Read kumam Filipenses 1 Bible Online

Filipenses 1 - kumam bible

Filipenses 1

¹Aqine Pablo tuk'ix Timoteo, tmajen Jesucrist qo'ye, in xi qtz'ib'ane kyeye kykyaqile okslal qeye ti'j Jesucrist ate'ye tuj tnam Filipos, kyuk'ix qe kwentil ex qe diácono.

²Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

³Tkyaqil maj ok in che tzaj nna'ne, in xi nq'o'ne chjonte te Dios aju in chin ajb'ene te.

⁴Kukx in chin na'ne Dios kyi'je kykyaqile tuk'il tzalajb'il,

⁵in chin tzalaje tu'nju in che onine wuk'ile tu'n tpakb'anjtz tqanil kolb'il atxix tnejel q'ij ax ikx ja'lo.

⁶Q'uql nk'u'je ti'j jlu: Ik tza'n ma xe't jun aq'untl b'a'n tu'n Dios tuj kyanmiye, ax ikxtzun kjapunel tu'n tuj tq'ijlalil ok tul Jesucrist.

⁷Tuj tumelxix tu'n nximane ti'j jlu kyi'je kykyaqile tu'nju at nk'u'je kyi'je; ex ma kyk'ame t-xtalb'il Dios junx wuk'ile, ex in che onine wuk'ile tuj presb'il weye, ax ikx ik tza'n in chin ok tene kolol ti'j tqanil kolb'il twitz kawil ex tu'n t-xi nkyuwsa'ne axix tok ti'j.

⁸Porke ate Dios testiw wi'je, nimxix nk'ujlalile kyi'je kykyaqile, ik tza'n tk'ujlalil Jesucrist.

⁹Atzun jlu in xi nqanine te Dios; tu'n tten mas kyk'ujlalile ex tu'n tten mas kynab'le ex tu'n telxix kynik'e ti'j tkyaqil,

¹⁰tu'ntzun tb'ant kysk'one ti'j alkyeju mas b'a'n, tu'ntzun tten saq tuj kyanmiye ex minti' kypaltile tuj tq'ijlalil ok tul Crist.

¹¹Atzun waje tu'n kytene tz'aqlxix tuj tkyaqil noq tu'n tipumal Jesucrist, tu'ntzun tjaw nimsa'n tb'i Dios ex tu'n t-xi q'o'n chjonte te.

¹²Erman, waje tu'n kyb'inteye; tkyaqilju ma b'aj wi'je ma tz'ajb'en tu'n tel laq'e' mastl tqanil kolb'il.

¹³Kyja'tzun kykyaqil soldad ate' tuj cuartel, kyuk'ix mastl, ma tz'el kynik' wi'je, pres qine tu'n tlaj in chin ajb'ene te Crist.

¹⁴Ex nimxix erman ma qe'xix kyk'u'j ti'j Crist tu'n tlaj pres qine, ex mas nno'k tilil kyu'n tu'n t-xi kyma'n tyol Dios minti' kyxob'il.

¹⁵Ax tok at junjun xjal in che pakb'an ti'j Crist tu'nju at tlo'ch kyk'u'j ti'j juntl ex tu'nju at ch'in kyq'oj, atzun junjuntl in che pakb'an tu'n tkyaqil kyk'u'j.

¹⁶At junjun in che pakb'an ti'j Crist tu'nju at ch'in kyq'oj wi'je, mya tu'n tkyaqil kyk'u'j, kyajb'il tu'n ttzaj mas nb'ise tuj pres;

¹⁷atzun junjuntl in che pakb'an ti'j Crist tu'nju at kyk'ujlalil, porke b'a'n kyu'n ma chin kub' q'o'ne tzalu tu'n nkoline ti'j tqanil kolb'il.

¹⁸¿Titzun kxel nma'ne? Qatzun tuj tumel in che pakb'an ti'j Crist ex qa mya tuj tumel, pero in chin tzalaje ti'j jlu, porke in che pakb'an ti'j Crist. Ex kukx chin tzalajele,

¹⁹porke b'a'n wu'ne ok chin tzoqpetele tu'n kyna'j Diose ex tu'nju ma tzaj q'o'n T-xew Jesucrist te onil weye.

²⁰Ex atzun wajb'ile ex q'uql nk'u'je ti'j, tu'n mi'n ttzaj nch'ixwiye, noq o'kx tu'n tqe' nk'u'je tu'n nyoline tu'ntzun tjaw nnimsa'ne tb'i Crist, ik tza'n ojtxi ax ikx ja'lo, qa tu'n wanq'ine ex qa tu'n nkyime.

²¹Ex qa itz' qine tuk'il Crist in chin anq'ine, ex qa ma chin kyime, atzun jun nkamb'ab'leju.

²²Qa tu'n wanq'intle kab' q'ij tzalu, jaku chin aq'nane ch'intl tu'n tch'iy taq'un Qajaw. Pero minti' nne'l nnik'e ti'j alkye mas b'a'n tu'n tjaw nsk'o'ne.

²³At kab'e nximb'etze, pero minti' nne'l nnik'e ti'j alkye mas b'a'n. Tuj jun tumel waje tu'n nkyime ex tu'n ntene tuk'il Crist, ex mas b'a'n jlu;

²⁴ex tuj juntl tumel mas b'a'n te kyeye tu'n wanq'intle kab' q'ij.

²⁵Q'uql nk'u'je ti'j jlu ex b'a'n wu'ne, kukx chin tele kyuk'ile kykyaqile tu'ntzun kych'iye ex tu'n kytzalaje tuj kyokslab'le.

²⁶Kyja'tzun tten jaku che tzalaje wi'je ok npone juntl maj kyuk'ile, tu'nju okslal qeye ti'j Jesucrist.

²⁷O'kx chin kub'sale kywitze tu'n kyanq'ine b'a'nxix, ik tza'nx tqanil kolb'il in yolin ti'j Crist. Kyja'tzun, qa ma chin pone ke'yil kyeye ex qa minti' ẍin pone, ex wajb'ile tu'n nb'inteye tqanil kyi'je, kukx kytene wa'lxix qeye, junx kyanmiye ex junx kynab'le, ex junx nno'k tilil kyu'ne tu'n kykoline ti'j kyokslab'le, aju ma tzaj q'o'n kyeye tu'n tqanil kolb'il.

²⁸Ex minti' tu'n kyxob'e kywitz qeju in che q'ojin kyi'je; qa in che q'ojin kyi'je, atzun jun yek'b'il kye tu'n kyxi' tuj najen, pero atzun te kyeye, atzun jun yek'b'il tu'n kyklete; ax Dios in tzaj yek'unte jlu.

²⁹Porke ma tzaj q'o'n jun kyoklene mya noq o'kx tu'n kyokslane ti'j Crist, ax ikx tu'n tik'x kyu'ne tu'n tlaj.

³⁰Nno'k tilil tu'n tik'x kyq'oj xjal kyu'ne ik tza'n weye; o kyile ojtxi tza'n tten ik'x kyq'oj xjal wu'ne, ex ja'lo ma pon tqanil kyuk'ile, kukx tik'x wu'ne.