Read kumam 1 Timoteo 1 Bible Online

1 Timoteo 1 - kumam bible

1 Timoteo 1

¹Aqine Pablo, apostol qine te Jesucrist, tu'n Dios tzaj tma'n aju Klol qe, ex tu'n Qajaw Jesucrist aju q'uql qk'u'j ti'j.

²In xi ntz'ib'ane jlu teya Timoteo, axix tok aya nk'wa'le tuj okslab'l. Awt Qman Dios tuk'ix Qajaw Jesucrist, che q'onte xtalb'il teya ex tu'n ttzaj q'aq'an kyk'u'j ti'ja ex tu'n tqe'xix tk'u'ja.

³Waje ax tu'n tkyaj tena tuj tnam Efeso, ik tza'n xi nma'ne teya tej kyja'toq nxi'ye tuj tx'otx' Macedonia. Waje tu'n t-xi tma'na kye junjun xjal tu'n mi'n t-xi kyq'o'n junxitl xnaq'tzb'il mya ax tok,

⁴ex tu'n mi'n t-xi kyb'i'n ju yol la'jb'il tuk'ix ju yol ti'j kyb'i kyxe'chel xjal ojtxi minti' b'ajsb'il te. Porke ti'j ju yol lu in tzaj kyq'oj xjal, noq in che jaw kub' tuk'il yol, ex minti' jun onb'il qe tu'nju yol lu tza'n tten tu'n tjapun aju ximamaj tu'n Dios te qe, aju nne'l qnik' ti'j tu'n qokslab'l.

⁵Ex aju tnab'l yol ma txi nma'ne teya, atzun tu'n qk'ujlante qib' qxolx tuk'il qk'ujlalil tzajni jlet tuj qanmi saq ta', ex qa in qb'incha'n aju b'a'n in tma'n qanmi, ex qa ax tok okslal qo' ex mya noq tten qu'n.

⁶At junjun xjal o che el txalpuj ex ma tz'el kypa'n kyib' kyi'j jlu, ma txi kyq'on kyib' tu'n kyyolin ti'j ju yol noqx gan.

⁷Kyajb'il tu'n kyok chik'b'al ti'j tley Dios, ex minti' nne'l kynik' ti'j ju in kyma'n ex ti'j ju in kykyuwsa'n.

⁸B'a'n qu'n, ate ley b'a'n qa ma tz'ajb'en qu'n tuj tumelxix.

⁹B'a'n jlu qu'n, ate ley tkub' mya kye qe xjal tz'aqlxix, noq o'kx tkub' ley kye qeju mib'an che niman ley ex kyk'i' tu'n kyten tjaq' ley, ex kye qeju minti' tchi Dios kye ex aj il qe, ex kye qeju minti' kyaj ti'j Dios ex minti' kyokslab'l, ex kye qeju in kub' kyb'yo'n kyman ex kytxu', ex kye qeju b'yol xjal qe,

¹⁰ex kye qe yaẍil, ex kye xinaq in pon kyk'u'j ti'j juntl xinaq, ex kye qeju elq'al xjal, ex kye qeju nik'al yol, ex kye qeju in xi kytziyan jun yol tuk'il nik'aj yol, ex qa at juntl in kyb'incha'n tu'n tmaqet aju xnaq'tzb'il b'a'n.

¹¹Aju xnaq'tzb'il b'a'n ma tzaj oqxenan weye in yolin ti'j tqanil kolb'il tb'anilxix in tzaj tq'o'n Dios, aju Dios at-xix tzalajb'il tuk'il.

¹²Kxel nq'o'ne chjonte te Qajaw Jesucrist tu'nju ma tzaj q'o'n wipumale tu'n, porke ma qe' tk'u'j wi'je ex ma chin ok q'o'ne tu'n, tu'n wajb'ene te.

¹³Ojtxi in yasune ti'j, ex in yajlane kyi'j okslal, ex o nb'inchaye mya b'a'n kyi'j; ex o tzaj q'aq'an tk'u'j Dios wi'je, porke minti' el nnik'e ti'j ju o nb'inchaye na'nxtoq wokslane.

¹⁴Ex tzaj tq'o'n Qajaw nimxix t-xtalb'il weye tuk'ix wokslab'le ex nk'ujlalile, tu'nju at qmojb'ab'l qib' tuk'il Jesucrist.

¹⁵Lu jun yol lu axix tok ex b'a'n tu'n tqe' qk'u'j ti'j ex b'a'n tu'n t-xi kyoksla'n kykyaqil xjal: ul aj Jesucrist twitz tx'otx' tu'n kyklet qe xjal aj il tu'n, ex aqine mas aj ilxix kywitz kykyaqil.

¹⁶Kyja'tzun tzaj q'aq'an tk'u'j Jesucrist wi'je, tu'ntzun ttzaj tyek'un tnejelxix wi'je qa at nim tpasens, ex tu'n woke te jun yek'b'il kye qeju che okslal ti'j tu'n tten kychwinqlal te jumajx.

¹⁷Kyja'tzun, b'a'n tu'n qq'onte nimb'il te Dios ex tu'n tjaw qnimsa'n tb'i tuj tkyaqil tab'q'iyil te jumajx. Porke ate Dios Rey tuj tkyaqil tab'q'iyil, mlay naj, ex mya q'ancha'l, o'kx ate jun Dios [ex nim tnab'l.] Ikxwitju.

¹⁸Aya nk'wa'l Timoteo kxel nkyuwsa'ne jun yol teya, tu'n tq'ojina b'a'n tuj q'oj, ik tza'nx ju yol o q'manjtz ti'ja nej kyu'n qe t-sanjel Dios.

¹⁹Ex tenx tokslab'la, ex b'inchama aju b'a'n in tma'n tanmiya. Tu'nju at junjun ma kyaj kykolin jlu ex ma naj kyokslab'l.

²⁰Ikxte Himeneo tuk'ix Alejandro ma kyaj kykolin kyokslab'l, kyja'tzun ma che'x nq'o'ne tuj tkwent Satanás, tu'ntzun tel kynik' ti'j, tu'n mi'n kyyolin mya b'a'n ti'j Dios.