Read kumam Josué 16 Bible Online

Josué 16 - kumam bible

Josué 16

¹Aju tx'otx' ok te kye qe tiyjil José ik tza'nx swert jaw; aju tmojonil kytx'otx' tuj tjawitz q'ij, atzun in tzaj qe' ttzi nima Jordán tumlal qe twi a' te Jericó, ex atzun xi'yintl tu'n tpon max tuj tzqij tx'otx', ex jawinx tuj Jericó tu'n tjapun tuj tiwitz tx'otx' Betel.

²Ik'nitl tuj Betel (aju ax juntl tb'i Luz), atzun exni tuj kytx'otx' aj Arquita tu'n tpon max tuj tnam Atarot;

³ex xi'yintl tuj telex q'ij tu'n tex tuj kytx'otx' aj Jafleteo, elnix tuj tnam Bet-horón aju tku'tz kub'ni, elnix tuj tnam Gezer, ex atzun xi'yni tu'n tpon b'aj max ttzi Nintz mar.

⁴Atzunju etzb'il o kyk'am qe tiyjil Manasés ex tiyjil Efraín, aqeju tiyjil José.

⁵Aju tmojonil kytx'otx' tiyjil Efraín tuj tjawitz q'ij xi q'o'n kye ik tza'nx tajlal junjun k'loj kyiyjil, atzun xi'yni qe' tuj lugar Atarot-adar, ponin max tuj tnam Bet-horón te jawni,

⁶ex atzun xi'yni tu'n tpon max ttzi Nintz mar. Aju tmojonil kytx'otx' tuj tb'anq'ab' q'ij, atzun ponin b'aj tuj lugar Micmetat ex kub'intztl tmojonil tuj tjawitz q'ij, ponin b'aj max tuj lugar Taanat-silo, tu'ntzun tik' tuj lugar Janoa,

⁷tu'n tkub'il tuj lugar Atarot ex Naarat ex tu'n tokx tuj Jericó tu'n tpon b'aj ttzi nima Jordán.

⁸Ax ikx aju tmojonil te jawni, xi'ynix tuj tnam Tapúa, elnix tuj telex q'ij ex ponin b'aj ttzi tq'ab' xaq Caná ex ttzi Nintz mar. Atzunju tx'otx' lu ok te kye tiyjil Efraín, ex kub' sipan kyxol teyle junjun k'loj kyiyjil.

⁹Ex at junjun tnam ex aldey ate' tuj kytx'otx' tiyjil Manasés e ok te kye tiyjil Efraín.

¹⁰Ex minti' e ex kylajo'n qe tiyjil Efraín qe aj Canaán aqeju najl tuj tnam Gezer, noq o'kx ax e kyaj kyq'o'n tu'n kynajan kyxol, ex e ok kyq'o'n te kymajen tu'n kyb'inchante aq'untl kyuwxix. Ax ikx ja'lo ax najl qe aj Canaán kyxol.