Read kumam 2 Tesalonicenses 3 Bible Online

2 Tesalonicenses 3 - kumam bible

2 Tesalonicenses 3

¹Kyja'tzun erman, che na'ne Dios qi'je tu'ntzun tel laq'e' mas tqanil tyol Qajaw ex tu'n tnimanjtz, ik tza'n kyeye ma txi kynimane.

²Ax ikx che na'ne Dios qi'je tu'n qklete kywitz qe xjal mib'an che b'in ex mya b'a'n qe, porke mya kykyaqil xjal at kyokslab'l.

³Ex ate Qajaw in japunxix tyol, ex b'a'n tu'n tqe' qk'u'j ti'j, ok che kyuwsanjtzele tu'n, ex che okel kwentine tu'n, tu'n mi'n tkub' kyi'je tu'n tajaw il.

⁴Ex noq tu'n Qajaw ma qe' qk'u'je kyi'je, aju ma txi qma'ne kyeye in kyb'incha'ne ex kukx ok kyb'incha'ye.

⁵Awt Qajaw ẍaqlun kyeye tu'n tel kynik'e ti'j tk'ujlalil Dios ex tu'n tten kypasense ik tza'n te Crist.

⁶Pero kxel qkyuwsa'ne kyeye erman tu'nju ato' tjaq' toklen Qajaw Jesucrist, kypa'mel kyib'e kyi'j qe erman in che b'et mya tuj tumel ex minti' in che b'et ik tza'n ju xnaq'tzb'il xkyk'ame qeye.

⁷Ex ax qeye b'a'n kyu'ne tza'n tten tu'n tel kykano'ne qi'je; ex tej qtene kyxole minti' o qo b'ete mya tuj tumel,

⁸ex minti' o qo wa'ne noq kukx tu'n juntl, noq o'kx nim o qo aq'nane q'ijl ex qonik'an ex nim o qo sikte tu'n mi'n tkub' qq'o'ne jun iqtz kyib'aje.

⁹Maske at qoklene tu'n qwa'ne kyi'je, pero o qo aq'nane tu'n tknet qwaye, tu'n t-xi qq'o'ne jun yek'b'il kyeye tu'ntzun tel kykano'ne qi'je.

¹⁰Ex tej qtene kyxole, xi qma'ne jlu kyeye: Qa at jun tk'i' tz'aq'nan, ax ikx mi'n wa'n.

¹¹Porke in qb'i'ne at junjun kyxole in che b'et mya tuj tumel, minti' in che aq'nan ch'in, noq kukx nne'x kyq'ij ttzi kyja xjal.

¹²Kyetzun jlu in xi qma'ne ex in xi qq'o'ne kynab'l tu'n tyol Qajaw Jesucrist, tu'n kyaq'nan yalnix ti'j ex tu'n kywa'n kykwent-x kyib'.

¹³Erman, mi'n b'aj kyganiye tu'n kyb'inchanteye aju b'a'n.

¹⁴Qa at jun kyxole minti' in xi tniman aju in xi qma'ne tuj u'j lu, tz'elx kynik'e ti'j, ex mi'n tz'ok kymojb'an kyib'e tuk'il, tu'ntzun ttzaj tch'ixwi.

¹⁵Ex mi'n tz'ok kyq'o'ne ik tza'n jun aj q'oj kyi'je, noq o'kx tu'n t-xi kyq'o'ne tnab'l erman lu tu'nju okslal te.

¹⁶Ate Qajaw q'olte qmojb'ab'l qib'. Kukxwit tzaj tq'o'n kymojb'ab'l kyib'e tuj tkyaqil. Tenwt Qajaw kyuk'ile kykyaqile.

¹⁷Aju q'olb'eb'l lu tu'nx nq'ab'e ma txi ntz'ib'ane, aqine Pablo; atzun techal jlu ti'j tkyaqil u'j in xi ntz'ib'ane; kyja'tzun tten chin tz'ib'ane.

¹⁸Aju t-xtalb'il Qajaw Jesucrist tenwt kyuk'ile kykyaqile. Ikxwitju.