Read kumam Gálatas 6 Bible Online

Gálatas 6 - kumam bible

Gálatas 6

¹Erman, qa at jun kyxole ma kub' tz'aq tuj jun til, kywa'banctze juntl maj aqeye at tipumal Xewb'aj Xjan kyuk'ile, tuj cheb'a kymanxe te. Ten kykwente kyi'je, mya yajku ikx kyeye che oke tuj joyb'il kyi'je.

²Che onine ti'j kyiqatz txqantl, kyja'tzun tten tu'n tjapun tley Crist kyu'ne.

³Porke alkye in ximan ti'jx qa at toklen ex minti' toklen, in kub' t-sb'un tib'.

⁴Teyle junjun tu'n tik' twitz ti'j tex taq'unb'en; kyja'tzun b'a'n tu'n ttzalaj ti'j taq'unb'en ex mya ti'j taq'unb'en juntl.

⁵Porke teyle junjun tu'n t-xi tiqan tex tiqatz.

⁶Aju in xnaq'tzanjtz ti'j tyol Dios, b'a'n tu'n t-xi tq'o'n ch'in teju xnaq'tzal te ti'j tkyaqilju b'a'n at te.

⁷Mi'n che el tzpete ti'j: Ate Dios mlay b'ant t-xmayinjtz, porke alkyeju in ku'x tawa'n xjal, axtzunju kjawil tchmo'n.

⁸Porke aju xjal in tb'incha'n tajb'il tchib'jal, knajel tu'n tajb'il tchib'jal. Atzunju in tb'incha'n tajb'il Xewb'aj Xjan, ktel tchwinqlal te jumajx tu'n Xewb'aj Xjan; ik tten jlu ik tza'n jun awal in ku'x awet ex in jaw chmet twitz.

⁹Kyja'tzun mi'n qo sikt tu'n qb'inchante aju b'a'n; porke ok qk'ma' t-xel ok tpon tq'ijlalil, qa minti' ma qo kub' numj.

¹⁰Kyja'tzun tkyaqil maj qa at tumel, qb'incham b'a'n kye kykyaqil, ex tnejelxix kye qe erman tuj okslab'l.

¹¹Kyke'yinxe qe nmaq letr ma che kub' ntz'ib'ane kyeye, tu'nx nq'ab'e ma kub' ntz'ib'ane.

¹²Kykyaqil qeju nimxix kyajb'il ti'j sircunsisyón, atzun qe in che ok jwersin te kyeye tu'n kysircunsidarinjtze, atzun kyajb'il tu'n kyten b'a'n kyuk'il xjal ex tu'n mi'n kyyajlanjtz tu'n tlaj ju yol ti'j tcrus Crist.

¹³Porke ax qeju sircunsidarimaj qe minti' in japun ley kyu'n; noq o'kx kyajb'il tu'n kyok jwersine kyu'n tu'n kysircunsidarinjtze, tu'ntzun tjaw kyniman kyib' tu'nju otoq che sircunsidarinjtze.

¹⁴Pero weye mlay chin tzalaje ti'j juntl, noq o'kx tu'n ntzalaje ti'j tcrus Qajaw Jesucrist, porke tu'nju kyim Crist twitz crus, ik tza'n kyimni ma che ok kykyaqil ti'xti at twitz tx'otx' tuj nwitze, ax ikx weye in nna'ne ik tza'n kyimni ma chin oke tuj kywitz.

¹⁵Porke noq tu'nju okslal qo' ti'j Crist, junx ta' qa sircunsidarimaj qo' ex qa mya sircunsidarimaj qo'; aju mas il ti'j, tu'n qok te ak'aj.

¹⁶Kykyaqil qeju in che b'et ik tza'nx in tma'n ju yol lu, atzun qeju axix tok aj Israel qe ex etzan qe tu'n Dios; tenwt kymojb'ab'l kyib' ex tzajxwit q'aq'an tk'u'j Dios kyi'j.

¹⁷Texju ja'lo kuchiwt mi jun tz'ok ik'len te weye porke tok techal k'ixb'len ti'j nximlale, aju techal lu in tyek'un qa ax tok tmajen Qajaw Jesús qine.

¹⁸Erman, tenwt t-xtalb'il Qajaw Jesucrist tuj kyanmiye. Ikxwitju.