Read kumam Colosenses 2 Bible Online

Colosenses 2 - kumam bible

Colosenses 2

¹Ex waje tu'n kyb'inteye, nimxix in chin na'ne Dios kyi'je, ex kyi'j qeju ate' tuj tnam Laodicea, ex kyi'j kykyaqil qeju na'nx tok kyke'yin nwitze.

²Waje tu'n tq'uqb'anjtz kyk'u'je, ex tu'n tten kymojb'ab'l kyib'e tu'n kyk'ujlalile, ex tu'n telxix kynik'e ti'j tu'ntzun tqe'xix kyk'u'je, ex tu'n tel kynik'e ti'j tyol Qman Dios ewantoq nej, in yolin ti'j Crist.

³Porke atzun ta' tkyaqil tb'anil nab'l tuk'il Crist, tewan tib', ex tkyaqil ojtzqi'n tu'n Crist.

⁴Ma txi nma'ne jlu kyeye tu'n mi'n kysb'unjtze kyu'n xjal in kub' ti'j kynab'l xjal tu'n kyyol.

⁵Ex maske mi a'l qine kyuk'ile pero aju wanmiye at kyuk'ile, in chin tzalaje tu'nju b'a'n kytene in xi nb'i'ne, ex tu'nju wa'l qe'xixe tuj kyokslab'le ti'j Crist.

⁶Kyja'tzun, ik tza'n ma kyk'ame Qajaw Jesucrist, ikxtzun tu'n kyanq'ine junx tuk'il.

⁷Kyawam kyib'e ti'j Crist ex kyb'incha'n jawe kychwinqlale tib'aj, porke ate Crist simyent; che we'xixe tuj kyokslab'le ik tza'n ju xnaq'tzb'il ma kyk'ame, ex nimxix kyq'onxe chjonte te Dios.

⁸Ten kykwente kyi'je tu'n mi'n kysb'unjtze tu'n kyxnaq'tzb'il xjal tuj kyex kynab'l in tzaj, ex tu'n mi'n kysb'unjtze tu'n kysb'ub'l noqx gan; porke in che ok lpe' ti'j ju yol kyajni q'ma'n kyu'n kytijil xjal, in che ok lpe' ti'j jun xnaq'tzb'il mya tz'aqlxix in kyq'o'n xjal, minti' in che ok lpe' ti'j Crist.

⁹Porke tkyaqilju tten Dios najl tuj t-ximlal Crist,

¹⁰atzun kyeye ma che tz'aqete tu'nju kymojb'ab'l kyib'e tuk'il Crist. Ate Crist nejenel kyib'aj kykyaqil qeju at kyipumal ex at kyoklen twitz tx'otx' ex tuj kya'j.

¹¹Tu'nju okslal qeye ti'j Crist ma che sircunsidarinjtze, mya tu'n kyq'ab' xjal ma b'ant jlu, noq o'kx tu'n Crist ma che sircunsidarinjtze, tu'nju ma tz'el kykotpi'ne aju ojtxi kytene mya b'a'n, tuk'ix ju tajb'il kychib'jale.

¹²Junx e ku'x maqu'ne tuk'il Crist tej kyb'yane, ex junx ma che jaw anq'ine tuk'il Crist tu'nju ma qe' kyk'u'je ti'j tipumal Dios, aju jaw anq'in Crist tu'n kyxol kyimni.

¹³Kyimni qeye nej tu'n tlaj kyile ex tu'n tlaj kukx kyb'inchanteye tajb'il kychib'jale, atzun ja'lo ma tzaj tq'o'n Dios kychwinqlale junx tuk'il Crist, ex ma kub' tnajsa'n tkyaqil kyile.

¹⁴Kub' tnajsa'n Dios aju tu'jil qk'as jatum in tma'n qa at qil, b'i'x el ti'n, kyaj tklawsiyi'n twitz crus.

¹⁵Tu'n Crist kub' kyi'j qe nejenel minti' q'ancha'l ex qeju at kyipumal; e kub' tq'o'n tu'n kyke'yinjtz kyu'n kykyaqil xjal, kub' kyi'j tu'n tej tjaw q'o'n twitz crus.

¹⁶Kyja'tzun, mi'n txi kyq'o'ne amb'il kye xjal tu'n kyyolin kyi'je tu'n tlaj alkye in xi kywa'ne ex in xi kyk'a'ne, ex qa ti'j jun ninq'ij, ex qa ti'j tu'n tik'set ninq'ij ok ttzaj ke'yin ak'aj xjaw, ex qa ti'j ju q'ij te ojlab'l.

¹⁷Tkyaqil jlu noq jun techal ti'j ju attoq tulel, ex ate Crist ttxuylal, ex tkyaqil jlu ti'j Crist in japun b'aj.

¹⁸Mi'n txi kyq'o'ne amb'il tu'n tel q'i'n kykamb'ab'le kyu'n xjal noq nno'k kyq'on kyib' mans qe, ex in kyma'n tu'n kyk'ulun xjal kywitz anjel. In che yolin ti'j ju na'nx kylonte, ex noqx gan in jaw kyniman kyib' tu'n kyex kynab'l.

¹⁹Mya kytzyun kyib' ti'j Crist aju wib'aj, porke tu'n Crist in ch'iy tkyaqil t-ximlal, tk'a'ch tib' ex ttzyun tib' tu'n tyaqamil ex tu'n tb'otx'il, in ch'iy porke a Dios ch'isal te.

²⁰O che kyime tuk'il Crist tu'n kytzoqpete tjaq' ju xnaq'tzb'il mya tz'aqlxix in kyq'o'n xjal, ¿tiqu'ntzun in xi kyq'on kyib'e tjaq' kyxnaq'tzb'il xjal mer ik tza'n atx kyoklene kyxol?

²¹Achaqtzun kymandamyent jlu: Mi'n tzaj ttzyu'na jlu, mi'n txi tnik'b'e'na jlu, mi'n tz'ok tmako'na jlu, che chi.

²²Tkyaqil jlu kymandamyent xjal ex kyxnaq'tzb'il xjal, tkyaqil jlu knajel ok tb'aj tajb'en kye xjal.

²³Qe xjal in che japun qe mandamyent lu kyu'n, mer ik tza'n at kynab'l, ex kyu'nx kyib' in kub' kyximan tza'n tten tu'n kyk'ulun, in kyyek'un kyib' mans qe, ex in b'aj kyk'ixb'isa'n kyximlal; ex mlay maqet tajb'il kychib'jal tu'n tkyaqil jlu.