Read kumam 2 Timoteo 1 Bible Online

2 Timoteo 1 - kumam bible

2 Timoteo 1

¹Aqine Pablo, apostol qine te Jesucrist, ma chin tzaj sama'ne tu'n tajb'il Dios, ex ma tzaj q'ma'n weye tu'n t-xi npakb'a'ne kye xjal tu'n tten kychwinqlal ik tza'nx ma tzaj ttziyan Dios qe, tu'nju at qmojb'ab'l qib' tuk'il Jesucrist.

²In xi ntz'ib'ane jlu teya, Timoteo, aya nk'wa'le at-xix nk'u'je ti'ja. Awt Qman Dios tuk'ix Qajaw Jesucrist che q'onte xtalb'il teya ex tu'n ttzaj q'aq'an kyk'u'j ti'ja ex tu'n tqe'xix tk'u'ja.

³Aya Timoteo, kukx in tzaj nna'ne tuj nna'j Diose q'ijl ex qonik'an ex in xi nq'o'ne chjonte te Dios aju in chin ajb'ene te tu'n tkyaqil wanmiye ik tza'n o kyb'incha qe nxe'chele.

⁴Kukx in tzaj nna'ne tej tetz ta'l twitza, waje tu'n tok nke'yine twitza tu'n tnoj wanmiye tu'n tzalajb'il.

⁵In tzaj nna'ne aju tokslab'la axix tok, ik tza'n o ten tokslab'l tyaya Loida ex ik tza'n o ten tokslab'l ttxu'ya Eunice, ex q'uql nk'u'je ti'j, ikx teya at tokslab'la.

⁶Kyja'tzun kxel nq'o'ne tnab'la tu'n tajb'enxix tu'na aju toklena xtk'ama tu'n Dios tej tkub' nq'o'ne nq'ab'e tib'aj twi'ya.

⁷Porke minti' ma tzaj tq'o'n Dios xob'ajil tuj qanmi, noq o'kx tu'n tten qipumal ex qk'ujlalil ex tu'n qjak'unte qib'.

⁸Kyja'tzun, mi'n ch'ixwiya tu'n t-xi tchik'b'a'na tqanil ti'j Qajaw, ex mi'n ch'ixwiya wi'je pres qine tu'n tlaj Qajaw, noq o'kx tzik'xku tu'na junx wuk'ile tu'n tlaj tqanil kolb'il, tzik'xku tu'na tu'n tipumal Dios.

⁹Ate Dios ma klon qe ex ma qo ttxok tu'n qten o'kx tu'n qajb'en te; mya tu'nju qaq'unb'en ma qo ttxok Dios, noq o'kx tu'nju kub' t-ximan ikju, ex tu'nju t-xtalb'il tzaj tq'o'n qe atxix t-xe tnejel, tu'nju at qmojb'ab'l qib' tuk'il Jesucrist.

¹⁰Ex ma tzaj tyek'un Dios t-xtalb'il qe ja'lo tu'nju tul-len Klol qe Jesucrist, porke o tz'el q'i'n tipumal kamik tu'n Jesucrist ex ma kub' tq'o'n ju chwinqlal tuj q'ancha'l ex tu'n mi'n qnaj. Tkyaqil jlu ma b'inchet noq tu'nju tqanil kolb'il.

¹¹Ma chin ok q'o'ne tu'n Dios pakb'alte tqanil kolb'il, ex ma chin oke apostol tu'n t-xi nq'o'ne xnaq'tzb'il kye xjal mya judiy.

¹²Ikxtzun tu'n tik'x tkyaqil jlu wu'ne, ex mlay chin ch'ixwiye, tu'nju b'a'n wu'ne alkye ma wokslaye, ex q'uql nk'u'je ti'j at tipumal tu'n tk'u'nte aju ma txi woqxenane te, kukx k'u'n tu'n ok tul kanun tq'ijlalil ok tul Crist juntl maj.

¹³Tzyuma ju yol minti' tpaltil, aju o tb'iya weye, ex tz'ajb'enx te jun yek'b'il teya ex tu'n tten tokslab'la ex tk'ujlalila, tu'nju at qmojb'ab'l qib' tuk'il Jesucrist.

¹⁴K'u'nxa aju yol axix tok ma tzaj oqxenan teya tu'n Dios; k'u'nxa tu'n tipumal Xewb'aj Xjan aju najl tuj qanmi.

¹⁵B'a'n tu'na kykyaqil qeju ate' tuj tx'otx' Asia ma chin kyaj koline kyu'n, ajun Figelio kyxol tuk'ix Hermógenes.

¹⁶Kuchiwt tu'n ttzaj q'aq'an tk'u'j Qajaw kyi'j qeju ate' tuj tja Onesíforo, ex nimku maj o q'uqb'anjtz nk'u'je tu'n, ex minti' o ch'ixwi wi'je tej ntene tuj pres,

¹⁷Tej tul aj tuj tnam Roma ok tililxix tu'n tu'n tjyon wi'je, ex in knete tu'n.

¹⁸Kuchiwt tu'n ttzaj q'aq'an tk'u'j Qajaw ti'j tuj tq'ijlalil tzul. Ex b'a'nxix tu'na, nimku o tz'onin qi'j tej qten tuj tnam Efeso.