Read kumam 1 Timoteo 4 Bible Online

1 Timoteo 4 - kumam bible

1 Timoteo 4

¹Pero clarxix in tma'n Xewb'aj Xjan, tuj mankb'il tq'ijlalil at junjun xjal kyjel kykolin kyokslab'l, kxel kyb'i'n kyyol qe xjal sb'ul at ju'ẍ tuj kyanmi ex kxel kyb'i'n kyxnaq'tzb'il.

²Kxel kyb'i'n kyyol qe xjal xmletz' ex nik'al yol qe. Aqeju xjal lu tuj najen ta' kyanmi, minti'tl nne'l kynik' ti'j alkye ju b'a'n ex alkye ju mya b'a'n, mer ik tza'n ma tz'e'y tuj kyanmi tu'n k'uxb'il in k'ant, ma tz'el tnab'l kyanmi.

³Qe xjal lu kxel kymayo'n tu'n mi'n kymoje' xjal, ex kxel kyma'n tu'n mi'n t-xi kychyo'n xjal chib'j aju kyaj tq'o'n Dios tu'n t-xi kychyo'n okslal ex tu'n t-xi kyq'o'n chjonte ti'j, aqeju ma tz'el kynik' ti'j ju yol axix tok.

⁴Ex tkyaqilju kyaj tb'incha'n Dios, b'a'n, ex mi jun tu'n tel qik'un qa ma txi qq'o'n chjonte ti'j ok t-xi qchyo'n;

⁵porke ky'iwla'maj tu'n tyol Dios ex tu'n qna'j Dios.

⁶Qa ma txi tq'o'na xnaq'tzb'il lu kye erman, k'okela jun ajb'el b'a'nxix te Jesucrist, k'okel tipuna tu'nju yol oksla'n qu'n ex tu'nju xnaq'tzb'il b'a'n ma tz'ok lpe'ya ti'j.

⁷Ik'un ela aju la'jb'il mya b'a'n ex ju kyla'jb'il tij xu'j. Xnaq'tzam tib'a tu'n tnimana te Dios.

⁸Porke aju tu'n tnuqpaj qximlal, noq ch'in tajb'en, ex aju tu'n qniman te Dios, at tajb'en tuj tkyaqil, porke in tq'o'n aju b'a'n tuj qchwinqlal ja'lo, ax ikx tuj juntl anq'ib'l.

⁹Ax tok ju yol lu ex b'a'n tu'n t-xi kyniman kykyaqil xjal.

¹⁰Tu'n tlaj jlu in qo aq'nan ex nno'kxix tilil qu'n, porke q'uql qk'u'j ti'j ju Dios itz', atzun klol kye kykyaqil xjal, tnejelxix kye qeju ma che okslan.

¹¹Atzun jlu q'manxa kye ex xnaq'tzanxa kye.

¹²Mi'n taq'a amb'il tu'n tel ik'una kyu'n okslal tu'nju ku'xuna; noq o'kx tu'n toka te jun yek'b'il kyxol okslal tu'n tyola, ex tu'nju in b'eta tuj tumel, ex tu'nju at tk'ujlalila, ex tu'nju at tokslab'la, ex tu'nju saq tuj tanmiya.

¹³B'inchama jlu, sch'inxa tyol Dios kywitz okslal, q'onxa kynab'l, ex q'onxa xnaq'tzb'il kye, akutzun kyja' nxi'ye tuk'ila.

¹⁴Mi'n kub' tyajina aju toklena at, aju tzaj q'o'n teya tej tkub' kyq'o'n anciano kyq'ab' tib'aj twi'ya, ax Dios tzaj yek'unte kye tu'n tk'monteya toklena.

¹⁵Kukx b'inchama tkyaqil jlu. O'kx q'o'nk tk'u'ja ti'j tu'ntzun kyke'yinte kykyaqil xjal nim in b'ant tu'na.

¹⁶Kwentin ok tib'a, ex q'o'nka kwent ti'j ju xnaq'tzb'il in tq'o'na, tz'ok tililx tu'na ti'j jlu; qa ma tb'inchaya jlu, axa ok kletel kyuk'ix qeju in che b'in ti'j tyola.