Read kumam 1 Timoteo 2 Bible Online

1 Timoteo 2 - kumam bible

1 Timoteo 2

¹Tnejelxix kxel nma'ne teya tu'n kykub'san qe okslal twitz Dios kyi'j kykyaqil xjal, ex tu'n kyna'n Dios kyi'j, ex tu'n t-xi kyqanin t-xtalb'il Dios kyib'aj, ex tu'n t-xi kyq'o'n chjonte te Dios kyi'j.

²Ax ikx b'a'n tu'n kyna'n Dios kyi'j qe gobierni ex kyi'j kykyaqil qeju at kyoklen tuj kawb'il, tu'ntzun qten tuj txub'txaj ex tu'n qkub' txule', ex tu'n qniman twitz Dios ex tu'n qb'et tuj tumel.

³B'a'n te jlu ex in tzalaj Dios ti'j, aju Klol qe.

⁴Porke atzun taj Dios, tu'n kyklet kykyaqil xjal ex tu'n tel kynik' ti'j ju yol axix tok.

⁵Porke junx Dios at, ex junx yolil at in yolin tuk'il Dios ex in yolin kyuk'il xjal tu'n tb'ant kyten tuk'il Dios, atzun Jesucrist ax xjalte.

⁶Xi tq'on tib' Jesucrist tu'n tkyim tu'n kykolpet kykyaqil xjal, ex tzaj tchik'b'a'n Dios ti'j jlu tujxix tq'ijlalil.

⁷Ti'jtzun jlu ma chin ok q'o'ne pakb'al ex apostol ex xnaq'tzal kye xjal mya judiy, tu'n kyokslan ex tu'n tel kynik' ti'j ju yol axix tok. Ax tok in xi nma'ne tu'nju okslal qine ti'j Crist, minti' in chin nik'ane yol.

⁸Kyja'tzun wajb'ile tu'n kyna'n Dios qe xinaq tuj tkyaqil lugar, ok kyjaw kyi'n kyq'ab' tu'n kyna'n Dios, minti'wt jun mya b'a'n tuj kyanmi, ex minti'wt kyq'oj ex minti'wt in che yolin mya b'a'n ti'j juntl.

⁹Ikx qe xu'j, waje tu'n mi'n tjaw kyniman kyib' tuj kyxb'alun tb'anilxix, tu'ntzun mi'n tok b'aj kywitz xjal kyi'j, b'a'n tu'n tb'aj kyb'inchan kyib', ex mi'n che ik' tib'aj ok tb'aj kyxeb'an kywi', ex mi'n tz'ok kyq'o'n q'an pwaq kyi'j ex qa tal ab'j wi'yilxix perla tb'i, ex mya tu'n tok kyq'o'n kyxb'alun wi'yilxix,

¹⁰noq o'kx tu'n kyb'inchante aju b'a'n, atzunte jlu b'a'n kye qe xu'j kyajb'il tu'n kynimante Dios.

¹¹Qe xu'j ok kyten tuj xnaq'tzb'il, b'a'n tu'n kykub' txule' ex tu'n tkub' kymansin kyib'.

¹²Porke minti' in xi nq'o'ne amb'il kye xu'j tu'n kyq'onte xnaq'tzb'il kye xinaq ex qa tu'n kykawin kyib'aj xinaq, o'kx tu'n kykub' txule'.

¹³Porke ate Adán kub' b'incha'n nej, te tib'ajxi kub' b'incha'n Eva.

¹⁴Mya ate Adán o sb'unjtz, ate xu'j o sb'unjtz ex b'inchan il.

¹⁵Ex ok che kletel qe xu'j, qa b'a'n che ch'iysan kyal, qa kukx tten kyokslab'l tuk'ix kyk'ujlalil, ex qa saq tuj kyanmi, ex qa at kynab'l.