Read kumam Josué 15 Bible Online

Josué 15 - kumam bible

Josué 15

¹Aju tx'otx' ok te kye tiyjil Judá tej tjaw swert ti'j ik tza'nx kyajlal teyle junjun k'loj kyiyjil, pon b'aj max tmojonil kytx'otx' aj Edom, atzun tuj tnayaj q'ij pon b'aj max tuj tzqij tx'otx' Zin;

²aju mojón tumlal tnayaj q'ij, atzun in xi qe' max ttxa'n mar at nim atz'an tuj,

³xi'yintl tu'n tjax twitz jawl Acrabim, exni tuj tzqij tx'otx' Zin, exni tuj chq'ajlaj Cades-barnea, xi'yintl tu'n tpon max tuj Hezrón, jawinx max tuj Adar, in q'o'n welt max tuj lugar Carca,

⁴ex atzun ik'ni tu'n tpon max tuj lugar Asmón, tu'n tex ttzi tq'ab' xaq te Egipto, ex japun b'aj ttzi Nintz mar. Atzunju mojón lu tuj tnayaj q'ij.

⁵Aju tmojonil tuj tjawitz q'ij, atzun mar at nim atz'an tuj, ex ponin b'aj max jatum nno'kx nima Jordán tuj mar at nim atz'an tuj. Ex atzun tzajni qe' tmojonil tuj tb'anq'ab' q'ij:

⁶Jawnix tuj lugar Bet-hogla, ik'ni twi tx'otx' Bet-arabá, ik'ni tu'n tpon jatum ta' pik Bohán, (ate Bohán tky'ajal Rubén),

⁷jawnix tuj chq'ajlaj Acor tu'n tpon tuj tnam Debir, ex atzun kub'intz tuj Gilgal, tkub'sa'n twitz jawl Adumín, tku'tz ma t-xe tq'ab' xaq, ex ik'intl mojón jatum ta' twi a' En-semes, xi'yni tu'n tpon max tuj lugar En-rogel;

⁸ex ik'ni tuj chq'ajlaj Ben-hinom, t-xe twitz jawl Jebús ex qa Jerusalén, ex jawnix twi witz aju tkub'sa'n tuj telex q'ij te chq'ajlaj Hinom ex tuj tb'anq'ab' q'ij te chq'ajlaj Refaim,

⁹tu'ntzun tq'on welt twi witz, ex tu'n tpon max jatum ta' twi a' Neftoa, ex tu'n tpon max kyuj qe tnam ate' twi witz Efrón, ik'ni tuj tnam Baala ex ax juntl tb'i Quiriat-jearim.

¹⁰Atzun in meltz'aj mojón tuj telex q'ij te tnam Baala tu'n tpon max twi witz Seir, ex elnix tuj tb'anq'ab' q'ij twi witz Queslón aju ax juntl tb'i Jearim, tu'ntzun tkub'il max tuj tnam Bet-semes, ex tu'n tik' tuj tnam Timna,

¹¹ex elnix tuj tb'anq'ab' q'ij twitz jawl te tnam Ecrón, ex elnix twi witz Baala, tu'n tex tuj lugar Jabneel, tu'ntzun tpon b'aj ttzi Nintz mar.

¹²Ate Nintz mar ok te mojón tuj telex q'ij. Atzun qe mojón lu ti'j etzb'il o kyk'am qe tiyjil Judá, ex kub' sipan kyxol junjun k'loj kyiyjil.

¹³Xi tq'o'n Josué te Caleb aju tky'ajal Jefone jun piẍ tx'otx' ti'j kytx'otx' qe tiyjil Judá, ik tza'nx otoq tma Qman te Josué. Xi tq'o'n aju tnam Quiriat-arba aju ax juntl tb'i Hebrón. Ate Arba t-xe'chel Anac.

¹⁴Atzun e ex tlajo'n Caleb ox tiyjil Anac, ex atzun kyb'i jlu: Sesai, Ahimán ex Talmai.

¹⁵Te tib'ajxi xi' q'ojlel kyi'j qe xjal najlqe tuj tnam Debir, aju Quiriat-sefer tb'i nej.

¹⁶Ex tma Caleb: Alkye jun ma tz'ok tzoqpaj ti'j tnam lu, ex qa ma kub' ti'j tu'n, jaku txi nq'o'ne nme'jele Acsa te tu'n tok te t-xu'jil.

¹⁷Tzyet tnam lu tu'n Otoniel aju tky'ajal Cenes, aju ax terman Caleb, ex xi tq'o'n Caleb Acsa te, aju tme'jel, tu'n tok te t-xu'jil.

¹⁸Tej otoq b'ant tten Acsa tu'n t-xi' tuk'il Otoniel, xi tma'n Otoniel te tu'n t-xi tqanin te tman jun piẍ tx'otx' te kojb'il. Ku'tztzun Acsa tib'aj bur ex xi tqanin Caleb te: —¿Ti taja?

¹⁹—Wajb'ile tu'n t-xi nqanine jun xtalb'il teya. Yake ma tzaj tq'o'na weye aju tzqij tx'otx' tuj lugar Néguev, ax ikx q'ontza qe twi a' weye, chi Acsa, xi ttzaq'we'n. Xitzun tq'o'n Caleb qe twi a' te jawni ex qe twi a' te kub'ni te.

²⁰Atzun kyetzb'il qe tiyjil Judá jlu, aju kub' sipan kyxol teyle junjun k'loj kyiyjil.

²¹Aqeju tnam e ok te kye tuj tx'otx' Néguev, ponin max tuj tmojonil kytx'otx' aj Edom, atzun qe jlu: Cabseel, Edar, Jagur,

²²Cina, Dimona, Adada,

²³Cedes, Hazor, Itnán,

²⁴Zif, Telem, Bealot,

²⁵Hazor-hadata, Queriot, Hezrón (aju ax juntl tb'i Hazor),

²⁶Amam, Sema, Molada,

²⁷Hazar-gada, Hesmón, Bet-pelet

²⁸Hazar-sual, Beerseba, Bizotia,

²⁹Baala, Iim, Esem,

³⁰Eltolad, Quesil, Horma,

³¹Siclag, Madmana, Sansana,

³²Lebaot, Silhim, Aín ex Rimón. O japun 29 tnam tu'n tkyaqilx, kyuk'ix qe aldey ate' kyi'jele.

³³Atzun tuj chq'ajlaj, atzun qe tnam jlu e ok te kye: Estaol, Zora, Asena,

³⁴Zanoa, En-ganim, Tapúa, Enam,

³⁵Jarmut, Adulam, Soco, Azeca,

³⁶Saaraim, Aditaim, Gedera ex Gederotaim; kyajlaj tnam tu'n tkyaqilx, kyuk'ix qe aldey ate' kyi'jele.

³⁷Ex qe tnam Zenán, Hadasa, Migdal-gad,

³⁸Dileán, Mizpa, Jocteel,

³⁹Laquis, Boscat, Eglón,

⁴⁰Cabón, Lahmam, Quitlis,

⁴¹Gederot, Bet-dagón, Naama ex Maceda; qaqlaj tnam tu'n tkyaqilx, kyuk'ix qe aldey ate' kyi'jele.

⁴²Ex qe tnam Libna, Eter, Asán,

⁴³Jifta, Asena, Nezib,

⁴⁴Keila, Aczib ex Maresa; b'elaj tnam tu'n tkyaqilx, kyuk'ix qe aldey ate' kyi'jele.

⁴⁵Ax ikx tnam Ecrón, kyuk'ix qe taldey ex txqantl tal lugar ate' ti'jele.

⁴⁶Xi'yinx tuj tnam Ecrón ex ponin b'aj max ttzi Nintz mar, tkyaqil tx'otx' tok niqayin ti'j tnam Asdod, junx kyuk'il qe taldey.

⁴⁷Ax ikx tnam Asdod, kyuk'ix qe taldey ex qe txqantl lugar ate' ti'jele, ex tnam Gaza, kyuk'ix qe taldey ex qe txqantl lugar ate' ti'jele, ku'pun b'aj max ttzi tq'ab' xaq te Egipto ex ponin b'aj ttzi Nintz mar.

⁴⁸Tuj tiwitz tx'otx', atzun qe tnam lu e ok te kye aj Judá: Samir, Jatir, Soco,

⁴⁹Dana, Quiriat-sana (aju ax juntl tb'i Debir),

⁵⁰Anab, Estemoa, Anim,

⁵¹Gosén, Holón ex Gilo; junlaj tnam tu'n tkyaqilx, kyuk'ix qe aldey ate' kyi'jele.

⁵²Ex qe tnam Arab, Duma, Esán

⁵³Janum, Bet-tapúa, Afeca,

⁵⁴Humta, Quiriat-arba, (aju ax juntl tb'i Hebrón) ex Sior; b'elaj tnam tu'n tkyaqilx, kyuk'ix qe aldey ate' kyi'jele.

⁵⁵Ex qe tnam Maón, Carmel, Zif, Juta,

⁵⁶Jezreel, Jocdeam, Zanoa,

⁵⁷Caín, Gabaa ex Timna; laj tnam tu'n tkyaqilx, kyuk'ix qe aldey ate' kyi'jele.

⁵⁸Ex qe tnam Halhul, Bet-sur, Gerdor,

⁵⁹Maarat, Bet-anot ex Eltecón; qaq tnam tu'n tkyaqilx, kyuk'ix qe aldey ate' kyi'jele.

⁶⁰Qe tnam Quiriat-baal aju ax juntl tb'i Quiriat-jearim, ex tnam Rabá, kyuk'ix qe aldey ate' kyi'jele.

⁶¹Tuj lugar tzqij tx'otx', atzun qe tnam lu e ok te kye: Bet-arabá, Midín, Secaca,

⁶²Nibsán, aju tnam at nim atz'an tuj, ex En-gadi; qaq tnam tu'n tkyaqilx, kyuk'ix qe aldey ate' kyi'jele.

⁶³Qe tiyjil Judá minti' e xkye' tu'n kyex kylajo'n qe xjal aj Jebuseo aqeju najl tuj Jerusalén, kyja'tzun ax najlqe aj Jebuseo ja'lo tuj Jerusalén junx kyuk'il qe tiyjil Judá.