o'n kyib'aje.

¹⁵Chjonte Dios tu'nju toyaj ma'xix ma tzaj tq'o'n qe, minti' in knet yol qu'n tu'n t-xi qchik'b'a'n, tu'nju tb'anilxix.