Read kumam Gálatas 2 Bible Online

Gálatas 2 - kumam bible

Gálatas 2

¹Tb'ajlenxitzun kyajlaj ab'q'i, in jaxe juntl maj tuj Jerusalén tuk'ix Bernabé ex tuk'ix Tito xi wuk'ine.

²A Dios tzaj yek'unte weye tu'n njaxe, ex in yoline o'kx kyuk'il qeju at mas kyoklen kyxol okslal. Xi ntx'olb'a'ne kye aju tqanil kolb'il in xi npakb'a'ne kye xjal mya judiy, tu'ntzun nb'inteye qa b'a'n waq'unb'ene tuj kywitz ex qa noqx gan.

³Aju wuk'ile Tito, maske griego xjal, pero minti' ok jwers ti'j tu'n t-sircunsidarinjtz,

⁴maske at junjun erman xmletz' qe o kyajb'e tu'n t-sircunsidarinjtz Tito, okx kyq'on kyib' qxole tuj ewaj noq tu'n kyb'inte ti'j ju tzoqpib'l qeye tu'n Jesucrist, atzun kyximb'etz tu'n qtene juntl maj tjaq' tley Moisés.

⁵Pero minti' xi qkuyine tu'n qtene jun rat tjaq' kykawb'il, noq o'kx kub' qximane kukx tu'n tten aju tqanil kolb'il kyuk'ile, aju yol axix tok.

⁶Ex aqeju at kyoklen kyxol okslal minti' jun yol ak'aj tzaj kyma'n weye; (maske at kyoklen kyxol okslal, pero minti' waje ti'j, porke minti' in tke'yin Dios ti t-xilen xjal).

⁷Kyja'tzun minti' jun yol ak'aj tzaj kyma'n weye, noq o'kx el kynik' ti'j woklene tzaj tq'o'n Dios tu'n t-xi npakb'a'ne tqanil kolb'il kye xjal mya judiy, ik tza'n te Pedro tzaj q'o'n toklen tu'n t-xi tpakb'a'n tqanil kolb'il kye xjal judiy.

⁸Porke tu'n Dios ok q'o'n Pedro tu'n tok te apostol tu'n tajb'en kyxol xjal judiy, ex tu'nx Dios in ok q'o'ne te apostol tu'n wajb'ene kyxol xjal mya judiy.

⁹Eltzun kynik' Jacobo wi'je, tuk'ix Pedro ex Juan el kynik' ti'j tza'n tten tzaj tq'o'n Dios woklene. Aqe jlu ik kyten ik tza'n nejenel kyxol okslal, ex tzaj kyq'o'n kyq'ab' weye ex te Bernabé, te jun yek'b'il tu'n tok quk'in qib'e kyuk'il, tu'n qxi'ye aq'nal kyxol xjal mya judiy, atzun kye tu'n kyaq'nan kyxol xjal judiy.

¹⁰Noq o'kx tzaj kyma'n qeye tu'n qximane kyi'j meb'a, ax jlu ximan wu'ne tu'n nb'inchanteye.

¹¹Tejtzun tpon Pedro tuj tnam Antioquía in jaw tzoqpaje ti'j, ok nma'ne tib'aj twitz tu'nju at til.

¹²Ex tej na'nxtoq kypon junjun xjal tzajni qe tuk'il Jacobo, junx in wa'n Pedro kyuk'il qe xjal mya judiy; tejtzun kypon qe xjal lu, cheb'ale el laq'e' Pedro kyi'j xjal mya judiy ex minti' wa'ntl kyuk'il, porke in xob' kywitz qe xjal nimanx ju sircunsisyón kyu'n.

¹³Ax ikx qe txqantl okslal judiy kub' kymeltz'u'n kynab'l ik tza'n te Pedro; kyja'tzun tuk'ix te Bernabé kub' ti'j tnab'l kyu'n, kub' tmeltz'u'n tnab'l.

¹⁴Pero tej nlonteye minti' in che b'et tuj tumel ik tza'nx ju yol axix tok, ik tza'nx in tma'n tqanil kolb'il, xi nma'ne te Pedro kywitz kykyaqil: Aya judiy xjal, pero in anq'ina ik tza'n qe xjal mya judiy, ex ma kyaj tkolina kyley xjal judiy; ¿tza'ntzun tten nno'k tq'o'na jwers kyi'j qe xjal mya judiy tu'n t-xi kyniman kyley xjal judiy? Nchiye te.

¹⁵Aqo' judiy xjal qo' qitz'jlenx, ex mya tzajni qo' kyxol xjal aj il qe, aqeju ate' kyuj txqantl nasyon.

¹⁶Ex b'a'n qu'n, mlay tz'ok jun xjal te tz'aqlxix twitz Dios tu'nju in tb'incha'n aju in tma'n tley Moisés, noq o'kx k'okel te tz'aqlxix twitz Dios noq tu'n tokslab'l ti'j Jesucrist. Kyja'tzun ikx qe ma qo okslan ti'j Jesucrist tu'ntzun qok te tz'aqlxix twitz Dios noq tu'n qokslab'l ti'j Jesucrist, ex mya tu'nju in qb'incha'n aju in tma'n ley. Ex mi jun xjal jaku tz'ok te tz'aqlxix twitz Dios tu'nju in tb'incha'n aju in tma'n ley.

¹⁷Aqeqo' judiy nno'k tilil qu'n tu'n qok te tz'aqlxix twitz Dios noq tu'n Crist, ex tu'n jlu ma tz'el qnik' ti'j ax aj il qo' ik tza'n qe txqantl xjal, ¿apetzun in tma'n jlu qa tu'n Crist ma qo ok aj il? Mi'n.

¹⁸Qa ma jaw nb'incha'ne juntl maj aju otoq kub' nxitune nej, at wile ti'j.

¹⁹Porke tu'nxju ley ma chin kyime tu'n mi'n ntentle tjaq' ley, tu'ntzun wanq'ine tuk'il Dios ex tu'n wajb'ene te.

²⁰Junx ma chin jaw q'o'ne tuk'il Crist twitz crus, ex mya wu'nx wib'e in chin anq'ine, ate Crist najl tuj wanmiye ex in tzaj tq'o'n nchwinqlale ja'lo, tu'n wanq'ine twitz tx'otx' noq tu'n wokslab'le ti'j Tk'wa'l Dios in k'ujlanjtze tu'n, ex xi tq'on tib' tu'n tkyim tu'ntzun nklete.

²¹Mlay tz'el wik'une aju t-xtalb'il Dios; porke noqwit at tumel tu'n qok te tz'aqlxix twitz Dios noq tu'nju in qb'incha'n aju in tma'n ley, tu'n jlu noqxlo gan kyim Crist.