Read kumam 1 Tesalonicenses 1 Bible Online

1 Tesalonicenses 1 - kumam bible

1 Tesalonicenses 1

¹Aqine Pablo, tuk'ix Silvano ex Timoteo ate' wuk'ile, in xi ntz'ib'ane kyeye, aqeye okslal qeye ti'j Qman Dios ex ti'j Qajaw Jesucrist, ate'ye tuj tnam Tesalónica. Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

²Kukx in xi qq'o'ne chjonte te Dios kyi'je kykyaqile, in che tzaj qna'ne tuj qna'j Diose.

³Kukx in che tzaj qna'ne twitz Qman Dios, in che tzaj qna'ne tza'n tten in che aq'nane tu'nju at kyokslab'le ex tu'nju at kyk'ujlalile, ex at kypasense tu'n tik'x kyu'ne, porke q'uql kyk'u'je ti'j Qajaw Jesucrist.

⁴Aqeye erman, k'ujla'n qeye tu'n Dios, b'a'n qu'ne tza'n tten ma che jaw sk'o'ne tu'n.

⁵Porke aju tqanil kolb'il in xi qpakb'a'ne, mya noq o'kx tu'n yol ma pon kyuk'ile, ax ikx tu'n tipumal Xewb'aj Xjan, kyja'tzun qe'xix kyk'u'je ti'j qa axix tok. Porke b'a'n kyu'ne tza'n tten qchwinqlale tej qtene kyxole, o b'ete tuj tumelxix tu'ntzun tajb'en te b'a'n kyeye.

⁶Ex ma tz'el kykano'ne qi'je ex ti'j Qajaw, maske nim e yajlanjtze, tej kyk'monteye tyol Dios, pero nim e tzalaje tu'nju tzaj tq'o'n Xewb'aj Xjan tzalajb'il kyeye.

⁷Kyja'tzun tten ma che oke te jun yek'b'il kye kykyaqil qeju ma che okslan tuj tx'otx' Macedonia ex tuj tx'otx' Acaya.

⁸Porke kyu'ne ma tz'el laq'e' tqanil tu'n tpakb'anjtz tyol Qajaw; mya noq o'kx tuj Macedonia ex tuj Acaya, ax ikx tuj tkyaqil lugar ma tz'el laq'e' tqanil kyokslab'le ti'j Dios; kyja'tzun mya il ti'j tu'n t-xi qma'ne txqantl yol kyi'je.

⁹Ex ax qe xjal in xi kytx'olb'a'n qi'je in kyma'n tza'n tten o k'monjtze kyu'ne ex tza'n tten kyaj kyq'o'ne qe tilb'ilal e ajtz meltz'aje tuk'il Dios, tu'n kyajb'ene teju Dios itz' ex axix tok.

¹⁰Ex tu'n kyayone ti'j Tk'wa'l Dios ktzajel tuj kya'j, aju jatz anq'in tu'n kyxol kyimni, atzun Jesús, aju klol qe te tq'oj Dios tzul, porke ma'xix jun castiw tzul kyi'j xjal.