Read kumam Filipenses 2 Bible Online

Filipenses 2 - kumam bible

Filipenses 2

¹Kyja'tzun, qa ma tzaj q'o'n kynab'le tu'n Crist, ex qa ma q'uqb'anjtz kyk'u'je tu'n tk'ujlalil, ex qa at kymojb'ab'l kyib'e tuk'il Xewb'aj Xjan, ex qa at kyk'u'je ti'j juntl ex qa in q'aq'an kyk'u'je ti'j juntl,

²kytzalajsame nk'u'je, junxwit kynab'le, junxwit kyk'ujlalile kyxolxe, junxwit kyximb'etze, mojl taq'pon kyu'ne kykyaqile.

³Mi'n kyb'inchaye jun ti'xti tuk'il q'oj, ex mi'n jaw kyniman kyib'e, noq o'kx tu'n tkub' kymansin kyib'e, teyle junjun b'a'n tu'n t-ximan kyi'j txqantl okslal qa at mas kyoklen twitz.

⁴Teyle junjun mya noq o'kx tu'n tok tq'o'n tkwent ti'j aju at tajb'en te, ax ikx tu'n tok tq'o'n tkwent ti'j aju at tajb'en kye txqantl.

⁵Junxwit kyximb'etze ik tza'n t-ximb'etz Jesucrist.

⁶Ate Crist junx ta' ik tza'n Dios, ex minti' kub' t-ximan tu'n mi'n tkyaj ttzoqpi'n toklen ik tza'n Dios,

⁷noq o'kx kyaj ttzoqpi'n toklen, ok tq'on tib' te majen, ex ok ik tza'n qe xjal.

⁸Tejtzun tok ik tza'n xjal, mas kub' tmansin tib', xi tniman tajb'il Dios, ex xi tq'on tib' tu'n tkyim, maske atzun tu'n tkyim twitz crus.

⁹Kyja'tzun, mas jaw nimsa'n tu'n Dios tib'aj tkyaqil, ex ok tq'o'n Dios jun tb'i mas ma' t-xilen twitz kyb'i kykyaqil,

¹⁰tu'ntzun kykub' ẍmeje' kykyaqil k'ulul twitz Jesús ok kyb'inte aju tb'i, tza'nx qeju ate' tuj kya'j, ikx qeju ate' twitz tx'otx', ex qeju ate' tjaq'xi tx'otx';

¹¹ex tu'n kymante kykyaqil: Ax tok ate Jesucrist Qajaw, tu'ntzun tjaw nimsa'n tb'i Qman Dios.

¹²Kyja'tzun erman, aqeye at nk'u'je kyi'je, kukx in xi kynimane nyole; ik tza'n xi kynimane tej ntene kyuk'ile, ax ikx ja'lo kukx t-xi kynimane mi a'l qine kyuk'ile. Japunx kyu'ne aju in tma'n kolb'il kyeye, atwit tchi Dios tuj kywitze tu'n kyxob'e twitz.

¹³Porke ate Dios in aq'nan tuj kyanmiye tu'n tten kyganiye ti'j ju tajb'il ax ikx tu'n kyb'inchanteye.

¹⁴Ok tb'ant noq alkyexku kyu'ne, mi'n txi' jun kyyole ti'j juntl ex mi'n tzaj jun yol kyxole,

¹⁵tu'n kytene minti' kypaltile ex tu'n kytene minti' jun mya b'a'n tuj kyximb'etze, noq o'kx tu'n kyoke te tk'wa'l Dios minti' ch'in tz'il kyi'je kyxol qe xjal mya b'a'n qe ex mib'an che b'in. Ik kytene ik tza'n qe che'w in che qoptz'aje kyxol xjal ate' tuj qlolj.

¹⁶Kymanxe ju yol te chwinqlal kye, tu'ntzun ntzalaje tuj tq'ijlalil ok tul Crist, qa mya noqx gan otoq tz'ok tilil wu'ne ex mya noqx gan otoq chin aq'nane.

¹⁷Maske chin kyime tu'n tlaj taq'un Crist, pero in chin tzalaje ti'j, porke jun oyaj jlu in xi nq'o'ne te Dios junx tuk'il ju kyoyaje. Aju kyoyaje in xi kyq'o'ne atzunju, kyajb'eb'le te Dios noq tu'n kyokslab'le. Kyja'tzun junx in chin tzalaje kyuk'ile kykyaqile.

¹⁸Ax ikxtzun kyeye che tzalajxe ex che tenxe alegr junx wuk'ile.

¹⁹Qa ik tajb'il Qajaw Jesús, ximan wu'ne tu'n t-xi nsama'n naje Timoteo kyuk'ile, tu'ntzun tqe' nk'u'je ok nb'inteye tqanil kyi'je.

²⁰Porke minti' juntl at wuk'ile ik tza'n te Timoteo, at tk'u'j kyi'je tu'n tonin kyuk'ile.

²¹Porke kykyaqil o'kx nno'k tilil kyu'n ti'j ju at tajb'en kye, ex mya ti'j ju tajb'il Jesucrist.

²²Porke ojtzqi'n kyu'ne tza'n tten tz'aq'nan Timoteo, ik tza'n jun k'wa'lb'aj in ajb'en te tman, ikxtzun ma tz'ajb'en Timoteo wuk'ile tu'n tpakb'anjtz tqanil kolb'il.

²³Kyja'tzun ximan wu'ne tu'n t-xi nsama'ne Timoteo kyuk'ile, ex nej tu'n nb'inteye tza'n ta' nkawse.

²⁴Ex q'uql nk'u'je ti'j Qajaw, ax ikx weye chin pol naje kyuk'ile.

²⁵Pero ma kub' nximane qa il ti'j tu'n t-xi nsama'ne Epafrodito kyuk'ile aju wermaniye ex in onin wuk'ile tuj aq'untl, ex soldad junx wuk'ile; atzun kysanjele ex ajb'el weye ti'j ju at tajb'en weye.

²⁶Ex nimxix o tajb'e tu'n t-xi' ke'yil kyeye kykyaqile, ex nimxix tzaj tb'is tu'nju otoq kyb'iye qa otoq yab't.

²⁷Ax tok o yab't, ch'ixmi o kyim; pero tzaj q'aq'an tk'u'j Dios ti'j, mya o'kx ti'j tzaj q'aq'an tk'u'j Dios, ikx wi'je, tu'ntzun mi'n ttzaj mastl nb'ise.

²⁸Kyja'tzun kxel nsama'n naje, tu'ntzun kytzalaje ok kylonteye juntl maj twitz ex tu'n tel ch'in nb'ise.

²⁹Kyk'momtzune tu'n tkyaqil tzalajb'il tu'nju okslal ti'j Qajaw, ex kyk'ujlame qeju ik kyten ik tza'n te;

³⁰ex ch'ixmi xkyim tu'nju in ajb'en tuj taq'un Crist, xi toyin tib' tu'n tkyim tu'n tul ti'n ju onb'il weye, aju minti' tumel tu'n kyule q'ol te.