Read kumam Efesios 3 Bible Online

Efesios 3 - kumam bible

Efesios 3

¹Tu'n tlaj jlu in chin na'ne Dios kyi'je, aqine Pablo, pres qine tu'n tlaj okslal qine ti'j Jesucrist, ex pres qine tu'n tlaj in chin ajb'ene kyxole, aqeye xjal mya judiy.

²Porke malo kyb'iye tza'n tten tzaj tq'o'n Dios t-xtalb'il weye tu'n t-xi nq'o'ne kyeye.

³Wekuye tzaj tchik'b'a'n Dios aju yol ewantoq nej, ik tza'n kab' ox yol xi ntz'ib'ane kyeye nej.

⁴Ok tjaw kysch'i'ne aju u'j ma txi ntz'ib'ane kyeye, k'elel kynik'e ti'j tza'n tten sel nnik'e ti'j tyol Crist ewantoq nej.

⁵Aju yol lu ewantoq nej minti' tzaj yek'un kye xjal tuj tq'ijlalil ojtxi, pero ja'lo ma tzaj yek'un kye qe apostol xjan ex kye t-sanjel Dios tu'nju Xewb'aj Xjan.

⁶Atzun jlu ma tzaj yek'un: Qe xjal mya judiy ma kyk'am jun etzb'il junx kyuk'il xjal judiy, ex ma che ok ten ti'j junx kyximlal, ex tu'nju okslal qe ti'j Jesucrist at kyoklen ti'j ju yol tzaj ttziyan Dios, noq tu'nju ma txi kyniman tqanil kolb'il.

⁷Noq tu'n t-xtalb'il Dios ma tzaj q'o'n woklene tu'n woke ajb'el ti'j tqanil kolb'il, ma tzaj q'o'n jlu weye tu'n tipumal Dios.

⁸Aqine mas tal ch'in kywitz kykyaqil okslal; ex ma tzaj tq'o'n Dios t-xtalb'il weye tu'n t-xi npakb'a'ne tqanil kolb'il kye xjal mya judiy, aju tqanil lu in yolin ti'j tq'inumab'l Crist mlay tz'el b'aj qnik' ti'j.

⁹Ex ma tzaj tq'o'n Dios t-xtalb'il weye tu'n t-xi nchik'b'a'ne kye kykyaqil xjal tza'n tten tu'n tjapun ju yol ewan tuk'il Dios atxix tuj tab'q'iyil ojtxi, ate Dios o b'inchante tkyaqil t-xe tnejel.

¹⁰Atzun t-ximb'etz Dios, tu'ntzun t-xi yek'un kye nejenel ex kye qeju at kyoklen tuj kya'j alkye tnab'l Dios junxilchaq tten kyi'j kykyaqil okslal, tu'n tel kynik' ti'j alkye tnab'l Dios.

¹¹Kub' t-ximan Dios jlu atxix ojtxi tu'n tjapun tu'n Qajaw Jesucrist.

¹²Ex tu'n Crist ma qe' qk'u'j ex at tzoqpib'l qe tu'n qpon laq'e' twitz Dios, noq tu'n qokslab'l ti'j Crist.

¹³Kyja'tzun chin kub'sale kywitze tu'n mi'n tb'aj kyk'u'je tu'nju in chin yajlanjtze tu'n kylaje, porke aju nnik'x wu'ne, tu'n tok te jun tzalajb'il kyeye.

¹⁴Tu'ntzun tlaj jlu in chin kub' ẍmeje'ye twitz Tman Qajaw Jesucrist.

¹⁵Ti'j Tman Qajaw Jesucrist tzajni xe't kyb'i kykyaqil k'loj kyiyjil, qeju ate' tuj kya'j ex qeju ate' twitz tx'otx'.

¹⁶In chin kub'sane twitz Dios tu'n ttzaj tq'o'n nimxix t-xtalb'il kyeye ti'j ju tq'inumab'l chmo'n tuj kya'j, ex tu'n kykyuwsanjtze tuj kyanmiye ex tu'n ttzaj q'o'n kyipumale tu'n T-xew Dios.

¹⁷In chin kub'sane twitz tu'n tnajan Crist tuj kyanmiye noq tu'n kyokslab'le, ikwit tten kyk'ujlalile ik tza'n jun tze' at tlok' ex tawan tib',

¹⁸tu'n telxix kynik'e ti'j kyuk'ix kykyaqil okslal, tza'n tten tk'ujlalil Crist, nik'pun twitz, nik'pun tnuqb'il, nik'pun t-xe' ex nik'pun twa'l,

¹⁹ex tu'n kyojtzqinteye tk'ujlalil Crist, tu'ntzun tnojxix tuj kyanmiye tu'n Dios, maske mlay tz'el b'aj qnik' ti'j tkyaqil.

²⁰Ate Dios at tipumal tu'n tb'inchante tkyaqil. At tipumal tu'n ttzaj tq'o'n txqantl twitzju in xi qqanin ex twitzju in qo ximan ti'j. Tkyaqil jlu ktzajel tq'o'n porke in aq'nan tipumal tuj qanmi.

²¹Nimanxwit tb'i Dios kyu'n kykyaqil okslal noq tu'n Jesucrist tuj tkyaqil tab'q'iyil te jumajx. Ikxwitju.