Read kumam Gálatas 5 Bible Online

Gálatas 5 - kumam bible

Gálatas 5

¹Ma qo tzoqpet tu'n Crist tu'n qten tzoqpi'n qo'. Kyja'tzun che we'xixe tu'n mi'n kyyukche, ex mi'n txi kyq'on kyib'e juntl maj tjaq' yuw tu'n kyoke te majen.

²Aqine Pablo, lu kxel nma'ne kyeye, qa ma che sircunsidarinjtze, minti'xlo tajb'en Crist kyeye.

³Kxel nkyuwsa'ne juntl maj kyeye, qa at jun xjal ma sircunsidarinjtz, iltzun ti'j tu'n tjapun tu'n tkyaqilju in tma'n tley Moisés.

⁴Jumajx ma tz'el kypa'n kyib'e ti'j Crist, aqeye kyajb'ile tu'n kyoke te tz'aqlxix twitz Dios noq tu'nju in kyb'incha'ne aju in tma'n ley; ma tz'el kypa'n kyib'e ti'j t-xtalb'il Dios.

⁵Porke aqo' noq tu'nju Xewb'aj Xjan q'uql qk'u'j ti'j tu'n qok q'o'n te tz'aqlxix tu'n Dios noq tu'n qokslab'l.

⁶Porke tu'nju ma qo ok mojb'a'n tuk'il Jesucrist, junx ta' qa sircunsidarimaj qo' ex qa mya sircunsidarimaj qo', minti' toklen jlu. Aju mas ilxix ti'j, tu'n tten qokslab'l in tyek'un tib' tu'n qk'ujlalil.

⁷Nej in che b'ete b'a'n. ¿Alkyetzun ma maqonte kyeye tu'n mi'n t-xi kynimane aju yol axix tok?

⁸Ma kub' ti'j kynab'le pero kyu'n xjal, mya tu'n Dios aju txkonte kyeye.

⁹Che ximane ti'j jlu: Aju tq'otjil pan in jaw mal tk'u'j tkyaqil noq tu'n ch'in t-samel.

¹⁰Tu'nju okslal qo' ti'j Crist, ma qe' nk'u'je kyi'je, ktel kyximb'etze ik tza'n weye; atzun teju xjal in xitunte kynab'le, tzul tcastiw tu'n Dios, noq alxkye.

¹¹Atzun weye erman, noqwit kukx t-xi nma'ne tu'n tb'ant sircunsisyón, myawtlo kukx nyajlanjtze kyu'n xjal judiy. Noqwit kukx t-xi nma'ne tu'n tb'ant sircunsisyón, minti'wtlo in tzaj kyq'oj xjal ti'j ju yol in xi nma'ne ti'j tcrus Crist.

¹²Pero aqeju in che xitunte kynab'le qa il ti'j sircunsisyón, b'a'nwt tel kycaparin kyib'.

¹³Aqeye erman, o che txkonjtze tu'n kytene tzoqpi'n qeye; ex mya tu'nju tzoqpi'n qeye tu'n kyb'inchanteye tajb'il kychib'jale, noq o'kx tu'n kyajb'ene kyxolxe ex tu'n kyk'ujlante kyib'e.

¹⁴Porke tkyaqilju in tma'n tuj ley in japun tu'n junx yol lu: Kyk'ujlame qe kyuk'ile ik tza'nx kyeye in kyk'ujlan kyib'e, chi tuj ley.

¹⁵Qatzun ma tz'ok kytx'an kyib'e kyxolxe, ex qa ma b'aj kychyo'n kyib'e ik tza'n qe jil, kyq'onke kwent kyi'je, mya yajku jaku che naje kykyaqile kyu'nx kyib'e.

¹⁶Kyja'tzun in xi nma'ne: Che b'ete ik tza'n tajb'il Xewb'aj Xjan tu'ntzun mi'n t-xi kynimane aju tajb'il kychib'jale.

¹⁷Porke aju tajb'il qchib'jal minti' in kub' tuj twitz aju in tma'n Xewb'aj Xjan, ax ikx te Xewb'aj Xjan minti' in kub' tuj twitz aju tajb'il qchib'jal, ex aqeju kab'e lu kyajq'oj kyib'. Kyja'tzun minti' tumel tu'n kyb'inchanteye b'a'n aju kyajb'ile tu'n tb'ant.

¹⁸Pero qa ẍaqlu'n qeye tu'n Xewb'aj Xjan, myatzun ate'ye tjaq' ley.

¹⁹Q'ancha'lxix aju in kyb'incha'n xjal in xi kyniman tajb'il kychib'jal. Atzun jlu in kyb'incha'n: In kyb'incha'n aj pajil, in che yaẍin, in kyb'incha'n aju ttz'ilil, in che achin,

²⁰in che k'ulun kywitz qe tilb'ilal, aj ky'a' qe, kyajq'oj kyib', in che q'ojin, nno'k tx'a'l ti'j kyk'u'j ti'j juntl, in che jaw kyaqpaj, in b'aj kyik'len kyib', in kub' ten pab'l tib' kyxol, ex in che ok lpe' ti'j jun xnaq'tzb'il mya b'a'n.

²¹In tzaj tlo'ch kyk'u'j, b'yol xjal qe, k'al q'e'n qe, in che achin tuj ninq'ij, ex at mastl in kyb'incha'n ik tza'n jlu. B'a'n tu'n kyb'inteye jlu: Aqeju kukx kyb'inchante tkyaqil jlu, mlay che okx tuj tkawb'il Dios, ik tza'n o txi nma'ne kyeye.

²²Atzunju in tq'o'n Xewb'aj Xjan atzun jlu: Tu'n tten qk'ujlalil, tu'n qtzalaj, tu'n tten qmojb'ab'l qib', tu'n tten qpasens, tu'n qb'inchante xtalb'il te juntl, tu'n tten qb'anil, tu'n qwe'xix tuj qokslab'l,

²³tu'n qok mans, ex tu'n qjak'unte qib'. Minti' jun ley mayolte qe ti'j jlu.

²⁴Ex aqeju okslal qe ti'j Crist, o jaw kyq'o'n twitz crus aju tajb'il kychib'jal tuk'ix ju kyachb'il, tuk'ix ju in pon kyk'u'j ti'j.

²⁵Qa at qchwinqlal tu'n Xewb'aj Xjan, ax ikx qo b'et ik tza'nx in tma'n Xewb'aj Xjan.

²⁶Mi'n jaw qniman qib'. Mi'n tz'ok qik'len qib' qxolx. Mi'n tzaj tlo'ch qk'u'j ti'j juntl.