Read kumam 1 Tesalonicenses 5 Bible Online

1 Tesalonicenses 5 - kumam bible

1 Tesalonicenses 5

¹Atzun ti'j tab'q'iyil ex ti'j tq'ijlalil, mya il ti'j tu'n t-xi ntz'ib'ane kyeye, erman,

²porke b'i'nxix kyu'ne aju tq'ijlalil ok tul Qajaw tzul ik tza'n jun eleq' nnu'l qonik'an.

³Ok kymante xjal: Minti' b'is, b'a'n ta' tkyaqil, che chilo, ex minab'en tzul castiw kyib'aj tu'n kynaj, ik tza'n jun xu'j at tuj k'ixk'oj ok nnu'l itz'j tal; ex mlay che tzoqpaj.

⁴Atzun kyeye erman, mlay jaw naj kynab'le tuj tq'ijlalil ok tul Qajaw, minab'en tzul ik tza'n nnu'l jun eleq', porke mya tuj qlolj ate'ye.

⁵Porke kykyaqile te spik'un qeye ex in che b'ete q'ijl; minti' qoklen tuk'il qonik'an ex tuk'il qlolj.

⁶Kyja'tzun, mi'n qo tan ik tza'n qe txqantl xjal, noq o'kx tu'n qxq'uqin ex tu'n tten qnab'l.

⁷Porke aqeju in che tan, te qonik'an in che tan, ex aqeju in che k'an q'e'n, te qonik'an in che k'an q'e'n.

⁸Atzun qe, tenx qnab'l porke in qo b'et q'ijl. Ex tenwt qokslab'l ex qk'ujlalil tu'n tok te kolb'il qe, ik tza'n jun soldad nno'k tq'o'n chikyet k'uxb'il ti'j tu'n tklet. Ex qe'k qk'u'j ti'j ju kolb'il qe tzul, ik tza'n jun soldad tjax tpasb'il k'uxb'il tu'n tklet twi'.

⁹Porke minti' kub' t-ximan Dios qi'j tu'n ttzaj tq'oj qi'j tu'n tkub' qsentens tu'n; noq o'kx kub' t-ximan tu'n qklet noq tu'n Qajaw Jesucrist.

¹⁰Porke o kyim Jesucrist tu'n tchjet qil tu'ntzun qanq'in junx tuk'il, qa itz'x qo' ex qa otoq qo kyim.

¹¹Kyja'tzun, kyq'om kynab'le kyxolxe ex kykyuwsam kynab'le kyxolxe, ik tza'nx in kyb'incha'ne ja'lo.

¹²Qo kub'sale kywitze, erman, kynimanxe qeju in che aq'nan kyxole ex nejenel qe kyxole tuj taq'un Qajaw, ex in kyq'o'n kynab'le,

¹³ex tu'n tten nimxix kyk'ujlalile kyi'j tu'nju in che aq'nan kyxole. Tenx kymojb'ab'l kyib'e kyxolxe.

¹⁴Ax ikx qo kub'sale kywitze erman, tu'n t-xi kyq'o'ne kynab'l qeju kyk'i' che aq'nan, ex tu'n t-xi kyq'uqb'a'ne kyk'u'j qeju ch'in kyk'u'j; ex che onine kyi'j qeju minti' kyipun, ex tenx kypasense kyi'j kykyaqil.

¹⁵Qa at jun mya b'a'n o b'inchanjtz kyi'je tu'n juntl, ten kykwente ti'j tu'n mi'n taj kyq'o'ne t-xel mya b'a'n; noq o'kx kukx tu'n kyb'inchanteye ju b'a'n kyxolxe ex kye kykyaqil xjal.

¹⁶Kukx che tzalaje.

¹⁷Mi'n che q'ajene tu'n kyna'ne Dios.

¹⁸Kyq'onxe chjonte ti'j tkyaqil, ex atzun tajb'il Dios jlu tu'n kyb'inchanteye, tu'nju okslal qeye ti'j Jesucrist.

¹⁹Mi'n kub' kyyuptz'a'ne ju Xewb'aj Xjan.

²⁰Mi'n tz'el kyik'une kyyol qe t-sanjel Dios.

²¹Kyke'yin b'aje tkyaqil, kytzyume aju b'a'n.

²²Kypa'mil kyib'e ti'j tkyaqil mya b'a'n.

²³Ex axte Dios aju q'ol qmojb'ab'l qib', axwit tz'el pa'n kyeye tu'n kyajb'ene o'kx te, ex awt kwentin kyeye tuk'ix kyxewe tuk'ix kyanmiye tuk'ix kyximlale, ex minti'wt kypaltile ok tul Qajaw Jesucrist.

²⁴Aju Dios ma txkon kyeye in japunxix tyol, ex ok tb'incha' tkyaqil jlu kyeye.

²⁵Erman, che na'ne Dios qi'je.

²⁶Kyq'onxe nq'olb'eb'le kye kykyaqil erman, ex kytz'ub'an el kywitze tu'n tkyaqil kyk'ujlalile.

²⁷Kxel nkyuwsa'ne kyeye twitz Qajaw tu'n tjaw sch'it ju u'j lu kywitz kykyaqil erman.

²⁸Aju t-xtalb'il Qajaw Jesucrist tenwt kyuk'ile. Ikxwitju.