Read kumam Josué 14 Bible Online

Josué 14 - kumam bible

Josué 14

¹Atzun tx'otx' lu kyk'am aj Israel te kyetzb'il tuj tx'otx' Canaán, ik tza'nx xi q'o'n kye tu'n pal Eleazar, tuk'ix Josué aju tky'ajal Nun, kyuk'ix qe nejenel kye junjun k'loj kyiyjil aj Israel.

²Tu'n swert kub' sipan tx'otx' kyxol b'elaj tuk' mij k'loj kyiyjil aj Israel, ik tza'nx otoq tma Qman te Moisés tu'n tb'ant tu'n.

³Otoq txi tq'o'n Moisés tx'otx' taj jlajxi nima Jordán kye tiyjil Rubén, kye tiyjil Gad ex kye mij tiyjil Manasés; atzun kye aj Leví minti' xi tq'o'n kytx'otx'.

⁴Qe tiyjil José te kab'e k'loj e el, jun ti'j tiyjil Manasés ex juntl ti'j tiyjil Efraín, atzun kye aj Leví minti' jun piẍ kytx'otx' kyk'am, noq o'kx o kyk'am qe tnam jatum tu'n kynajan, kyuk'ix qe kojb'il ate' kyi'jele, tu'ntzun kyten qe kywakẍ kyuj, kyuk'ix qe kyẍne'l.

⁵Atzun kye aj Israel o b'ant kyu'n tu'n tb'aj sipet tx'otx' ik tza'nx otoq tma Qman te Moisés.

⁶Qe tiyjil Judá e je'x tuj Gilgal tu'n kyyolin tuk'il Josué, ex atzunte Caleb aju aj Ceneseo, aju tky'ajal Jefone, xi tma'n te Josué: B'a'n tu'na aju tzaj tma'n Qman te Moisés aju tmajen tuj lugar Cades-barnea, aju o tma ti'ja ex wi'je.

⁷Otoq chin japune twi' 40 ab'q'i tej ntzaj sama'ne tu'n Moisés max tuj lugar Cades-barnea ke'yilte tx'otx' Canaán, ex tej npon meltz'aje, xi nma'ne te axix tok ti'j tkyaqilju otoq wile.

⁸Atzun qeju e tzaj wuk'ile, tzaj b'aj kyk'u'j tnam xjal tu'n kyyol, atzun weye o japun wu'ne aju tajb'il Qman aju Ndiose.

⁹Tzajtzun tma'n Moisés jun yol axix tok weye kyja': Aju tx'otx' jatum ma kub' aj tqana tib'aj, k'okel te teya te jumajx ex te kye qe tiyjila, porke ma japun tu'na aju tajb'il Qman aju Ndiose.

¹⁰Ma b'ajxi 45 ab'q'i ttzajlen tma'n Qman jlu te Moisés, atxix tej ate'xtoq qe aj Israel tuj lugar tzqij tx'otx', ex tu'n Dios, lu itz'x qine ik tza'nxju yol tzaj ttziyan. Ja'lo ma chin japune twi' 85 ab'q'i,

¹¹ex atx wipune ik tza'nx tej ntzaj sama'ne tu'n Moisés ke'yilte tx'otx' Canaán; atx wipune tu'n nb'ete ex tu'n nq'ojine ik tza'nx ojtxi.

¹²Kyja'tzun in xi nqanine teya ja'lo tu'n ttzaj tq'o'na weye tiwitz tx'otx' aju tzaj ttziyan Qman weye. Atxix ojtxi b'a'n tu'na, qe tiyjil nintz xjal Anac najlqe ma chixin, ex nmaq qe kytanmi ex tok muro kyi'j. Ex awt Qman ten wuk'ile ex onin weye tu'n kyex nlajo'ne ik tza'nx o tma, chi Caleb.

¹³Kub'tzun ky'iwla'n Caleb aju tky'ajal Jefone tu'n Josué, ex xi tq'o'n tnam Hebrón tu'n tok te te.

¹⁴Kyja'tzun ok tnam Hebrón te te Caleb aju tky'ajal Jefone, aju aj Ceneceo, ex ttenx ja'lo porke o japun tu'n Caleb aju tajb'il Qman, aju Kydios aj Israel.

¹⁵Aju tb'i tnam Hebrón toktoq nej Quiriat-arba,[3] ex Arba atzun tb'i jun xinaq ma'xix toklen kyxol qe tiyjil nintz xjal Anac. Te tib'ajxi jlu o we' q'oj ex o kyaj ten tnam xjal tuj txub'txaj.