Read kumam Josué 18 Bible Online

Josué 18 - kumam bible

Josué 18

¹Kykyaqil tnam xjal aj Israel ok kychmon kyib' tuj Silo tu'ntzun tkub' kyq'o'n ja xb'alun te mojb'ab'l tib'il tuk'il Dios. Maske otoq tzyet tkyaqil tx'otx',

²ex atxtoq wuq k'loj kyiyjil aj Israel na'nxtoq txi q'o'n kytx'otx'.

³Xitzun tma'n Josué kye aj Israel: ¿Tiqu'n na'nx kyxi'ye k'molte tx'otx' te kyetzb'ile, aju ma tzaj tq'o'n Qman kyeye, aju Kydios qtzan kyxe'chele?

⁴Kysk'on jawe ox xinaq kyxol teyle junjun k'loj kyiyjile, tu'ntzun kyxi nsama'ne tu'n tb'aj kyb'etin tkyaqil tx'otx', ex tu'n ttzaj kyi'n jun tqanil wuk'ile tza'n tten tu'n tkub' sipet.

⁵Ex atzun qe xinaq lu che b'el pa'nte tx'otx' tu'n tel te wuq piẍ, ex mi'n tz'ok kyyukun kytx'otx' tiyjil Judá at tuj tnayaj q'ij ex ju kytx'otx' qe tiyjil José at tuj tb'anq'ab' q'ij.

⁶Tb'ajlenxitzun kypa'n tx'otx' te wuq piẍ, ktzajel kyi'n jun tajlal wuk'ile, ex oktzun kjawil wi'ne swert ti'j twitz Qman Dios.

⁷Atzun kye aj Leví misikyer jun piẍ tx'otx' kxel q'ot kye, porke aju kyoklen te pal tu'n kyajb'en te Qman, atzunju kyetzb'il. Atzun qe tiyjil Gad ex qe tiyjil Rubén, kyuk'ix mij tiyjil Manasés, ya o kyk'am kyetzb'il tuj tx'otx' tuj tjawitz q'ij te nima Jordán, aju xi q'o'n kye tu'n Moisés aju tmajen Qman, chi Josué xi tma'n.

⁸Tej tb'ant kyten tu'n kyxi' qeju attoq kyjawil q'inte tajlal ti'j tx'otx', xi tma'n Josué kye: Kyxi'ye tuj tkyaqil tx'otx' ex kypa'n b'aje, ex oktzun tb'aj b'ant kyu'ne, b'ix che aj meltz'aje, tu'ntzun tjaw wi'ne swert ti'j twitz Qman tzalu tuj Silo.

⁹E je'xtzun qe xinaq lu ex b'aj kyb'etin tkyaqil tx'otx'; b'aj kypa'n qe tnam te wuq k'loj ex kub' kytz'ib'an tkyaqil. Te tib'ajxi e ajtz meltz'aj tu'n kyul tuj campament tuj Silo, jatum ta'toq Josué.

¹⁰Jaw ti'n Josué swert twitz Qman tuj lugar Silo ex kub' t-sipan tx'otx' kyxol aj Israel.

¹¹Tej tjaw swert kyi'j tiyjil Benjamín, aju kytx'otx' o kyk'am atzun aju tkub' t-xol kytx'otx' kyiyjil Judá tuk'il kytx'otx' qe tiyjil José.

¹²Aju tmojonil tx'otx' lu, atzun in tzaj qe' ttzi nima Jordán tuj tb'anq'ab' q'ij te tnam Jericó, xi'yni tuj telex q'ij tu'n tpon tuj tiwitz tx'otx', ex elnix tu'n te'l tuj tzqij tx'otx' Bet-avén.

¹³Ex atzun xi'yintl tuj tnayaj q'ij tu'n tpon tuj tnam Luz ex qa Betel, ex kub'inx tu'n tpon max tuj lugar Atarot-adar twi witz tuj tnayaj q'ij te tnam Bet-horón te kub'ni;

¹⁴ex atzun in meltz'aj mojón tu'n te'l tumlal telex q'ij ti'j tk'u'j witz, aju tkub'sa'n tuj tnayaj q'ij twitz tnam Bet-horón, tu'n tpon b'aj max tuj tnam Quiriat-baal aju ax juntl tb'i Quiriat-jearim, aju etzan kyu'n qe tiyjil Judá. Atzunju mojón lu tuj telex q'ij.

¹⁵Aju mojón tuj tnayaj q'ij, atzun okintz ttxa'n tnam Quiriat-jearim tuj telex q'ij, tu'n tul jatum ta' twi a' Neftoa,

¹⁶ex in kub'il max ttxa'npun witz aju tkub'sa'n tumlal twitz chq'ajlaj Ben-hinom, tuj tb'anq'ab' q'ij te chq'ajlaj Refaim. Te tib'ajxi in kub'il tuj chq'ajlaj Hinom, ik'nitl tuj tnayaj q'ij kub'ni teju witz te tnam Jebús, ex atzun xi'yintl tu'n tpon max jatum ta' twi a' En-rogel.

¹⁷Ik'nitl tu'n tjax tuj tb'anq'ab' q'ij tu'n tpon tuj lugar En-semes, ex atzun xi'yintl tu'n tpon max tuj lugar Gelilot aju tkub'sa'n tumlal witz Adumín, ex in kub'il max jatum ta' ju pik te Bohán (ate Bohán tky'ajal Rubén);

¹⁸ex ik'ni te jawni te twitz jawl aju tkub'sa'n tumlal twitz chq'ajlaj Jordán, ex in kub'il max ttzi nima Jordán,

¹⁹ex ik'ni tuj tiwitz tx'otx' te tnam Bet-hogla, tu'n tpon b'aj max jatum ponin b'aj mar at nim atz'an tuj, ex jatum in pon nima Jordán tujx mar lu. Atzun mojón lu tuj tnayaj q'ij.

²⁰Aju nima Jordán, atzun mojón tuj tjawitz q'ij. Atzun qe mojón lu te tx'otx' kub' sipan kyxol teyle junjun k'loj tiyjil Benjamín.

²¹Qe tnam e ok te kye teyle junjun k'loj tiyjil Benjamín, atzun qe jlu: Jericó, Bet-hogla, Emec-casis,

²²Bet-arabá, Zemaraim, Bet-el,

²³Avim, Pará, Ofra,

²⁴Quefar-haamoni, Ofni ex Geba; kab'laj tnam kyuk'ix qe aldey ate' kyi'jele.

²⁵Ax ikx at txqantl tnam, ex atzun qe jlu: Gabaón, Ramá, Beerot,

²⁶Mizpa, Cafira, Mozah,

²⁷Requem, Irpeel, Tarala,

²⁸Zela, Elef, Jebús ex qa Jerusalén, Gabaa, ex Quiriat; kyajlaj tnam kyuk'ix qe aldey ate' kyi'jele. Atzun tx'otx' lu ok te kye teyle junjun k'loj tiyjil Benjamín.