Read kumam Filipenses 4 Bible Online

Filipenses 4 - kumam bible

Filipenses 4

¹Kyja'tzun erman, che we'xixe tuj kyokslab'le ti'j Qajaw, aqeye at nk'u'je kyi'je ex wajb'ile tu'n tok nke'yine kywitze, kyu'ne in chin tzalaje, ex aqeye nkamb'ab'le, aqeye at nk'u'je kyi'je.

²Aqeye erman Evodia tuk'ix erman Síntique, chin kub'sale kywitze tu'n kytene junx kynab'le, tu'nju okslal qeye ti'j Qajaw.

³Ax ikx teya wuk'il ma japun tu'na tuj aq'untl, chin kub'sale teya, onina kyi'j xu'j lu, porke junx e aq'nan wuk'ile tu'n tpakb'anjtz tqanil kolb'il, ex tuk'ix Clemente ex mastl e onin wuk'ile tuj aq'untl, tz'ib'an kyb'i tuj tu'jil chwinqlal.

⁴Kukx che tzalaje ti'j Qajaw. Kxel nma'ne juntl maj kyeye: Che tzalajxe.

⁵Tz'elxwit nik'b'aj kyi'je kyu'n kykyaqil xjal qa mejor kymodiye. In laq'ex ttzaj tq'ijlalil tu'n tul Qajaw.

⁶Mi jun tu'n tb'aj kyk'u'je ti'j; tkyaqil kymanxe te Dios tuj kyna'j Diose; kyqaninxe te, ax ikx kyq'onxe chjonte te.

⁷Kyja'tzun kqeb'il kyk'u'je tu'n Dios; mas ma' t-xilen jlu twitz tkyaqil kynab'l xjal, tu'n jlu k'okel kwentin kyanmiye ex kyximb'etze, tu'nju at kymojb'ab'l kyib'e tuk'il Jesucrist.

⁸Ja'lotzun erman, atzun che ximane ti'j: Tkyaqilju axix tok, tkyaqilju b'a'n tu'n tnimanjtz, tkyaqilju tz'aqlxix, tkyaqilju saqxix, tkyaqilju tb'anilxix ex tkyaqilju in yolinjtz b'a'n ti'j. Qa at jun tb'anilxix, ex qa at jun b'a'n tu'n tjaw nimsa'n, atzun che ximane ti'j jlu.

⁹Kyb'inchame aju ma tz'el kykano'ne wi'je, aju ma kyk'ame weye, aju ma kyb'iye weye, ex aju ma kyile wi'je; atzun jlu kyb'inchame, ex ktel Dios kyuk'ile, aju q'uqb'alte kyk'u'je.

¹⁰Nim ma chin tzalaje ti'j Qajaw, porke ma kub' kyximane tu'n kyonine juntl maj wi'je. Kukx in che ximane wi'je, pero minti' knet jun tumel kyu'ne tu'n kyonine wi'je.

¹¹Mya tu'nju atx taj weye ma txi nma'ne jlu, porke ma chin naq'ete tu'n ntzalaje qa at weye ex qa minti'.

¹²Ojtzqi'maj wu'ne qa tu'n ntene tuj meb'ayil ex qa tu'n tten nim weye; tuj tkyaqil xnaq'tza'maj qine, qa tu'n tnoj nk'u'je ex qa tu'n tik'x we'yaj wu'ne, qa tu'n ntene nim at weye, ex qa tu'n ntene minti' at weye.

¹³Tkyaqil jaku tzik'x wu'ne ex jaku b'ant wu'ne, porke ate Crist in q'onte wipumale.

¹⁴Ex b'a'n ma kyb'inchaye tu'nju ma che onine wuk'ile tuj yajb'il weye.

¹⁵Ax ikx b'i'n kyu'ne, aqeye aj Filipos, tej t-xe't wu'ne tu'n npakb'ane ti'j tqanil kolb'il, ex tej wetze tuj tx'otx' Macedonia, minti' tzaj kyq'o'n okslal tuj juntl tnam jun oyaj weye, o'kx aqeye tzaj kyq'o'ne jun oyaj te t-xel ju xtalb'il o kyk'ame weye.

¹⁶Ex tej ntene tuj tnam Tesalónica, tzaj kysama'ne ela'maj oyaj tu'n tajb'en weye.

¹⁷Myatzun tok nk'u'je ti'j tu'n nk'monteye jun oyaj, ex aju wajb'ile tu'n kyk'monteye nimxix t-xelju ma tzaj kyq'o'ne.

¹⁸Tkyaqil at weye ex nim ma chmet weye, minti' atx taj weye, porke ma nk'ame te Epafrodito aju oyaj tzaj kysama'ne; aju oyaj ma tzaj kysama'ne ik tten ik tza'n storak at tk'ok'jal, ex ik tten ik tza'n jun oyaj in tk'mo'n Dios ex in tzalaj ti'j.

¹⁹Tkyaqilju atx taj kyeye ktzajel tq'o'n Dios kyeye, aju Dios in chin ajb'ene te; noq tu'n Jesucrist ktzajel tq'o'n, porke nimxix tq'inumab'l Dios at ex tb'anilxix.

²⁰Nimanxwit tb'i Qman Dios tuj tkyaqil tab'q'iyil te jumajx. Ikxwitju.

²¹Kyq'onxe nq'olb'eb'le kye kykyaqil okslal ti'j Jesucrist. Qe erman ate' wuk'ile in che'x q'olb'e'ne kyu'n.

²²In che'x q'olb'e'ne kyu'n kykyaqil okslal ex kyu'n qeju in che ajb'en tuj tja gobierni.

²³Aju t-xtalb'il Qajaw Jesucrist tenwt kyuk'ile kykyaqile. Ikxwitju.