Read kumam 2 Tesalonicenses 2 Bible Online

2 Tesalonicenses 2 - kumam bible

2 Tesalonicenses 2

¹Atzun ja'lo, erman, at jun qyole kxel qma'ne ti'j tulel Qajaw Jesucrist ex ti'j ju q'ij ok tul tu'n qk'lunte qib' tuk'il; qo kub'sale kywitze

²tu'n mi'n tch'expet naj kynab'le, ex mi'n naj kynab'le. Qa at jun pakb'al yol ma pon kyuk'ile ex qa jun yol ex qa jun u'j in tma'n qa ya ma tzul tq'ijlalil tu'n tul Qajaw, ex in kyma'n qa qeye qyol, mi'n txi kynimane.

³Mi'n txi kyq'on kyib'e tu'n kykub' sb'u'ne kyu'n xjal, tu'nju na'nxtoq tul Qajaw, nej che okel ten xjal q'ojlel ti'j Dios, ex ok tyek'u tib' ju xjal b'inchal ilxix, aju kxel tuj najen.

⁴Ate jlu k'okel tzoqpaj ti'j tkyaqilju nno'k kyq'o'n xjal te kydios ex in che k'ulun xjal kywitz, ex k'okel ten q'ojlel kyi'j; kb'el qe' tuj tja Dios ik tza'n axte Dios, ok tma' qa ax Dioste.

⁵¿Minti'pe na'n kyu'ne, xi nma'ne jlu kyeye tej atinxtoqe kyuk'ile?

⁶Ex b'i'n kyu'ne ja'lo alkyeju in maqonte te tu'n mi'n tyek'unjtz naj ja'lo, maxi ktzajel yek'un ok tpon tq'ijlalil.

⁷Porke aju tipumal mya b'a'n in aq'nan tuj ewaj ja'lo, ex at jun in maqonte te ja'lo. Oktzun tel q'i'n aju in maqonte,

⁸maxitzun k-yek'etel ju xjal b'inchal ilxix, ex kb'eltzun b'yo'n jlu tu'n Qajaw tu'nju t-xew nne'tz tuj ttzi', ex b'i'x knajel tu'n t-spik'umal Qajaw ok tul.

⁹Tu'n Satanás tzul te xjal lu, aju b'inchal ilxix, nim tipumal ex ok tb'incha' qe señ kyuk'ix tb'inchb'en nim kyipumal, pero mya ax tok.

¹⁰Ex tu'nju tb'inchb'en mya b'a'n che b'el t-sb'u'n qe xjal, aqeju tu'n kyxi' tuj najen tu'nju minti' kygan ti'j tu'n t-xi kyniman ju yol axix tok tu'n kyklet.

¹¹Kyja'tzun, che xel ttzoqpi'n Dios tu'n kysb'unjtz tu'ntzun t-xi kyoksla'n ju nik'aj yol,

¹²tu'ntzun tkub' kysentens kykyaqil qeju minti' ma txi kyoksla'n ju yol axix tok, noq o'kx in che tzalaj ti'j ju mya b'a'n.

¹³Ex il ti'j tu'n t-xi qq'o'ne chjonte te Dios kyi'je, aqeye erman k'ujla'n qeye tu'n Qajaw, porke o che jaw sk'o'ne tu'n Dios atxix t-xe tnejel tu'n kyklete, tu'nju ma che el pa'ne tu'n Xewb'aj Xjan tu'n kyajb'ene o'kx te Dios, ex ma txi kyoksla'ne ju yol axix tok.

¹⁴Kyja'tzun e txkonjtze tu'n Dios tu'nju tqanil kolb'il xi qma'ne kyeye, tu'ntzun kyk'monteye jun kyoklene ma'xix junx tuk'il Qajaw Jesucrist tuj tajwalil.

¹⁵Kyja'tzun erman, mi'n che yukche, kytzyumxixe ju xnaq'tzb'il aju ma b'ant kyu'ne, qa aju xi qma'ne kyeye ex qa aju xi qtz'ib'ane kyeye tuj u'j.

¹⁶Ma qo k'ujlanjtz tu'n Qajaw Jesucrist ex tu'n Qman Dios, ex ma q'uqb'anjtz qk'u'j te jumajx tu'n, ex ma tzaj tma'n tu'n tqe' qk'u'j ti'j jun b'a'n tzul tq'o'n Dios qe noq tu'n t-xtalb'il.

¹⁷Awt q'uqb'ante kyk'u'je, ex awt kyuwsante kyeye tuj tkyaqil, tu'n kyyoline b'a'n ex tu'n kyb'inchanteye b'a'n.