Read kumam Efesios 1 Bible Online

Efesios 1 - kumam bible

Efesios 1

¹Aqine Pablo apostol qine te Jesucrist noq tu'n tajb'il Dios. In xi ntz'ib'ane kyeye, aqeye ate'ye tuj tnam Efeso, etzan qeye tu'n Dios, okslal qeye ti'j Jesucrist ex wa'l qe'xixe.

²Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

³Nimanxwit tb'i Dios, aju Tdios Qajaw Jesucrist ex Tman, porke ma qo kub' tky'iwla'n; tkyaqilju ky'iwb'il at tuj kya'j ma tzaj tq'o'n Xewb'aj Xjan qe tu'nju at qmojb'ab'l qib' tuk'il Crist.

⁴Kyja'tzun o qo jaw t-sk'o'n atxix na'nxtoq tb'ant twitz tx'otx', tu'n qten tuk'il Crist, tu'n qajb'en o'kx te, ex tu'n qten twitz minti' ch'in tz'il qi'j.

⁵Tu'n tk'ujlalil Dios kub' t-ximan atxix ojtxi tu'n qok te tk'wa'l noq tu'n Jesucrist, kub' t-ximan ikju porke b'a'n ela tuj twitz.

⁶Kyja'tzun, kukx in xi qq'o'n chjonte te Dios tu'nju t-xtalb'il tb'anilxix; noq tu'n t-xtalb'il ma qo k'met tu'n, tu'nju okslal qo' ti'j Tk'wa'l aju k'ujla'n tu'n.

⁷Noq tu'n Crist ma qo kolpet tu'nju tchk'el, ex ma najset qil tu'nju t-xtalb'il nimxix.

⁸Nimxix t-xtalb'il tzaj tq'o'n qe tu'n ttz'aqet-xix qnab'l ex tu'n telxix qnik' ti'j.

⁹Ma tzaj tyek'un Dios ju tajb'il qe, aju ewantoq nej, porke b'a'n ela tuj twitz ikju, ex tu'nx kub' t-ximan ikju,

¹⁰tu'n tok tmojb'a'n tkyaqil tjaq' tkawb'il Crist ok tjapun b'aj tq'ijlalil; qeju ate' tuj kya'j ex qeju ate' twitz tx'otx'.

¹¹Tu'nju okslal qo' ti'j Crist ma tzaj q'o'n jun qetzb'il, ojtxi kub' t-ximan Dios jlu tu'n ttzaj tq'o'n qe, porke tkyaqil in tb'incha'n Dios ik tza'nx tajb'il ex ik tza'nx xima'maj tu'n.

¹²Atzun t-ximb'etz Dios, tu'n tjaw qnimsa'n tb'i ex tu'n t-xi qq'o'n chjonte te, aqeqo' nej ok qe' qk'u'je ti'j Crist aju at toklen tu'n Dios.

¹³Ax ikx kyeye, tej t-xi kyb'i'ne ju yol axix tok, aju tqanil kolb'il kyeye, ex tej t-xi kyoksla'ne Crist, ma che ok mojb'a'ne tuk'il, ex ma tz'ok q'o'n jun sey kyi'je tu'n Xewb'aj Xjan, aju tziyimaj tu'n Dios.

¹⁴Ate Xewb'aj Xjan ma tzaj q'o'n te jun señ tu'n qk'monte jun qetzb'il. Okxi tjapun b'aj tq'ijlalil tu'n qkolpet, maxitzun ktzajel q'o'n ju qetzb'il tu'ntzun tjaw qnimsa'n tb'i Dios ex tu'n t-xi qq'o'n chjonte te.

¹⁵Kyja'tzun, ik tza'n weye, atxix tej nb'inteye ti'j kyokslab'le at ti'j Qajaw Jesús ex ti'j kyk'ujlalile at kyi'j kykyaqil okslal,

¹⁶kukx t-xi nq'o'ne chjonte te Dios kyi'je, ex kukx in che tzaj nna'ne tuj nna'j Diose.

¹⁷In chin kub'sane twitz Tdios Qajaw Jesucrist, aju Mamb'aj ma'xix toklen, tu'n ttzaj tq'o'n kynab'le ex tu'n ttzaj tchik'b'a'n kyeye tu'n telxix kynik'e ti'j Dios.

¹⁸Ex in xi nqanine te Dios tu'n ttzaj t-spik'b'a'n tuj kynab'le tu'n tel kynik'e ti'j ju ktzajel tq'o'n Dios kyeye tuj kya'j tu'nju ma che txkonjtze tu'n, ex waje tu'n tel kynik'e ti'j ju etzb'il nimxix ex tb'anilxix ktzajel tq'o'n Dios kye okslal,

¹⁹ex tu'n tel kynik'e ti'j tipumal nimxix, aju ma tzaj tq'o'n qe ex tu'n tajb'en qe, aqo' ma qo okslan. Junx ta' tipumal ma tzaj tq'o'n qe ik tza'n tipumal

²⁰tej tjatz anq'in Crist tu'n kyxol kyimni ex xi tma'n tu'n tkub' qe' ttxlaj tuj b'anq'ab'aj tuj kya'j,

²¹ex tu'n tten mas toklen kyib'aj kykyaqil qe nejenel ex qeju at kyoklen ex qeju at kyipumal ex qeju in che kawin, ex mas at toklen tb'i twitz kyb'i kykyaqil, mya noq o'kx tuj tq'ijlalil ja'lo, ax ikx tuj tq'ijlalil tzul.

²²Ex tkyaqil kub' tq'o'n Dios tjaq' tkawb'il Crist, ex xi tq'o'n Dios toklen Crist tu'n tok te nejenel kyib'aj kykyaqil okslal.

²³Atzun kye kykyaqil okslal ik tza'n t-ximlal Crist qe. Ex tu'n Crist in tz'aqet-xix ju Iglesi, porke tu'n Crist tz'aqlxix tkyaqil aju at.