Read kumam Josué 22 Bible Online

Josué 22 - kumam bible

Josué 22

¹E tzajtzun ttxko'n Josué qe tiyjil Rubén kyuk'ix qe tiyjil Gad ex mij tiyjil Manasés,

²ex xi tma'n kye kyja': Ma japun kyu'ne tkyaqilju o tma Moisés kyeye, ex ma japun kyu'ne tkyaqilju xi nma'ne kyeye.

³Tuj enter tyemp ma jatz, ax ikx ja'lo, minti' ma kyaj kykoline qe kyermaniye, ex ma japun kyu'ne aju orden tzaj tma'n Qman Dios.

⁴Atzun ja'lo ma tzaj tq'o'n Qman Dios ojlab'l kye kyermaniye, ik tza'n tzaj ttziyan. Kyja'tzun kyaj meltz'aje tuj kyjaye, tuj tx'otx' xi q'o'n kyeye tu'n Moisés aju tmajen Qman, tuj tumlal tjawitz q'ij te nima Jordán.

⁵Noq o'kx kxel nma'ne kyeye tu'n kukx kyjapun qe mandamyent kyu'ne, kyuk'ix qe ley xi q'o'n kyeye tu'n Moisés aju tmajen Qman, tej tmante kyja': Kyk'ujlame Qman aju Kydiose, kukx che b'ete tuj tb'e, kynimanxe qe tmandamyent, che lpeke ti'j, ex che ajb'ene te tu'n tkyaqil kyanmiye ex tu'n tkyaqil kyk'u'je, chitzun Moisés, chi Josué kye.

⁶Ax ikx xi tma'n Josué kye kyja': —Kyajtzune tuj kytx'otx'e ja'lo tuk'il nimxix q'inumab'l ex nimku alumaj, tuk'ix q'an pwaq, saq pwaq, q'an k'uxb'il, k'uxb'il ex nimku xb'alun. Kysipan kub'e kyxol kyermaniye aju ma tz'el kyi'ne kye aj q'oj. Te tib'ajxi jlu e kub'tzun ky'iwla'n tu'n Josué, ex b'aj kyq'olb'en kyib' ex e ajtzun kyja. Otoq txi tq'o'n Moisés kytx'otx' mij tiyjil Manasés tuj tx'otx' Basán, ex atzun kye mijtl, xi tq'o'n Josué kytx'otx' kyxol txqantl aj Israel tuj telex q'ij te nima Jordán.

⁹Kyja'tzun tten, aqeju tiyjil Rubén, kyuk'ix qe tiyjil Gad ex mij tiyjil Manasés, el kypa'n kyib' kyi'j txqantl aj Israel tuj Silo tuj tx'otx' Canaán, tu'ntzun kyaj meltz'aj tuj kytx'otx' tuj tx'otx' Galaad, aju tx'otx' otoq txi q'o'n kye, ik tza'nx otoq txi tma'n Qman te Moisés.

¹⁰Tejtzun kypon qe tiyjil Rubén, kyuk'ix qe tiyjil Gad ex kyuk'ix mij tiyjil Manasés ttzi nima Jordán, ate'xtoq tuj tx'otx' Canaán, jaw kyb'incha'n jun matij altar ttzi nima Jordán.

¹¹Tejtzun kyb'inte txqantl aj Israel qa aqe tiyjil Rubén kyuk'ix qe tiyjil Gad ex mij tiyjil Manasés otoq jaw kyb'incha'n jun altar tuj tmojonil tx'otx' Canaán, ttzi nima Jordán tuj kytx'otx' aj Israel,

¹²b'aj kychmon kyib' tuj Silo tu'n kyxi' q'ojlel kyi'j.

¹³Nej xi kysama'n Finees aju tky'ajal pal Eleazar, tu'n t-xi' tuj Galaad jatum ate' qe tiyjil Rubén, tiyjil Gad ex mij tiyjil Manasés.

¹⁴Kyuk'ix laj nejenel ma'xix kyoklen kyxol aj Israel e je'x tuk'il Finees; jun te teyle junjun k'loj kyiyjil, ex nejenel qe kye kykyaqil qeju at kyxilen kyuk'il.

¹⁵Kykyaqil qe jlu e je'x tuj Galaad jatum ate'toq qe tiyjil Rubén, qe tiyjil Gad, kyuk'ix mij tiyjil Manasés, ex xi kyma'n kye kyja':

¹⁶—Qe tnam xjal etzan tu'n Qman kyajb'il tu'n kyb'inte tiqu'n ma che b'inchane il twitz Qdios aqo' aj Israel. ¿Tiqu'n ma kyaj kykoline ex ma jaw kyb'incha'ne jun altar tu'n tjaw kyi'n kyib'e ti'j?

¹⁷¿Baqa noq ch'in aju il o kyb'incha aj Israel t-xe witz Peor? Tu'ntzunju il lu kukx ato'x tuj mya b'a'n, maske o che kyim nimku xjal etzan tu'n Dios.

¹⁸Ax ikxtzun kyeye ja'lo, ma tz'el kypa'n kyib'e ti'j Qman. Qa ma jaw kyi'n kyib'e ti'j Qman, ax ikx te, nchi'jlo tzaj tq'oj kyi'j kykyaqil tnam xjal aj Israel.

¹⁹Qatzun mya b'a'n ma tz'ela tuj kywitze aju tx'otx' ma kyk'ame, b'a'n tu'n kytzaje tuj tx'otx' te Qman jatum ta' tja. Kytzyume jun piẍ tx'otx' qxole, ex mi'n jaw kyi'n kyib'e ti'j Qman ex mi qi'je, porke ma jaw kyb'incha'ne juntl altar, part ti'j altar te Qman aju Qdios.

²⁰Kyna'ntze aju tb'incha Acán aju tky'ajal Zera; o b'inchan il tu'nju tzaj ti'n aju otoq tma Dios b'i'x tu'n tnaj, ex noq tu'n te tlaj tzaj tq'oj Qman kyi'j kykyaqil tnam xjal aj Israel, ex mya o'kx te Acán o naj tu'n tlaj til, che chi.

²¹Atzun kye tiyjil Rubén, kyuk'ix qe tiyjil Gad ex mij tiyjil Manasés xi kytzaq'we'n kye qe nejenel kye aj Israel kyja':

²²—Ate Qman aju Dios ma'xix toklen kywitz kykyaqil qeju nno'k kydiosin xjal, b'a'n tu'n alkye in qo ximane ti'j, ax ikx kyeye b'a'n tu'n kyb'inteye; qatzun in qo ximane ti'j tu'n tjaw qi'n qib'e ti'j, ex qa tu'n tel qpa'n qib'e ti'j, b'a'ntzun tu'n tkub' qcastiwoye tu'n.

²³Qatzun ma jaw qb'incha'ne ju altar lu tu'n tel qpa'n qib'e ti'j Qman, ex qa tu'n tkub' qpatune oyaj tib'aj, aqeju patun in che kub', ex qa qe oyaj ti'j twitz awal ex qa qe chojb'il te mojb'ab'l tib'il, b'a'n tu'n qoke tuj xjel ti'j tu'n Qman.

²⁴Ax tok ma qb'inchaye jlu ex mi'n qajb'ile tu'n kymante qe kyk'wa'le mas yajxi kye qeju qeye qk'wa'l: ¿Ti kyoklene ti'j Qman aju Kydios aj Israel?

²⁵Ate Qman ma kub' q'onte nima Jordán te mojón qxol, aqeye tiyjil Rubén ex tiyjil Gad, kyja'tzun minti' kyoklene ti'j Qman, jaku che chi. Kyja'tzun, mya yajku kyu'n kyeye kyk'wa'l jaku b'ant tu'n mi'n kyniman te Qman qeju qeye qk'wa'l.

²⁶Kyja'tzun kub' qximane tu'n tjaw qb'incha'ne jun altar, ex mya tu'n tajb'en te patb'il oyaj te Qman, ex mi tu'n tkub' q'ot juntl chojb'il tib'aj,

²⁷noq o'kx tu'n tajb'en te jun techal te kyeye ex te qeye ex te kye qe qiyjil che ul itz'j te tib'ajxi, tu'ntzun qajb'ene te Qman ex tu'n qpone tuj tja kyuk'il qoyaje patun in che kub', kyuk'ix qe chojb'il il ex qe chojb'il te mojb'ab'l tib'il. Kyja'tzun, aqeju kyiyjile mlay txi kyma'n kye qe qeye qiyjile kyja': Kyeye minti' kyoklene ti'j Qman, jaku che chi.

²⁸Kyja'tzun o qmaye: Qa at jun ma q'mante jlu qeye ex qa kye qe qiyjile che ul itz'j te tib'ajxi, atzun qeye jaku txi qtzaq'we'ne kyja': Kyke'yinxe aju altar jaw kyb'incha'n qe qxe'chele, ik ke'yin ik tza'n altar in ajb'en te Qman, ex mya tu'n tkub' patit oyaj tib'aj ex mi qe chojb'il, noq o'kx tu'n tajb'en te jun techal qxol, che chilo.

²⁹Awt Dios onin qeye tu'n mi'n tjaw qi'n qib'e ti'j, ex tu'n mi'n tkyaj qkoline tu'nju ma jaw qb'incha'ne juntl altar, porke mya tu'n tkub' patit oyaj tib'aj, ex mi tu'n tkub' q'ot oyaj twitz awal ex qa tu'n tkub' patit txqantl chojb'il tib'aj altar lu, noq o'kx kb'el q'ot chojb'il ex oyaj tib'aj altar tkub'sa'n twitz tja Qman aju Dios, che chi xi kyma'n.

³⁰Atzunte pal Finees, kyuk'ix qe nejenel kye tnam xjal ex qe nejenel kye junjun k'loj kyiyjil aj Israel, aqeju uk'in tu'n Finees, tej kyb'inte aju o kyma qe tiyjil Rubén, qe tiyjil Gad ex mij tiyjil Manasés, b'a'n e'la jlu tuj kywitz.

³¹Atzunte Finees aju tky'ajal pal Eleazar, xi tma'n kye: —Matzun tz'el qnik'e ti'j ja'lo qa ax ta' Qman quk'il, porke minti' ma jaw kyi'n kyib'e ti'j, ex kyja'tzun ma qo klet kyu'ne tu'n mi'n tkub' qcastiw tu'n Qman.

³²Te tib'ajxi jlu, b'aj tq'olb'en tib' Finees kyuk'il, ax ikx qe nejenel uk'in tu'n b'aj kyq'olb'en kyib' kyuk'il, e ajtztzun meltz'aj tuj tx'otx' Galaad tu'n kyul tuj tx'otx' Canaán jatum ate'toq qe aj Israel. Tejtzun t-xi kyma'n kye qeju ate' tuj Canaán aju otoq tzaj kytzaq'we'n qe txqantl kyiyjil,

³³aju tzaq'web'l lu b'a'n e'la tuj kywitz ex jaw kynimsa'n tb'i Dios. Tu'ntzun jlu ya minti'tl e yolin tu'n kyok tzoqpaj kyi'j qe tiyjil Rubén ex tiyjil Gad ex mi tu'n tnaj kytx'otx' kyu'n.

³⁴Atzun qe tiyjil Rubén, kyuk'ix qe tiyjil Gad, ok kyq'o'n tb'i altar lu Testiw, tu'nju kyma: Atzunju altar lu k'ajb'el te testiw qxol, qa atzun Qman Diosju.