Read kumam Josué 6 Bible Online

Josué 6 - kumam bible

Josué 6

¹Otoq che lamet qe tlamel tnam Jericó tu'n kyklet xjal tuj kyq'ab' aj Israel; mi jun xjal jaku b'ant tu'n tokx ex mi tu'n tetz tuj tnam.

²Atzunte Qman tzaj tma'n te Josué: Ma che'x nq'o'ne qe xjal aj Jericó tuj kyq'ab'e, tuk'ix kyrey ex qe kysoldad, tu'n tkub' kyi'j kyu'ne.

³B'a'n tu'n kyq'on soldad jun welt ti'jele tnam jun maj tuj jun q'ij okxi tjapun qaq q'ij.

⁴Wuq pal che b'el nej twitz kax k'ub'l nleye, ex teylex te junjun kxel ti'n jun tkach ẍne'l te chun. Tujtzun twuqin q'ij, wuq maj che q'ole welt ti'j tnam, akux in che q'ajtzan qe pal ti'j tkach ẍne'l.

⁵Oktzun kyb'inteye tq'ajq'ajel twi chun mas nim tuj, b'ix che jaw sch'i'n kykyaqil tnam xjal tu'n tkyaqil kyipun, ex aju muro te tnam kb'el xitj. Teylextzun te junjun xinaq jiqun tz'okx tuj tnam, chi Qman.

⁶E tzajtzun ttxko'n Josué qe pal ex xi tma'n kye kyja': Kyi'nxe kax k'ub'l tley Qman, ex wuq pal kb'el nej twitz kax kyuk'ix qe chun tkach ẍne'l q'i'n kyu'ne.

⁷Ax ikx xi tma'n Josué kye xjal: Kyxi'ye ex che q'one welt ti'jele tnam, atzun qe xinaq b'anin kyten tu'n kyq'ojin, e kykub' nej twitz kax k'ub'l tley Qman, chi Josué.

⁸Tkyaqil o b'ant kyu'n ik tza'n o tma Josué. Wuq pal e kub' nej twitz kax k'ub'l tley Qman, nno'ktoq wuq chun kyu'n ex lepchix t-xi' kax kyi'j.

⁹Qe xinaq b'anin kyten tu'n kyq'ojin, nejni qe kywitz qe pal, atzun qe txqantl xjal lepchix kyxi' ti'j, akux in q'ajt chun kyuw wen kyu'n pal.

¹⁰Ex xi tma'n Josué kye kykyaqil xjal kyja': Mi'n che jaw sch'ine, mi'n che q'ajte ex mi'n che yoline. Maxi che jawil sch'ine okxi t-xi nma'ne kyeye.

¹¹Xi tma'n Josué tu'n tik' q'i'n jun welt kax k'ub'l tley Qman ti'jele tnam. Te tib'ajxi jlu e aj tuj campament, ex axtzun ja'wil aq'b'il kye.

¹²Te prim tuj juntl q'ij jaw we' Josué, ex atzun kye pal xi kyi'n kax k'ub'l tley Qman.

¹³Wuq pal nejni twitz kax k'ub'l tley Qman minti' e q'ajen tu'n kyb'et, ex minti' q'ajen tu'n kyq'ajt tkach ẍne'l kyu'n. Qe xinaq b'anin kyten tu'n kyq'ojin, nejni qe kywitz, atzun juntl k'loj e tzaj b'et ma ti'jxi kax, akux in che q'ajt qe chun wen kyu'n qe pal.

¹⁴Tuj juntl q'ij e ik' b'et juntl welt ti'jele tnam ex e ajtl tuj campament. Ex iklex o b'ant kyu'n tuj qaq q'ij.

¹⁵Tujtzun twuqin q'ij e jaw we' primxix wen tu'n kyik' b'et ti'jele tnam, ik tza'n otoq b'ant kyu'n nej, ex tuj q'ij lu, wuq maj e q'on welt ti'jele tnam.

¹⁶Tejtzun tok kyq'ajtza'n pal chun twuqin maj, xi tma'n Josué kye xjal: Kyjaw sch'ine kyuw wen, porke ma tzaj tq'o'n Qman tnam lu kyeye tu'n tkub' ti'j kyu'ne.

¹⁷Te jumajx knajel tnam lu, tuk'ix tkyaqilju at tuj, ik tza'n jun chojb'il te Qman. O'kxte xu'j Rahab, aju jawni twitz kyuk'il xinaq, mi'n naj kyuk'ix kykyaqil qeju ate' tuj tja, porke e kub' tewan qe xjal e tzaj qsama'n ke'yilte tnam lu.

¹⁸Atzun kyeye, mi'n tz'ok kymako'ne jun ti'xti at tuj tnam lu, ex mi'n txi kyi'ne, ex tkyaqil il ti'j tu'n tnaj te jumajx ik tza'n jun chojb'il te Qman; qatzun ma txi kyi'ne, jakulo tzaj castiw kyib'aj enter tnam xjal aj Israel ex jaku tzaj mya b'a'n kyib'aje.

¹⁹Tkyaqil q'an pwaq ex saq pwaq, tkyaqil ti'xti q'an k'uxb'il ttx'otx'il ex txqantl k'uxb'il, kxel q'ot te Qman ex kxel k'u't kyxol qe tq'inumab'l, chi Josué kye xjal.

²⁰E jawtzun sch'in xjal kyuk'ix qe chun in che q'ajt kyu'n pal. Tej kyb'inte aj Israel tq'ajq'ajel kywi chun, e ok ten sch'il ex jaw tq'ajq'ajel kywi' kyuwxix wen, atzunju muro te tnam kub' tilj. Teylex te junjun xinaq, jiqun okx tuj tnam ex kub' ti'j kyu'n.

²¹E kub'tzun b'yo'n tu'n spad qe xinaq aj Jericó, kyuk'ix qe xu'j, qe ku'xun, kyuk'ix qe tij xjal, ax ikx qe wakẍ, qe ẍne'l ex qe bur. Kykyaqil e naj kyu'n te jumajx, te jun chojb'il te Qman.

²²Xitzun tma'n Josué kye qe kab'e xinaq aqeju otoq che ul aj ke'yilte tnam: Kyxi'ye tja xu'j jawni twitz kyuk'il xinaq, ex kyi'metze ma chixin, kyuk'ix kykyaqil qeju ate' tuk'il, ik tza'n xi kytziyane te, chi Josué.

²³E okxtzun ex etz kyi'n aju xu'j Rahab, tuk'ix tman ex ttxu', kyuk'ix qe terman ex kykyaqil qeju at kyxilen kyuk'il, ex e je'x kyi'n tu'n kyten tuj jun lugar segur ttxlaj kycampament aj Israel.

²⁴Oktzun kyq'o'n aj Israel tq'aq'al tnam tuk'ix tkyaqilju at tuj. O'kxku saq pwaq, q'an pwaq, ex junjun ti'xti q'an k'uxb'il kytx'otx'il ex txqantl ti'xti k'uxb'il ttx'otx'il, etz kyi'n ex xi kyk'u'n tuj k'ub'l q'inumab'l tuj tja Qman.

²⁵Atzunte xu'j Rahab aju jawni twitz kyuk'il xinaq, kyuk'ix qeju ate' tuj tja, e kyaj tklo'n Josué tu'n kyanq'in tu'nju e kub' tewan qe xjal e pon t-sama'n Josué ke'yilte tnam Jericó. Atxixtzun tkyaj anq'in Rahab kyxol aj Israel, ex lu atx ja'lo.

²⁶Xitzun tkyuwsa'n Josué jun yol kyja': Tzajxwit tcastiw xjal tu'n Qman, alkyeju ma tz'ok ten aq'nal tu'n tjaw b'inchet juntl maj tnam Jericó. Ok tkub' qe' simyent tu'n, b'i'xwit kyim nej tky'ajal, ex ok kyok tq'o'n qe tlamel tnam, b'i'xwit kyim mankb'il tky'ajal, chi Josué.

²⁷O tz'onin Qman ti'j Josué, ex aju tqanil ti'j pon b'aj tuj tkyaqil lugar.