Read kumam Colosenses 4 Bible Online

Colosenses 4 - kumam bible

Colosenses 4

¹Aqeye patrón, kyb'inchame aju tz'aqlxix ex tuj tumelxix kye kymajene, porke b'a'n kyu'ne ikx kyeye at jun kypatrone tuj kya'j.

²Kukx che na'ne Dios, che xq'uqine tuj na'j Dios ex kyq'onxe chjonte te Dios.

³Ax ikx che na'ne Dios qi'je, tu'n ttzaj tyek'un Qajaw jun tumel jatum tu'n t-xi qpakb'a'ne tyol Dios, ex tu'n t-xi qchik'b'a'ne tyol Crist aju attoq tuj ewaj nej; tu'ntzun tlaj ju yol lu pres qine.

⁴Che na'ne Dios wi'je, tza'n tten tu'n t-xi nchik'b'a'ne ju yol lu, porke il ti'j tu'n t-xi nma'ne.

⁵Tenx kynab'le tza'n tten tu'n kyb'ete tuj tumelxix kywitz xjal mya okslal qe; tz'ajb'enxwit tkyaqil q'ij kyu'ne tu'n kyb'inchanteye ju b'a'n.

⁶Cheb'a che yoline tkyaqil maj, atwit tchya'l kyyole, tu'ntzun tel kynik'e ti'j tza'n tten tu'n t-xi kytzaq'we'ne teyle junjun xjal.

⁷Tkyaqilju tza'n ntene kxel ttx'olb'a'n Tíquico kyeye; atzun qerman at qk'u'j ti'j, in japunxix tu'n tuj tajb'eb'l, ex tmajen Qajaw junx quk'ile.

⁸Kyja'tzun ma txi nsama'ne Tíquico kyuk'ile, tu'ntzun kyb'inteye tza'n qtene, ex tu'n tq'uqb'anjtz kyk'u'je tu'n.

⁹Tuk'ix Onésimo ma txi nsama'ne, atzun jun erman at qk'u'j ti'j ex in japunxix tu'n tuj aq'untl, ax tzaj kyxole. Tkyaqilju in b'aj tzalu kxel kyma'n kyeye.

¹⁰In che'x q'olb'e'ne tu'n Aristarco aju at wuk'ile tuj pres; ex in che'x q'olb'e'ne tu'n Marcos, kyerman kyib' tuk'il Bernabé. O txi nma'ne jlu kyeye, qa ma pon Marcos kyuk'ile kyk'mome.

¹¹Ex in che'x q'olb'e'ne tu'n Jesús aju Justo tb'i; o'kx qe jlu kyxol qe okslal judiy in che onin wuk'ile tu'n tpakb'et tkawb'il Dios, ex nim ma q'uqb'anjtz nk'u'je kyu'n.

¹²In che'x q'olb'e'ne tu'n Epafras aju tmajen Jesucrist ax tzaj kyxole. Kukx nno'k tilil tu'n tu'n tna'n Dios kyi'je, tu'ntzun kywe'xixe, ex tu'n ttz'aqet-xix kynab'le, ex tu'n tjapun kyu'ne tkyaqilju tajb'il Dios.

¹³Porke ma wile, tokxix tk'u'j Epafras kyi'je ex kyi'j qeju ate' tuj tman Laodicea ex kyi'j qeju ate' tuj tnam Hierápolis.

¹⁴In che'x q'olb'e'ne tu'n doktor Lucas aju at qk'u'j ti'j, ex in che'x q'olb'e'ne tu'n Demas.

¹⁵Kyq'onxe qq'olb'eb'le kye qe erman ate' tuj tnam Laodicea; ex kyq'onxe qq'olb'eb'le te Ninfas ex kye okslal nno'k kychmon kyib' tuj tja.

¹⁶Ok tb'aj sch'i'n ju u'j lu kyxole, kysamanxe tuj tnam Laodicea tu'n tjaw sch'i'n kyxol qe okslal, ax ikx ju u'j xi nsama'ne kye aj Laodicea, b'a'n tu'n tjaw kysch'i'ne.

¹⁷Kymanxe te Arquipo kyja': Q'o'nk tk'u'ja ti'j tu'n tjapun tu'na aju tajb'eb'la o tzaj q'o'n teya tu'n Qajaw.

¹⁸Aqine Pablo in xi ntz'ib'ane ju q'olb'eb'l lu tu'nx nq'ab'e. Kyna'ntze ti'j ju presb'il weye. Aju t-xtalb'il Dios tenwt kyuk'ile. Ikxwitju.