Read kumam Efesios 5 Bible Online

Efesios 5 - kumam bible

Efesios 5

¹Kykano'mile ti'j Dios, porke tk'wa'l Dios qeye, k'ujla'nxix qeye tu'n.

²Kukx kyk'ujlam kyib'e ik tza'nte Crist ma qo tk'ujla ex xi tq'on tib' tu'n tkyim te qxel ik tza'n jun tal ẍne'l in kub' te chojb'il qil, atzun jun oyaj at tk'ok'jal ex in tzalaj Dios ti'j.

³Atzunju yaẍb'il ex tkyaqil ttz'ilil, ex tkyaqilju in pon kyk'u'j xjal ti'j, minti' tu'n kyyoline ti'j, porke mya b'a'n tu'n kyyolin okslal ti'j jlu.

⁴Ex mi'n che yoline ti'j tk'ayil yol, ex qa jun yol minti' tnab'l, ex qa jun yaqb'il mya b'a'n, porke mya b'a'n jlu; mas b'a'n tu'n t-xi kyq'o'ne chjonte te Dios.

⁵Porke b'a'n jlu kyu'ne, qe xjal in che yaẍin, ex qe xjal tz'il tuj kyanmi, ex qe xjal in pon kyk'u'j ti'j q'inumab'l, minti' kyoklen ti'j tkawb'il Crist, aju ax tkawb'il Dios, ex qa ma pon qk'u'j ti'j q'inumab'l, junx ta' jlu ik tza'n in qo k'ulun kywitz qe tilb'ilal.

⁶Kykwentim kyib'e tu'n mi'n kykub' sb'u'ne tu'n jun yol noqx gan, porke tu'n tlaj tkyaqil jlu in tzaj tq'oj Dios kyi'j qe xjal mib'an che b'in.

⁷Kyja'tzun mi'n tz'ok kymojb'an kyib'e kyuk'il.

⁸Porke ojtxi ate'ye tuj qlolj, atzun ja'lo ate'ye tuj spik'un tu'nju okslal qeye ti'j Qajaw; che anq'intzune tuj spik'un porke te spik'un qeye.

⁹Porke aju in tzaj tq'o'n spik'un qe, atzun tu'n qb'inchante b'a'n, ex tu'n qb'et tuj tumelxix, ex tu'n qyolin axix tok.

¹⁰Tz'elx kynik'e ti'j alkyeju b'a'n tuj twitz Qajaw.

¹¹Ex mi'n tz'ok kyq'on kyib'e ti'j ju in b'inchanjtz tuj qlolj minti' jun b'a'n in tq'o'n, noq o'kx tu'n t-xi kymayo'ne.

¹²Porke ch'ixb'il tu'n qyolin ti'j ju in kyb'incha'n xjal tuj ewaj.

¹³Pero tkyaqil nne'l tuj q'ancha'l ok tkanun spik'un ti'j; ex tkyaqil nne'l tuj q'ancha'l tu'n spik'un.

¹⁴Kyja'tzun at jun yol in tma'n kyja': Aya in tana, q'i'mel twatla ex we'ktza kyxol kyimni, ex kb'el ten t-spik'umal Crist tib'aja.

¹⁵Kyja'tzun che ximane ti'j tza'n tten tu'n kyb'ete; mi'n che b'ete minti' kynab'le, noq o'kx tu'n tten kynab'le.

¹⁶Tz'ajb'enxwit tkyaqil q'ij kyu'ne tu'n kyb'inchanteye b'a'n, porke mya b'a'n ju tq'ijlalil ja'lo.

¹⁷Kyja'tzun, mi'n che oke minti' kynab'le, noq o'kx tu'n tel kynik'e ti'j alkyeju tajb'il Qajaw.

¹⁸Mi'n che k'ane q'e'n; porke tu'ntzun jlu minti' ch'in kyjuk'b'il kyib' xjal; noq o'kx tu'n tnoj tuj kyanmiye tu'n Xewb'aj Xjan.

¹⁹Che yoline kyi'j salmo kyxolxe ex che b'itzane; kyb'itzanxe b'itz te Dios, che b'itzane ex kyq'onxe chjonte te Qajaw tu'n tkyaqil kyanmiye.

²⁰Kukx kyq'onxe chjonte te Qman Dios ti'j tkyaqil, noq tu'n Qajaw Jesucrist.

²¹Kynimanx kyib'e kyxolxe tu'nju at tchi Crist tuj kywitze.

²²Aqeye xu'j, kynimanxe kychmile ik tza'n in xi kynimane Qajaw.

²³Porke ate xinaq nejenel te xu'j, ik tza'n te Crist nejenel kye kykyaqil okslal; ex ax Crist Klol kye; atzun kye okslal t-ximlal Crist qe.

²⁴Ik tza'n kye okslal in xi kyniman Crist, ikxtzun kye xu'j tu'n t-xi kyniman kychmil tuj tkyaqil.

²⁵Aqeye chmilb'aj, kyk'ujlam kyxu'jile ik tza'n te Crist ma che tk'ujla kykyaqil okslal ex xi tq'on tib' tu'n tkyim tu'n kyklet,

²⁶tu'ntzun kyel tpa'n tu'n kyajb'en okslal o'kx te Dios, kyb'ajlenxi tx'jet tu'n tyol Dios; ik tza'n tu'n a' otoq che b'aj tx'jet.

²⁷Tu'ntzun kykub' ten qe okslal twitz Dios tb'anilxix che ke'yin, minti' ch'in tz'il kyi'j ex minti' ch'in yu'ch twitz kyxb'alun ex minti' juntl mya b'a'n kyi'j, noq o'kx tu'n kyajb'en o'kx te Dios ex minti' ch'in kypaltil.

²⁸Ax ikx qe chmilb'aj kyk'ujlam kyxu'jil ik tza'n in kyk'ujla'n kyximlal. Aju xjal in tk'ujla'n t-xu'jil in tk'ujlan tib'.

²⁹Porke mi jun xjal nne'l tik'un t-ximlal, noq o'kx in tk'a'chan ex kwentin tu'n, ik tza'n in tb'incha'n Crist kye kykyaqil okslal.

³⁰Porke atzun ato'k ti'j t-ximlal Crist, ex ti'j tchib'jal ex ti'j tb'aqil.

³¹Kyja'tzun tten, kyjel tq'o'n xinaq tman ex ttxu', ex kmojeb'il tuk'il t-xu'jil ex che okel kykab'il te junx.

³²Aju yol lu ma' t-xilen, mlay tz'el qnik' ti'j qu'nx qib'; aju yol in xi nma'ne in yolin ti'j Crist ex kyi'j kykyaqil okslal.

³³Kyja'tzun tten teyle junjun kyeye, k'ujlam t-xu'jil ik tza'n in tk'ujlan tib', ax ikx te xu'j nimanx tchmil.