Read kumam Josué 19 Bible Online

Josué 19 - kumam bible

Josué 19

¹Aju tkab'in piẍ tx'otx' jaw swert ti'j, atzun ok te kye teyle junjun k'loj tiyjil Simeón. Aju tx'otx' lu atzun ta' tuj kytx'otx' qe tiyjil Judá,

²ex aqeju tnam e kyaj ten tuj kykwent, atzun qe jlu: Beerseba, Seba, Molada,

³Hazar-sual, Bala, Ezem,

⁴Eltolad, Betul, Horma,

⁵Siclag, Bet-marcabot, Hazar-susa,

⁶Bet-lebaot ex tuk'ix Saruhén; oxlaj tnam tu'n tkyaqilx ex kyuk'ix qe aldey ate' kyi'jele.

⁷Ax ikx ok te kye aqeju tnam Aín, Rimón, Eter ex Asán; kyaje tnam kyuk'ix qe aldey ate' kyi'jele,

⁸ex kyuk'ix qe aldey ate' max tuj Baalat-beer, aju ax juntl tb'i Ramat aju at tuj tx'otx' Néguev. Atzun tx'otx' lu ok te kye teyle junjun k'loj tiyjil Simeón.

⁹Aju kyetzb'il qe tiyjil Simeón atzun ta' tuj kytx'otx' qe tiyjil Judá, porke qe tiyjil Judá nim tx'otx' otoq txi q'o'n kye. Tu'ntzunju, xi q'o'n kyetzb'il qe tiyjil Simeón ti'jx tx'otx' aju otoq txi q'o'n kye tiyjil Judá.

¹⁰Aju toxin piẍ tx'otx' jaw swert ti'j, atzun ok te kye teyle junjun k'loj tiyjil Zabulón. Aju tmojonil kytx'otx' ponin max tuj lugar Sarid tb'i,

¹¹xi'yintl tuj telex q'ij tu'n tpon max tuj lugar Marala ex ik'nitl tu'n tpon tuj lugar Dabeset, tu'ntzun tpon b'aj ttzi tq'ab' xaq tkub'sa'n tumlal tnam Jocneam.

¹²Aju mojón xi'yin tuj lugar Sarid kyja' in xi' tuj tjawitz q'ij tu'n tpon max tuj lugar Quislot-tabor, ex atzun nnik' tuj lugar Daberat ex jawnix tu'n tjapun tuj lugar Jafía.

¹³Ex atzun xi'yintl mojón tuj tjawitz q'ij te lugar Gat-hefer, ik'ni tuj lugar Ita-cazín tb'i, ponin max tuj tnam Rimón, ex atzun in q'on welt tuj lugar Nea.

¹⁴Aju tmojonil tuj tb'anq'ab' q'ij, atzun in q'on welt max tuj lugar Hanatón, ex atzun nno'kpun b'aj tuj tchq'ajlajil tx'otx' Jefte-el.

¹⁵Attoq kab'laj tnam tuj tx'otx' lu, kyuk'ix qe aldey ate' kyi'jele, kyvesin kyib' kyuk'il, ex ajun qe tnam lu ate' kyxol: Catat, Naalal, Simrón, Idala ex Belén.

¹⁶Atzun tx'otx' lu ok te kye teyle junjun k'loj tiyjil Zabulón, kyuk'ix qe tnam ate' kyuj ex kyuk'ix qe aldey ate' kyi'jele.

¹⁷Aju tkyajin piẍ tx'otx' jaw swert ti'j, atzunju ok te kye teyle junjun k'loj tiyjil Isacar,

¹⁸ex qe tnam ate' tuj kytx'otx', atzun qe jlu: Jezreel, Quesulot, Sunem,

¹⁹Hafaraim, Sihón, Anaharat,

²⁰Rabit, Quisión, Abez,

²¹Remet, En-ganim, En-hada ex Bet-pases.

²²Aju tmojonil kytx'otx' ponin max tuj tnam Tabor, tuj tnam Sahazima, tuj tnam Bet-semes, ex atzun ponin b'aj ttzi nima Jordán; qaqlaj tnam tu'n tkyaqilx, ex kyuk'ix qe aldey ate' kyi'jele.

²³Atzun tx'otx' lu ok te kye teyle junjun k'loj tiyjil Isacar, kyuk'ix qe tnam ate' tuj ex kyuk'ix qe aldey ate' kyi'jele tnam.

²⁴Aju tjwe'yin piẍ tx'otx' jaw swert ti'j, atzunju ok te kye teyle junjun k'loj tiyjil Aser,

²⁵ex qe tnam ate' tuj kytx'otx', atzun qe jlu: Helcat, Halí, Betén, Acsaf,

²⁶Alamelec, Amad ex Miseal. Aju tmojonil tuj telex q'ij ponin max twi witz Carmelo ex ttzi nima Sihor-libnat.

²⁷Aju tmojonil tuj tjawitz q'ij xi'yni tu'n tjapun tuj lugar Bet-dagón ex jawnix ti'j kytx'otx' tiyjil Zabulón tuj tchq'ajlajil tx'otx' Jefte-el, ex tuj tb'anq'ab' q'ij kyuj tnam Bet-emec ex Neiel ex elnix tib'aj tnam Cabul,

²⁸kyja'tzun, tuk'ix tnam Abdón xi q'o'n kye, tuk'ix Rehob, Hamón ex Caná, ex pon b'aj max tuj nintz tnam Sidón.

²⁹Te tib'ajxi, aju mojón in q'on welt max tuj tnam Ramá ex ponin max tuj tnam Tiro aju tnam tok muro ti'j, tu'ntzun tpon tuj tnam Hosa ex kub'intz ttzi'yile Nintz mar in kub'il tuj tx'otx' Aczib.

³⁰Tuk'ix tnam Uma ok te kye, tuk'ix Afec ex Rehob. Tu'n tkyaqilx o japun jun tajlal te 22 tnam, kyuk'ix qe aldey ate' kyi'jele.

³¹Atzun qe tnam lu kyuk'ix qe aldey ate' kyi'jele, e ok te kye teyle junjun k'loj tiyjil Aser.

³²Aju tqaqin piẍ tx'otx' jaw swert ti'j, atzunju ok te kye teyle junjun k'loj tiyjil Neftalí.

³³Aju kytx'otx', atzun xi'ynix tmojonil tuj tnam Helef ex ik'ni kyuj qe tnam Alón-saananim, Adami-neceb ex Jabneel ex ponin max tuj tnam Lacum, tu'n tpon ttzi nima Jordán.

³⁴Aju tmojonil tuj telex q'ij, atzun in xi qe' tuj tnam Aznot-tabor ex tuj tnam Hucoc; kyja'tzun aju tmojonil mij kytx'otx' tuj tnayaj q'ij tmojón tib' tuk'il kytx'otx' tiyjil Zabulón, ex mijtl kytx'otx' tuj telex q'ij tmojón tib' tuk'il kytx'otx' tiyjil Aser. Aju tmojonil kytx'otx' tiyjil Neftalí tuj tjawitz q'ij, atzun nima Jordán.

³⁵Aqeju tnam tok muro kyi'j e ok te kye, atzun qe jlu: Sidim, Zer, Hamat, Racat, Cineret,

³⁶Adama, Ramá, Hazor,

³⁷Cedes, Edrei, En-hazor,

³⁸Irón, Migdal-el, Horem, Bet-anat ex Bet-semes. B'elajlaj tnam tu'n tkyaqilx ex kyuk'ix qe aldey ate' kyi'jele.

³⁹Atzun tx'otx' lu, kyuk'ix qe tnam ate' tuj ex kyuk'ix qe aldey ate' kyi'jele tnam, e ok te kye teyle junjun k'loj tiyjil Neftalí.

⁴⁰Aju twuqin piẍ tx'otx' jaw swert ti'j, atzunju ok te kye teyle junjun k'loj tiyjil Dan.

⁴¹Tuj tx'otx' lu atzun ate' qe tnam lu: Zora, Estaol, Ir-semes,

⁴²Saalabín, Ajalón, Jetla,

⁴³Elón, Timnat, Ecrón,

⁴⁴Elteque, Gibetón, Baalat,

⁴⁵Jehud, Bene-berac, Gat-rimón,

⁴⁶Mejarcón ex Racón, tuk'ix ju tx'otx' tkub'sa'n tumlal twitz tnam Jope.

⁴⁷Ex tu'nju minti' kanun tx'otx' lu te kye, kyja'tzun e je'x qe tiyjil Dan tu'n kyok tzoqpaj ti'j tnam Lesem, ex o tzyet tnam kyu'n. Tkub'lenxi kyb'yo'n kykyaqil xjal najl tuj tnam lu, e kyaj ten najal tuj ex b'aj kych'expu'n tb'i. Dan ok kyq'o'n tb'i tnam te jun nimb'il te qtzan kyxe'chel.

⁴⁸Atzun tx'otx' lu, kyuk'ix qe tnam ate' tuj ex qe aldey ate' kyi'jele tnam, e ok te kye teyle junjun k'loj tiyjil Dan.

⁴⁹Tb'ajlenxi kysipan aj Israel aju tx'otx' attoq tu'n tok te kye teyle junjun k'loj kyiyjil, xi kyq'o'n jun piẍ te Josué ttx'otx', ax kyxolx,

⁵⁰ik tza'nx otoq tma Qman. Xi tqanin Josué aju tnam Timnat-sera tb'i, aju tkub'sa'n tuj tiwitz tx'otx' kye aj Efraín, ex atzunju xi kyq'o'n te. Jawtzun tb'incha'n Josué juntl maj aju tnam lu ex axtzun o najan tuj.

⁵¹Tkyaqil tx'otx' lu, aju jaw swert ti'j tu'n Eleazar tuk'ix Josué ex kyuk'ix qe nejenel te tnam tu'n tkub' sipet kyxol kykyaqil k'loj kyiyjil aj Israel, o b'ant jlu twitz Qman, ttzi ja xb'alun te mojb'ab'l tib'il, max tuj Silo, ex kyja'tzun tten o b'aj kysipan tkyaqil tx'otx'.