Read kumam Filipenses 3 Bible Online

Filipenses 3 - kumam bible

Filipenses 3

¹Kyja'tzun erman che tzalajxe ti'j Qajaw. Mlay chin sikte tu'n t-xi ntz'ib'ane juntl maj axju yol xi ntz'ib'ane kyeye nej, ex jun onb'il jlu te kyeye.

²Ten kykwente kyi'je kye xjal ik kyten ik tza'n tx'yan; ten kykwente kyi'je kye b'inchal mya b'a'n; ten kykwente kyi'je kye qeju in b'aj kyqesin kyximlal.

³Porke aqeju axix tok ma tz'ok sircunsisyón kyi'j, aqo' porke in qo k'ulun te Dios tuj qanmi ex in qo tzalaj ti'j Jesucrist; mya ti'j qxilen q'uql qk'u'j ex mya ti'j qb'inchb'en.

⁴Ik tza'n weye, noqwit waje tu'n tqe' nk'u'je ti'j nxilene ex qa ti'j nb'inchb'ene, ja'lo tz'ok qe' nk'u'je ti'j. Qa at juntl xjal taj tu'n tqe' tk'u'j ti'j t-xilen ex qa ti'j tb'inchb'en, mlay pon ik tza'n weye.

⁵Porke tej witz'je in sircunsidarinjtze tuj twajxaqin q'ij; tiyjil Israel qine, ex tiyjil Benjamín qine; hebreo xjal qine ex hebreo xjal qe nmane. Fariseo qine, nim nganiye ti'j tley Moisés;

⁶ex tu'nju at nim nganiye ti'j tley Moisés, kyja'tzun e yajlanjtz qe okslal wu'ne; tkyaqilju in tma'n ley tu'n tjapun, o b'ant wu'ne, minti' npaltile twitz ley.

⁷Tkyaqil jlu at tajb'en weye nej, ya ja'lo minti'tl tajb'en weye, tu'n tlaj ma txi woksla'ne Crist.

⁸Ax tok ma kub' nximane tkyaqil jlu minti'tl tajb'en te weye, noq o'kx waje tu'n wojtzqinteye Jesucrist aju Wajawe, porke ma'xix toklen jlu. Tu'n tlaj Crist ma naj tkyaqil wu'ne, ex tuj nwitze ma tz'ok ik tza'n tz'is, tu'ntzun tknet Crist wu'ne ik tza'n jun kamb'ab'l,

⁹ex tu'n ntene tuk'il minti' ma chin oke tz'aqlxix wu'nx wib'e tu'nju o nb'inchaye aju in tma'n ley, noq o'kx tu'n wokslab'le ti'j Crist; ma chin oke te tz'aqlxix tu'n Dios tu'nju ma chin okslane ti'j.

¹⁰Wajb'ile tu'n wojtzqinteye Crist ex tu'n nk'monteye tipumal te weye, ik tza'n tipumal Crist tej tjatz anq'in kyxol kyimni, ex wajb'ile tu'n tik'x wu'ne ik tza'n te Crist ik'x tu'n, ex tu'n woke ik tza'n te Crist tej tkyim,

¹¹tu'ntzun nkanune ti'j tu'n njatz anq'ine kyxol kyimni.

¹²Ja'lo na'nx nkanune ti'j ex na'nx ttz'aqet-xix wu'ne, noq o'kx nno'k tilil wu'ne tu'n nkamb'anteye, porke ik tza'n weye ma chin kamb'anjtze tu'n Jesucrist.

¹³Erman, minti' in xi nma'ne qa ma nkamb'aye, pero atzun jlu in nb'incha'ne, ma tzik' tna'l wu'ne aju ma kyaj wi'jxiye, ex nno'k tilil wu'ne tu'n nkanune ti'j ju tkub' nwitze.

¹⁴Ljo'nx wu'ne tu'n nkanune ti'j jatum tok nwitze tu'n nk'monteye jun oyaj, ex max tuj kya'j ma tzaj txokb'il weye tu'n Dios, tu'nju atine tuk'il Jesucrist.

¹⁵Kyja'tzun tten, qkyaqil aqo' ma tz'aqet qnab'l, axwit jlu tu'n qximan ti'j; qatzun qa junxitl kyximb'etze, ax Dios ktzajel yek'unte kyeye.

¹⁶Aju ma tz'el qnik' ti'j, axtzunju tu'n qximan ti'j ex tu'n qb'inchante.

¹⁷Erman, kykano'mile wi'je, ex kyq'o'nke kwent kyi'j qeju in che anq'in ik tza'n ju yek'b'il xi qq'o'ne kyeye.

¹⁸Porke nimku xjal in che b'et aj q'oj qe ti'j tcrus Crist, nimku maj o txi nma'ne kyeye kyi'j jlu, ex ja'lo b'i'x in chin jaw oq'e tu'n t-xi nma'ntle kyeye.

¹⁹Che xe'l jlu tuj najen, porke axju tachb'il kyk'u'j ma tz'ok te kydios; ex in che tzalaj ti'j kych'ixwi; o'kx in che ximan ti'j aju at twitz tx'otx'.

²⁰Pero aju qtanmi atzun ta' tuj kya'j; atzun ktzajel Klol qe aju Qajaw Jesucrist, aju in qo ayon ti'j.

²¹Aju qximlal minti' ch'in tb'anil, pero kch'expetel tu'n Jesucrist, k'okel ik tza'n t-ximlal Jesucrist tb'anilxix, tu'n tipumal kch'expetel tu'nju at tipumal tu'n tten tkyaqil tjaq' tkawb'il.