Read kumam Josué 4 Bible Online

Josué 4 - kumam bible

Josué 4

¹Tejtzun kyik'x b'aj kykyaqil aj Israel tuj nima Jordán xi tma'n Qman te Josué:

²Sk'o'n jawa kab'laj xinaq kyxol aj Israel, jun kyxol teyle junjun k'loj kyiyjil,

³ex q'manxa kye tu'n tjatz kyi'n kab'laj ab'j tuj tmij nima, tuj lugar jatum wa'lqe pal, ex e t-xi kyi'n tu'n tkub' kyq'o'n tuj lugar jatum che tele te qonik'an ja'lo.

⁴E tzajtzun ttxko'n Josué kab'laj xinaq, aqeju otoq che jaw t-sk'o'n jun kyxol teyle junjun k'loj kyiyjil,

⁵ex xi tma'n kye: Kyik'xe max tuj tmij nima Jordán twitz kax k'ub'l tley Qman Dios, ex teyle junjun kyeye q'o'n jax jun ab'j twi t-semil, jun ab'j te junjun k'loj kyiyjil aj Israel.

⁶Aqeju ab'j lu che ajb'el te jun yek'b'il kyxole ok ttzaj kyqanin qe kyk'wa'le te tib'ajxi: ¿Ti kyxilen qe ab'j lu? Che chilo.

⁷Atzun kyeye kxel kytzaq'we'ne: Tej tik'tz kax k'ub'l tley Qman tuj nima Jordán, aju nima kub' tpa'n tib' te kab'e twitz kax. Atzun kyxilen qe ab'j lu, tu'n kukx tu'n ttzaj na't kyu'n aj Israel aju o b'aj tzalu, che chikuye.

⁸Atzun kye o kyb'incha ik tza'n xi tma'n Josué kye. Jatz kyi'n kab'laj ab'j tuj nima Jordán, jun te teyle junjun k'loj kyiyjil aj Israel, xi kyi'n max jatum e kub' ten, ex atzun kub' kyq'o'n, ik tza'nx otoq tma Qman te Josué.

⁹Ax ikx kub' ttxolb'a'n Josué kab'lajtl ab'j tuj tmij nima, tuj lugar jatum e kub' we' qe pal iqalte kax k'ub'l tley Dios, ex aqeju ab'j lu ate'x ja'lo.

¹⁰Qe pal iqalte kax ax e kub' we' tuj tmij nima Jordán, tejxi tb'aj b'ant kyu'n aj Israel tkyaqilju otoq tma Qman te Josué. Tkyaqil o b'ant ik tza'nx otoq tma Moisés te Josué. Jurat naj e ik'tz qe xjal,

¹¹ex tej kyik'tz b'aj kykyaqil jlajtzi, e ik'tztzun qe pal tuk'il kax k'ub'l tley Dios, ex e kub' nej juntl maj kywitz kykyaqil xjal.

¹²Ax ikx qe xinaq kyxol qe tiyjil Rubén, aqeju otoq pon kyipun tu'n kyxi' tuj q'oj, kyuk'ix qe xinaq kyxol tiyjil Gad ex kyxol mijku tiyjil Manasés e ik'tz tuj nima. Kykyaqil jlu e kub' nej kywitz txqantl aj Israel q'i'mele kymakb'il te kyq'ojb'il, ik tza'nx otoq tma Moisés kye.

¹³Ch'ixmi japun 40,000 kyajlal xinaq q'i'mele kymakb'il te kyq'ojb'il, ex b'anin kyten tu'n kyq'ojin, ex nejni qe twitz kax k'ub'l tley Qman, e je'xtzun tu'n kypon tuj chq'ajlaj ttxlaj tnam Jericó.

¹⁴Tuj q'ij lu o jaw nimsa'n Josué tu'n Qman kywitz kykyaqil aj Israel, ex o che nimante te tuj tkyaqil tanq'ib'l ik tza'n otoq che niman te Moisés.

¹⁵Ex tzajtzun tma'n Qman te Josué:

¹⁶Q'manxa kye pal, aqeju iqalte kax k'ub'l tley Dios, tu'n kyjatz tuj nima Jordán.

¹⁷Xitzun tma'n Josué kye tu'n kyjatz,

¹⁸ex tej matoq in che ik'pun b'aj qe pal ttzi nima Jordán, ex matoq nnik' tnejel t-xol kyqan tuj tzqij, o pon nima ik tza'n ttenx ex tzyet tb'et juntl maj ik tza'n nej, najchaq in pon qojl.

¹⁹Tuj tlajin tajlal tnejel xjaw e ik'tz qe aj Israel tuj nima Jordán, ex e kub' ten tuj lugar Gilgal ttxlaj tnam Jericó tuj tjawitz q'ij.

²⁰Atzun e kub' tq'o'n Josué kab'laj ab'j, aqeju e jatz q'i'n tuj nima Jordán,

²¹ex xi tma'n kye aj Israel: Ok ttzaj kyqanin kyk'wa'le kyeye tuj tq'ijlalil te tib'ajxi: ¿Ti kyxilen qe ab'j lu? qa che chi,

²²kyma'nxe kye tza'n tten e ik'tz qe aj Israel tuj tzqij tuj nima Jordán,

²³ex tza'n tten aj tzqij nima Jordán tu'n Qman Dios, tu'ntzun kyik'tze tuj, ik tza'nx otoq tb'incha Qman ojtxi, tej tkub' tpa'n tib' mar Kyaq Ke'yin tu'ntzun qik'tz tuj tzqij.

²⁴Tb'incha Dios ikju tu'ntzun tel kynik' kykyaqil tnam twitz tx'otx' ti'j tipumal, ax ikx kyeye tu'n kukx tu'n kynimane te Qman Dios, ex kukx tu'n kyxob'e twitz.