Read kumam Josué 20 Bible Online

Josué 20 - kumam bible

Josué 20

¹Tzajtzun tma'n Qman te Josué kyja':

²Q'manxa kye aj Israel tu'n tjaw kysk'o'n qe tnam te kykolb'il kyib', ik tza'nx xi nma'ne te Moisés.

³Qa at jun ma kub' b'yonte jun xjal ex qa mya ximamaj tu'n tu'n tkub' tb'yo'n, b'a'ntzun tu'n t-xi oq klolte tib' tuj jun kye qeju tnam lu, tu'ntzun mi'n t-xelin ti'j tu'n terman qtzan kyimni.

⁴Ok tpon oq jun xjal klolte tib' tuj jun kye qeju tnam lu, kb'el we' ttzi tlamel tnam ex kxel tma'n kye qe kytijil xjal te tnam ti otoq tb'incha. K'okextzun k'mo'n kyu'n qe kytijil xjal te tnam, ex kxel kyq'o'n jun lugar te tu'n tnajan junx kyuk'il.

⁵Ex qa ma tz'ok lpe' terman qtzan kyimni ti'j ju b'iyul tu'n tkub' tu'n, ex mlay txi q'o'n tuj tq'ab' kyu'n qe kytijil xjal te tnam, porke mya ximamaj tu'n tu'n tkub' tb'yo'n aju tuk'il ex minti' tq'oj ti'j.

⁶Ex aju xjal otoq pon tklon tib', ax kyjel ten tuj tnam okxi tok tuj xjel kywitz kykyaqil tnam xjal, ex okxi tkyim tnejel pal aju at tuj tq'ijlalil ok tpon oq xjal tuj tnam. Maxitzun b'a'n tu'n taj b'yol xjal tuj ttanmi ex tuj tja tuj tnam jatum otoq tz'etz oq, chi Qman te Josué.

⁷Jawtzun kysk'o'n aj Israel qe tnam lu te kykolb'il kyib' xjal: Tnam Cedes aju tkub'sa'n kyuj qe tiwitz tx'otx' kye aj Neftalí tuj Galilea, tuk'ix tnam Siquem aju tkub'sa'n tuj tiwitz tx'otx' kye aj Efraín, ex tnam Quiriat-arba, aju ax juntl tb'i Hebrón, aju tkub'sa'n tuj tiwitz tx'otx' kye aj Judá.

⁸Atzun taj jlajxi nima Jordán, tuj chq'ajlaj te tzqij tx'otx' tuj tjawitz q'ij te Jericó, atzun qe tnam lu e jaw kysk'o'n: Tnam Beser aju tkub'sa'n kyxol qe tiyjil Rubén; tuk'ix tnam Ramot aju tkub'sa'n kyxol tiyjil Gad tuj tx'otx' Galaad, ex tnam Golán aju tkub'sa'n kyxol qe tiyjil Manasés.

⁹Atzun qe tnam lu jaw kysk'o'n te kykolb'il kyib' xjal, tu'n tajb'en kye aj Israel ex kye stranjer xjal najl kyxol. Atzun tu'n tpon tklon tib' aju xjal in kub' b'yonte jun tuk'il, qa mya ximamaj tu'n tu'n tkub' tb'yo'n, tu'ntzun mi'n t-xelin ti'j tu'n terman qtzan kyimni, ex tu'n mi'n tkub' b'yo'n na'nxtoq tok tuj xjel kyu'n tnam xjal.