Read kumam Josué 13 Bible Online

Josué 13 - kumam bible

Josué 13

¹Tej ttijin Josué tzaj tma'n Qman te: Ma tijina ex atx nim tx'otx' na'nx ttzyet.

²Ex atzun qe tx'otx' na'nx ttzyet kyu'ne jlu: Tkyaqil kytx'otx' aj Filisteo ex kytx'otx' aj Gesureo,

³xi'yin qe' ttzi nima Sihor tuj tumlal tjawitz q'ij te Egipto, ex ponin b'aj max tuj tmojonil tnam Ecrón tuj tb'anq'ab' q'ij, aju kytx'otx' aj Canaán; ex tuj tx'otx' lu at jwe' nejenel aj Filisteo, nejenel qe kyuj qe tnam lu: Gaza, Asdod, Ascalón, Gat ex Ecrón. Ax ikx na'nx ttzyet tx'otx' kye aj Aveo

⁴tuj tumlal tnayaj q'ij, ex tkyaqil kytx'otx' aj Canaán xi'yinx kyuj tnam kye aj Sidón ex ponin b'aj max tuj lugar Afec tb'i, tuj tmojonil kytx'otx' aj Amorreo.

⁵Na'nx ttzyet kytx'otx' aj Giblit ex tkyaqil tx'otx' Líbano tuj tumlal tjawitz q'ij, xi'yinx tuj Baal-gad t-xe witz Hermón ex ponin b'aj max ttxlaj tnam Hamat.

⁶Che elex nlajo'ne kywitz aj Israel qe xjal aj Sidón ex kykyaqil qeju najlqe kyuj tiwitz tx'otx', tzajnix twi witz Líbano ex ponin b'aj max tuj lugar Misrefot-maim. Atzun teya, sipan kub'a tx'otx' ex q'onxa te kyetzb'il aj Israel ik tza'nx o txi nma'ne teya.

⁷Sipan kub'a tx'otx' kyxol b'elaj k'loj kyiyjil aj Israel kyuk'ix mijtl tiyjil Manasés.

⁸Qe tiyjil Rubén ex qe tiyjil Gad, kyuk'ix mij tiyjil Manasés o kyk'am kyetzb'il tej t-xi tq'o'n Moisés kytx'otx' tuj tumlal tjawitz q'ij te nima Jordán.

⁹Aju tx'otx' ok te kyetzb'il, xi'yinx qe' tuj tnam Aroer aju tkub' ttzi tq'ab' xaq Arnón, tuk'ixju tnam tkub' tuj tmij chq'ajlaj, ex tkyaqil chq'ajlaj te tnam Medeba, ponin b'aj max jatum ta' tnam Dibón,

¹⁰kyuk'ix kykyaqil tnam te Sehón aju rey kye aj Amorreo, aju in kawintoq tuj tnam Hesbón, ex ponin b'aj max ti'j tmojonil kytx'otx' aj Amón.

¹¹Ax ikx ok te kye aju tx'otx' Galaad, tuk'ix kytx'otx' aj Gesureo, tuk'ix kytx'otx' aj Maaca, tuk'ix witz Hermón, tuk'ix tkyaqil tx'otx' Basán, ponin b'aj max tuj tnam Salca,

¹²ex tuk'ix tkyaqil tx'otx' tkyajsa'ntoq tjaq' tkawb'il Og aju rey te Basán, aju mankb'il kyiyjil aj Refait ex in kawintoq tuj tnam Astarot ex tuj tnam Edrei. Otoq kub' kyi'j kykyaqil jlu tu'n Moisés ex otoq che ex tlajo'n tuj lugar lu.

¹³Atzun qe xjal aj Gesur ex aj Maaca minti' e je'x lajo'n tuj tx'otx' lu, noq o'kx ax e kyaj ten tu'n kynajan kyxol aj Israel ex ax ate' ja'lo.

¹⁴Minti' xi tq'o'n Moisés kyetzb'il tiyjil Leví, porke te kye tu'n kyok qe oyaj in che kub' patit te jun nimb'il te Qman Dios, ik tza'nx otoq tma Qman kye.

¹⁵Kub' t-sipan Moisés tx'otx' kyxol tiyjil Rubén ik tza'nx kyb'aj junjun k'loj kyiyjil.

¹⁶Kyja'tzun, aju kytx'otx' tzaj qe' max tuj tnam Aroer ttzi tq'ab' xaq Arnón, jawnix tuj tnam tkub' tuj tmij chq'ajlaj ex jawnix tuj tnam Medeba,

¹⁷ex pon b'aj max tuj tnam Hesbón ex kyuj kykyaqil tnam ate' tuj chq'ajlaj, ex atzun qe tnam jlu: Dibón, Bamot-baal, Bet-baal-meón,

¹⁸Jahaza, Cademot, Mefaat,

¹⁹Quiriataim, Sibma, Zaret-sahar aju tkub'sa'n twi tal witz tuj chq'ajlaj,

²⁰Bet-peor, Bet-jesimot, tuk'ixju tx'otx' tok tk'u'j witz Pisga,

²¹qe tnam ate' tuj chq'ajlaj ex tkyaqil tx'otx' jatum otoq kawin Sehón aju rey kye aj Amorreo, aju najltoq tuj tnam Hesbón. Tu'n Moisés otoq kub' ti'j Sehón ex kyi'j qe nejenel kye aj Madián, aqeju in che ajb'entoq te Sehón, ex atzun qe jlu: Evi, Requem, Zur, Hur, ex Reba.

²²Ax ikx kub' kyb'yo'n aj Israel Balaam aju b'a'n q'ijin, aju tky'ajal Beor, ex nimku txqantl.

²³Aju kytx'otx' qe tiyjil Rubén aju kub' sipan kyxol ik tza'nx kyajlal junjun k'loj kyiyjil, atzun kykyaqil qe tnam lu, kyuk'ix qe ky-aldey, ex ponin b'aj max ttzi nima Jordán.

²⁴Ax ikx kub' t-sipan Moisés tx'otx' kyxol qe tiyjil Gad ik tza'nx kyajlal junjun k'loj kyiyjil.

²⁵Aju tnam Jazer kyuk'ix kykyaqil tnam ate' tuj Galaad ok te kye, tuk'ix mij kytx'otx' aj Amón, ponin b'aj max jatum ta' tnam Aroer aju tkub'sa'n twitz tnam Rabá,

²⁶tuk'ix tx'otx' tkub'sa'n t-xol tnam Hesbón, tuk'il tnam Ramat-mizpa, tuk'ix tnam Betonim ex tuk'ix tx'otx' tkub'sa'n t-xol tnam Mahanaim tuk'il tmojonil tnam Debir.

²⁷Atzun qe tnam ate' tuj chq'ajlaj aqeju e ok te kye, atzun qe jlu: Bet-aram, Bet-nimra, Sucot ex Zafón; aqeju ate'toq tjaq' tkawb'il Sehón aju rey te Hesbón. Kyja'tzun aju kytx'otx' aj Gad xi'ynix tuj tjawitz q'ij te nima Jordán, ponin b'aj max ttzi lagun Cineret.

²⁸Atzun qe tnam lu kyuk'ix qe ky-aldey ate' kyi'jele e ok te kye qe tiyjil Gad, ik tza'nx kyajlal junjun k'loj kyiyjil.

²⁹Ax ikx xi tq'o'n Moisés kytx'otx' mij tiyjil Manasés; kub' t-sipan ik tza'n kyajlal junjun k'loj kyiyjil.

³⁰Ok te kye tkyaqil tx'otx' tzyu'ntoq tu'n Og aju rey te Basán, tkyaqil tx'otx' xi'ynix jatum ta' tnam Mahanaim, kyuk'ix 60 tnam otoq kub' kyi'j tu'n Jair,

³¹tuk'ix mij tx'otx' Galaad, kyuk'ix qe tnam Astarot ex Edrei jatum in kawintoq Og aju rey te Basán. Tkyaqil jlu ok kye mij tiyjil Maquir aju tky'ajal Manasés, ik tza'n kyajlal junjun k'loj kyiyjil.

³²Atzun tx'otx' lu xi tq'o'n Moisés te kyetzb'il tej ate'toq tuj tchq'ajlajil tx'otx' Moab, tuj tumlal tjawitz q'ij te nima Jordán, aju tkub' twitz tnam Jericó.

³³Atzun kye qe tiyjil Leví minti' xi tq'o'n Moisés tx'otx' te kyetzb'il, noq o'kx o tma: Ate Qman aju Kydios aj Israel, atzun kyetzb'il.