Read kumam 1 Tesalonicenses 3 Bible Online

1 Tesalonicenses 3 - kumam bible

1 Tesalonicenses 3

¹Minti' ik'x ti'j qu'ne tu'n qb'inteye kyi'je, kyja'tzun kub' qximane tu'n qkyaj tene tuj tnam Atenas o'kx qeye,

²ex xi qsama'ne qerman Timoteo kyuk'ile tu'ntzun kykyuwsanjtze tu'n ex tu'n t-xi q'ot kynab'le tuj kyokslab'le, porke ate Timoteo ajb'el te Dios ex aq'nal quk'ile tu'n tpakb'anjtz tqanil kolb'il in tzaj tq'o'n Crist.

³Xi qsama'ne tu'n mi'n tel tzpet kynab'le tu'n tlaj ju yajb'il kyeye, ex ax qeye b'a'n kyu'ne qa il ti'j tu'n tik'x qu'n.

⁴Ex tej qtene kyuk'ile, b'i'x xi qma'ne kyeye qa il ti'j tu'n qyajlanjtz, ex kyja'tzun tten in b'aj qi'j, b'a'n jlu kyu'ne.

⁵Kyja'tzun tten, minti' ik'x tu'n nk'u'je kyi'je, xi nsama'ne Timoteo tu'n nb'inteye tza'n kytene tuj kyokslab'le, mya yajku o che oke tuj joyb'il kyi'je tu'n tajaw il, ex mya yajku noqx gan qaq'unb'ene.

⁶Ex tej tul meltz'aj Timoteo quk'ile tzaj tma'n tqanil b'a'n qa at kyokslab'le ex at kyk'ujlalile, ex qa kukx in qo tzaj kyna'ne in che tzalaje qi'je, kyajb'ile tu'n tok kyke'yine qwitze, ax ikx qeye qajb'ile tu'n tok qke'yine kywitze.

⁷Kyja'tzun erman, tej qtene tuj b'is ex tuj yajb'il qeye, o q'uqb'anjtz qk'u'je kyu'ne noq tu'nju wa'lqe'xixa tuj kyokslab'le;

⁸porke ja'lo ma tz'el qb'ise ex ma qe' qk'u'je tu'nju wa'lqe'xixe tuj kyokslab'le ti'j Qajaw.

⁹¿Alkyetzun tumel tu'n t-xi qq'o'ne chjonte te Dios kyi'je tu'nju nimxix in qo tzalaje kyu'ne twitz Dios?

¹⁰In qo na'ne Dios kyi'je q'ijl ex qonik'an, in qo kub'sane wen tu'n tok qke'yine kywitze ex tu'n t-xi qtz'aqsa'ne aju atx taj kyeye tuj kyokslab'le.

¹¹Awt Qman Dios tuk'ix Qajaw Jesucrist che'x ẍaqlunte qeye tuj qb'eye tu'n qpone kyuk'ile.

¹²Awt Qajaw q'onte t-xtalb'il kyeye tu'n kych'iye tu'n tten nim kyk'ujlalile kyxolxe ex kyuk'il kykyaqil xjal, ik tza'n qeye at-xix qk'ujlalile kyi'je.

¹³Awt Qajaw kyuwsante kynab'le ex tu'n kytene saq tuj kyanmiye ex minti' kypaltile twitz Qman Dios ok tul Qajaw Jesucrist kyuk'il kykyaqil okslal ti'j.