Read kumam Josué 2 Bible Online

Josué 2 - kumam bible

Josué 2

¹Tej ate'toq tuj lugar Sitim e je'x t-sama'n Josué kab'e xinaq tuj ewaj, ex xi tma'n kye tu'n kyxi' ke'yilte tx'otx' ex tnam Jericó. E je'xtzun ex e pon tuj tnam Jericó tuj tja jun xu'j jawni twitz kyuk'il xinaq, Rahab tb'i, ex atzun e posadiyin te qonik'an.

²Ex at jun pon q'mal tqanil tuk'il rey kye aj Jericó kyja': —Te qale ja'lo ma che ul kab'e aj Israel ke'yilte tnam.

³Xitzun t-sama'n rey jun xjal q'malte te Rahab: —Q'i'metza qe xinaq ma che ul tuk'ila, aqeju ate'kx tuj tjaya, porke ke'yil tx'otx' ma che ul xjal lu, ex at nnik' ti'j kyk'u'j.

⁴Atzunte xu'j otoq che'x tewan qe xinaq ex xi tma'n: —Ax tok at kab'e xinaq ma che ul aj wuk'ile, pero minti' ma nb'iye jatum tzajniqe.

⁵Tej xqok yupj, b'i'x ẍe ex, ex atzun or in che lamet qe tlamel tnam. Minti' b'a'n wu'ne tza'n ma che'x, pero qa ma che'x lpe' naje kyi'j, jaku che pon knet kyu'ne, chi xu'j.

⁶Ex otoq che jax tewan xu'j ma twi tja, ex atzun ewan qe tjaq' junjun che'l lino kyjaxsa'n tu'n kytzqij.

⁷Kub'tzun b'e kyu'n xjal, aqeju e je'x t-sama'n rey tu'n kypon knet qe b'etin xjal kyu'n, ex atzun e je'x tuj b'e in xi' tlugaril nima Jordán, max tejxi kypon tuj xajb'il a'. O'kx tej kyex qe xjal lu, e lamet naj qe tlamel tnam.

⁸Na'nxtoq kytan xjal e pon ke'yilte tnam, jax Rahab kyuk'il twi ja ex xi tma'n kye:

⁹—B'a'n wu'ne, ate Qman ma txi q'onte tx'otx' lu kyeye, tu'nju axte ma tzaj q'onte nim t-xob'il qi'je tu'ntzun ttzaj qxob'ile kywitze. Kykyaqil xjal najl tuj tx'otx' lu nimxix in che xob' kywitze.

¹⁰B'i'n qu'ne, tej kyetze tuj Egipto, tu'n Dios b'i'x tzqij mar Kyaq Ke'yin, tu'ntzun kyik'tze tuj. Ax ikx b'i'n qu'ne, kyu'ne e naj qe rey Sehón ex Og, aqeju kyrey aj Amorreo najlqetoq jlajxi nima Jordán.

¹¹Tzaj nimxix qxob'ile tej qb'inteye jlu, kyja'tzun mi a'l jun jaku ten tipun tu'n tq'ojin kyuk'ile, porke ate Qman aju Kydiose, atzun aju Dios at tuj kya'j ax ikx at tzalu twitz tx'otx'.

¹²Kyja'tzun in chin kub'sane kywitze tu'n ttzaj kyma'ne b'i'x ja'lo jun yol axix tok twitz Qman, tu'n kyb'inchanteye b'a'n kye qeju ate' tuj njaye, ik tza'n weye ma nb'inchaye b'a'n kyeye. B'i'x kyma'n kyaje jun techal axix tok,

¹³qa tu'n mi'n kub' kyb'yo'ne nmane ex ntxu'ye ex qe txqantl wermaniye, kyuk'ix kykyaqil xjal ate' kyuk'il. Qo kyklome tu'n mi'n qnaje, chi Rahab.

¹⁴Atzun kye xi kytzaq'we'n: —Qa mi xb'ant qu'ne aju ma tzaj tqanina qeye, b'a'n tu'n qkyime tu'n Dios, ex mi'n b'aj tma'na jlu. Ok ttzaj tq'o'n Qman aju tx'otx' lu qeye, ax tok ok qb'inchaye b'a'n teya, che chi.

¹⁵Tu'nju atzun najltoq Rahab tuj jun ja b'inchamaj twi muro te tnam, kyja'tzun aqeju kab'e xinaq lu e ex ttzi ventan, ex ti'j saqb'aq e ku'x tu'n Rahab.

¹⁶Ex xi tma'n kye: —Kyxi'ye ewal kyib'e kywi' qe witz tu'ntzun mi'n kyknete kyu'n qeju in che jyon kyi'je. Kyewanx kyib'e ma chixin ox q'ij okxi kyajtz meltz'aj qeju in che jyon kyi'je. Te tib'ajxi jlu b'a'n tu'n tkub' b'e kyu'ne.

¹⁷Atzun kye xi kytzaq'we'n: —Kb'antel qu'ne aju ma txi qtziyane teya ex aju ma tzaj tqanina tu'n qb'inchanteye teya.

¹⁸Ex ok qoktze tuj tx'otx' lu, b'ix ku'x tyob'ina ttzi ventan jatum ma qo ku'tz tq'o'na, aju ky'jaj lu kyaq ke'yin, ex chmon b'aja kykyaqil termaniya tuj tjaya, tuk'ix tmana ex ttxu'ya ex kykyaqil qeju at t-xilen tmana kyuk'il.

¹⁹Qa at jun kye ma tz'ex ti'jxi tjaya, kymel tu'n tex tlaj ex mya qo'ye at qile. Qatzun at jun qeye ma tz'ok tzoqpaj ti'j jun kyxol qeju ate' tuj tjaya, atzun qo'ye at qile ti'j tkamik.

²⁰Ex qa ma tz'el tqanil jlu tu'na, mlaytzun japun qu'ne aju ma txi qtziyane teya, che chi.

²¹—B'a'n ikju, kyja'na ktelb'a qu'n, chi xu'j. B'ajtzun kyq'olb'en kyib' ex kub' b'e kyu'n qe xinaq. Te tib'ajxitzun ok tk'alo'n Rahab ttzi tventan tja aju ky'jaj kyaq ke'yin.

²²Aqeju kab'e xinaq lu e je'x ewal kyib' kywi witz ox q'ij, atzun kye xinaq in che jyontoq kyi'j tuj tkyaqil part ex minti' e knet kyu'n. Tej tb'aj kygan tu'n kyjyon kyi'j, e ajtz meltz'aj tu'n kyul tuj tnam Jericó.

²³E ku'tztzun qe kab'e xinaq kywi witz, e ik'x tuj nima Jordán, e ul jatum ta' Josué aju tky'ajal Nun, ex xi kytx'olb'a'n tkyaqilju otoq b'aj kyi'j.

²⁴Ex xi kyma'n te Josué: Ma tzaj tq'o'n Qman tkyaqil tx'otx' lu te qe, ex kykyaqil xjal najlqe tuj tnam lu in che xob' wen tu'n qlaj.