Read kumam Gálatas 3 Bible Online

Gálatas 3 - kumam bible

Gálatas 3

¹Aqeye erman aj Galacia minti' kynab'le. ¿Alkye ma tz'ok ky'a'n kyeye tu'n mi'n t-xi kynimane aju yol axix tok? Porke xi npakb'a'ne kyeye mer ik tza'n tjaw Jesucrist twitz crus kyxole.

²O'kx waje tu'n nb'inteye jlu kyeye: Aju Xewb'aj Xjan ma kyk'ame, ¿tu'npeju in kyb'incha'ne aju in tma'n tley Moisés, ex qa tu'nju ma txi kyoksla'ne tqanil kolb'il?

³¿Minti'petzun kynab'le? Nej tzaj xe't kyokslab'le tu'n tipumal Xewb'aj Xjan. ¿Yajtzun ja'lo, kyajpeye tu'n ttz'aqset kyokslab'le tu'nx kyb'inchb'ene?

⁴¿Noqpetzun gan ma tzik'x nimku kyu'ne? Kuchiwt mya noqx gan.

⁵Ate Dios in tzaj q'onte Xewb'aj Xjan kyeye, ex in tb'incha'n tb'inchb'en nim tipumal kyxole. ¿Tiqu'n in tb'incha'n Dios jlu kyxole? Minti' in tb'incha'n tu'nju in kyb'incha'ne aju in tma'n tley Moisés, noq o'kx tu'nju ma txi kyoksla'ne tqanil kolb'il.

⁶Ik tza'n te Abraham xi toksla'n tyol Dios, ex kyja'tzun ok q'o'n te tz'aqlxix tu'n Dios,

⁷kyja'tzun tz'elx kynik'e ti'j, aqeju at kyokslab'l, atzun qe jlu tiyjil Abraham.

⁸Ex q'ma'maj tuj Tu'jil atxix ojtxi tu'n kyok txqantl xjal te tz'aqlxix tu'n Dios noq tu'n kyokslab'l, aqeju mya judiy qe; kyja'tzun pakb'anjtz tqanil b'a'n te Abraham atxix ojtxi: Noq ti'ja che ky'iwlanjtzel xjal kyuj kykyaqil nasyon, chi Dios.

⁹Kyja'tzun kykyaqil qeju in che okslan, che b'el ky'iwla'n junx tuk'il Abraham aju okslal.

¹⁰Ex kykyaqil qeju q'uql kyk'u'j ti'j tu'n kyklet tu'nju in kyb'incha'n aju in tma'n tley Moisés, tkub' kysentens porke in tma'n tuj Tu'jil: Kykyaqil xjal aqeju minti' in japun ley kyu'n, aju tz'ib'an tuj Tu'jil, ex minti' in kyb'incha'n tkyaqil, tkub' kysentens.

¹¹Kyja'tzun, chik'lxix ta', mi jun xjal jaku tz'ok te tz'aqlxix twitz Dios tu'nju in tb'incha'n aju in tma'n ley, porke in tma'n tuj Tu'jil: Aju xjal tz'aqlxix, noq tu'n tokslab'l k'anq'il, chi tuj Tu'jil.

¹²Aju tley Moisés mya junx ta' tuk'il ju okslab'l, porke in tma'n ley: Aju xjal ma japun tkyaqil jlu tu'n, k'anq'il tu'n.

¹³Tu'n Crist ma qo etz tkolpi'n tjaq' ju sentens tkub' tu'n ley, porke ate Crist xi iqante qsentens; porke in tma'n tuj Tu'jil: Aju xjal in jaw yob'in ti'j jun tze', tkub' t-sentens tu'n Dios, chi tuj Tu'jil.

¹⁴Xi tiqan Crist qsentens tu'ntzun tkanun tky'iwb'il Dios kyib'aj qe xjal mya judiy, aqeju okslal qe ti'j Jesucrist, ik tza'n tzaj ttziyan Dios te Abraham, ex tu'n qk'monte qkyaqil aju Xewb'aj Xjan, aju tzaj ttziyan Dios qe, noq tu'n qokslab'l.

¹⁵Erman, kxel nma'ne jun techal kyeye ik tza'n in kyb'incha'n xjal: Qa at kab'e xjal ma b'ant ti'j jun yol kyu'n, maske kyex kye xjal kyyol, pero mlay b'ant tu'n tkub' xitj ex mlay b'ant tu'n tch'expet tu'n tok juntl yol ti'j, tu'nju otoq b'ant ti'j kyu'n.

¹⁶Kyja'tzun tzaj ttziyan Dios tyol te Abraham ex te tiyjil. Minti' in tma'n: Kye tiyjila chiwt, porke minti' in yolin ti'j nim tiyjil Abraham, noq o'kx in yolin ti'j junx tiyjil. Te tiyjila, chi Tu'jil. Ate Crist tiyjil Abraham.

¹⁷Atzun jlu in xi nma'ne: Aju yol kyaj b'ant ti'j tu'n Dios tuk'il Abraham mlay b'ant tu'n tkub' xitj tu'n tley Moisés, ex mlay b'ant tu'n tel q'i'n tipun ju yol lu tu'n ley, porke ate ley tzaj q'o'n te tib'ajxi, otoq b'aj 430 ab'q'i.

¹⁸Porke noqwit tu'n tley Moisés tu'n ttzaj tq'o'n Dios aju qetzb'il, miwtlo tzaj ttziyan Dios tyol te Abraham ojtxi. Pero jlu tzaj ttziyan Dios tyol te Abraham tu'n ttzaj tq'o'n tetzb'il.

¹⁹Qa ikju ¿titzun tajb'en aju tley Moisés? Ex tzaj q'o'n te tib'ajxi yek'ulte kyil xjal, pero mya tu'n tten te jumajx, noq o'kx tu'n tajb'en na'nxtoq tul tiyjil Abraham. Porke te tiyjil Abraham tzaj ttziyan Dios tyol; ex tej ttzaj q'o'n aju ley, mya ik tten, ex tzaj tma'n Dios kye anjel tu'n ttzaj kyq'o'n aju ley te Moisés, atzunte Moisés xi tq'o'n kye xjal.

²⁰Pero tej ttzaj ttziyan Dios tyol te Abraham, minti' ajb'en juntl xjal tu'n Dios tu'n t-xi tma'n te Abraham, porke akute Dios o yolin.

²¹¿Atpetzun tq'oj tley Moisés ti'j ju yol tzaj ttziyan Dios nej? Minti'. Ex noqwit at tumel tu'n ttzaj q'o'n qchwinqlal tu'n ley, ax tok jakwitlo qo ok te tz'aqlxix twitz Dios tu'nju in qb'incha'n aju in tma'n ley.

²²Pero in tma'n tuj Tu'jil, kykyaqil xjal pres qe tjaq' il. Tu'ntzun tlaj jlu ma tzaj tq'o'n Dios kye okslal aju tziyimaj tu'n, noq tu'nju at kyokslab'l ti'j Jesucrist.

²³Pero na'nxtoq tul Crist, aju tu'n qokslan ti'j, lamo'n qo' tjaq' ley, lamo'n qo' in qo ayon ti'j jun okslab'l attoq ttzajel yek'un.

²⁴Kyja'tzun, ate ley ik tten ik tza'n jun majen kwentil kye tal k'wa'l. Ate ley kwentil qe tu'n qpon ti'n tuk'il Crist, tu'ntzun qok te tz'aqlix twitz Dios noq tu'n qokslab'l.

²⁵Pero tejtzun tul ju okslab'l, mya il ti'j aju kwentil qe.

²⁶Porke kykyaqile tk'wa'l Dios qeye noq tu'n kyokslab'le ti'j Jesucrist.

²⁷Porke kykyaqile, aqeye ma che b'yane tu'n kyok mojb'a'ne tuk'il Crist, ma tz'ok kyq'o'ne Crist kyi'je ik tza'n jun xb'alun tu'n kyoke te ak'aj.

²⁸Ya ja'lo junx ta' ju xjal judiy tuk'il ju xjal griego; junx ta' ju xjal tzyu'n te majen tuk'il ju xjal tzoqpi'n; junx ta' xinaq tuk'il ju xu'j; porke kykyaqile ma che oke te junx ti'j Jesucrist.

²⁹Qatzun te Crist qeye, ax tok tiyjil Abraham qeye, ex at kyoklene ti'j etzb'il, ik tza'nx tyol Dios tzaj ttziyan te Abraham.