Read kumam 1 Tesalonicenses 4 Bible Online

1 Tesalonicenses 4 - kumam bible

1 Tesalonicenses 4

¹Ja'lotzun erman, qo kub'sale kywitze ex kxel qq'o'ne kynab'le tu'nju qmojb'ab'l qib' tuk'il Qajaw Jesús: Ik tza'n ju xnaq'tzb'il xi qq'o'ne kyeye tza'n tten tu'n kyb'ete twitz Dios ex tu'n ttzalaj Dios kyi'je, ikxtzun kyb'inchame ex tu'n tjapunxix kyu'ne.

²Ex b'i'maj kyu'ne aju xnaq'tzb'il xi qq'o'ne kyeye, aju tzaj tma'n Qajaw Jesús.

³Porke aju tajb'il Dios tu'n t-xi kyq'on kyib'e o'kx te Dios, ex tu'n mi'n kyb'inchanteye aj pajil.

⁴Teyle junjun kyeye tu'n tten tex t-xu'jil, atwit toklen t-xu'jil tuj twitz ex mi'n pon tk'u'j ti'j juntl,

⁵ex mya tu'n t-xi kytzoqpin kyib'e teju kyajb'ile mya b'a'n ik tza'n in kyb'incha'n txqantl xjal minti' ojtzqi'n Dios kyu'n.

⁶Ex mi'n kyb'inchaye jun mya b'a'n te kyermaniye ex mi'n che kub' kysb'u'ne, porke ate Qajaw ktzajel q'onte castiw ti'j tkyaqil jlu, ik tza'n o txi qma'ne kyeye ex o txi qchik'b'a'ne.

⁷Porke minti' ma qo txkonjtz tu'n Dios tu'n qb'inchante aju ttz'ilil, noq o'kx tu'n t-xi qq'on qib' o'kx te.

⁸Kyja'tzun alkye jun xjal nne'l tik'un ju yol lu, mya jun xjal nne'l tik'un, ate Dios nne'l tik'un, aju ma tzaj q'onte Xewb'aj Xjan qe.

⁹Mya il ti'j tu'n t-xi ntz'ib'ane kyeye tza'n tten tu'n kyk'ujlanteye kykyaqil erman, porke ax Dios ma xnaq'tzan kyeye tu'n kyk'ujlante kyib'e kyxolxe.

¹⁰Ax ikxtzun in kyb'incha'ne, at kyk'ujlalile kyi'j kykyaqil erman ate' tuj tx'otx' Macedonia. Pero qo kub'sale kywitze, erman, kukx tu'n tch'iy kyk'ujlalile,

¹¹ex tu'n tok tilil kyu'ne tu'n kyanq'ine tuj txub'txaj ex tu'n kyaq'nane ti'j kyaq'une, ex tu'n kyaq'nane tu'n kyq'ab'e, ik tza'nx xi qma'ne kyeye.

¹²Tu'ntzun kyxi nimane kyu'n xjal, ex tu'n kytene minti' atx taj kyeye.

¹³Ax ikx qajb'ile erman, tu'n tel kynik'e kyi'j qeju in che kyim, tu'n mi'n ttzaj kyb'ise ik tza'n qe txqantl xjal minti' jatum tu'n tok qe' kyk'u'j.

¹⁴Porke ma qoksla ju yol ti'j Jesús, ate Jesús o kyim ex jatz anq'in, ax ikxtzun qeju o che kyim okslal qe ti'j Jesús, che tzajel ti'n Dios junx tuk'il Jesús.

¹⁵Kyja'tzun kxel qma'ne jlu kyeye, aju tyol Qajaw: aqo' itz'x qo' ex ato'x ok tul Qajaw, mlay qo'x nej kywitz qeju otoq che kyim.

¹⁶Tu'nju axte Qajaw kb'eletz tuj kya'j, ktzajel tq'o'n orden, tuk'ix tnejel anjel ktzajel q'ajt, ex kq'ajtel ju chun te Dios. Ex qeju otoq che kyim okslal qe ti'j Crist ok che jawil anq'in nej.

¹⁷Lepchixtzun qo' aqo' itz'x qo' ato'x tzalu, qo jawil jub'cha'n junx kyuk'il tuj muj tu'n qk'lunte qib' tuk'il Qajaw tuj kyq'iq', kyja'tzun ax qo tel tuk'il Qajaw te jumajx.

¹⁸Kyja'tzun kyq'uqb'am kyk'u'je kyxolxe tu'nju yol lu.