Read kumam 2 Timoteo 2 Bible Online

2 Timoteo 2 - kumam bible

2 Timoteo 2

¹Aya nk'wa'l, kyuwsam tib'a tu'nju t-xtalb'il Dios in tzaj tq'o'n qe tu'nju at qmojb'ab'l qib' tuk'il Jesucrist.

²Aju tb'iya weye kywitz nimku testiw, atzunju oqxenanxa kye xjal in japunxix kyu'n ex at kynab'l tu'n kyq'onte xnaq'tzb'il kye txqantl.

³Tzik'xku tu'na tuj aq'untl; tz'okxa jun b'a'n soldad te Jesucrist.

⁴Mi jun soldad jaku b'aj t-sakun tib' tu'n t-xi tjyo'n juntl taq'un, ex atzun taj tu'n ttzalaj ju xjal ti'j, aju o q'mante te tu'n tok te soldad.

⁵Jun ku'xun nno'kx tq'on tib' tuj jun saqchb'il, mlay tk'am jun oyaj qa mya tuj tumel nno'k tilil tu'n tuj saqchb'il.

⁶Aju xjal in aq'nan tuj kojb'il ex in sikt ti'j aq'untl, atzunte nej tu'n tk'monte twitz awal.

⁷Ximanxa ti'j aju ma txi nma'ne teya; porke ate Qajaw kq'olte tnab'la tuj tkyaqil.

⁸Na'ntza Jesucrist, atzun tzaj ti'j tiyjil David ex jaw anq'in kyxol kyimni ik tza'nxju tqanil kolb'il in xi npakb'a'ne.

⁹Tu'n tlaj ju yol lu in xi npakb'a'ne, nimku nnik'x wu'ne, ex ma'lpe chin oktz q'o'ne tuj pres, ma chin ok q'o'ne ik tza'n jun b'yol xjal; pero aju tyol Dios mya presin.

¹⁰Kyja'tzun nnik'x tkyaqil jlu wu'ne tu'nju at nk'ujlalile kyi'j qeju sk'o'maj tu'n Dios, tu'ntzun ikx kye tu'n kyk'monte jun kolb'il tb'anilxix ex te jumajx, aju in tzaj tq'o'n Dios tu'nju at qmojb'ab'l qib' tuk'il Jesucrist.

¹¹Axix tok ju yol lu: Qa ma qo kyim junx tuk'il Crist, ax ikx qo anq'il junx tuk'il.

¹²Qa ma tzik'x qu'n, ax ikx qo kawil junx tuk'il. Qa ma kub' qewan qa minti' ojtzqi'n qu'n, ax ikx te kb'el tewan qa minti' ojtzqi'n qo' tu'n.

¹³Qa ma kyaj qkolin qokslab'l, atzunte Crist kukx in japun tyol; ex mlay b'aj tch'expu'n tyol.

¹⁴Na'ntza jlu kye okslal, ex q'onxa kynab'l twitz Qajaw; q'manxa kye tu'n mi'n kyjaw q'ojl ti'j ju yol noqx gan, porke noqx gan jlu, ex a jlu in xitunte kynab'l qeju in che b'in ti'j.

¹⁵Q'o'nka tilil tu'n tyek'unte tib'a twitz Dios minti' tpaltila, ik tza'n jun aq'nal minti' in ch'ixwi ti'j taq'un, tu'n t-xi tpakb'a'na ju yol axix tok tujxix tumel.

¹⁶Pa'nmil tib'a kyi'j qe xjal mya nimal Dios qe ex noqx gan kyyol, porke aqeju xjal lu mas in che'x tuj il.

¹⁷Aju kyyol xjal lu in leq'eq'en tel ik tza'n jun yab'il in q'ay kychib'jal xjal tu'n; ajun Himeneo kyxol jlu tuk'ix Fileto.

¹⁸Ma che el tzpet ti'j ju yol axix tok, in kyma'n qa o che jaw anq'in qe okslal kyxol kyimni, tu'n jlu nne'l tzpet kynab'l junjun tuj kyokslab'l.

¹⁹Ex aju simyent kub' tq'o'n Dios mlay yukch, tok ju sey lu ti'j, in tma'n: Ojtzqi'n tu'n Qajaw alkye qeju tekuxix; ax ikx in tma'n: Kykyaqil qeju in kyma'n qa okslal qe ti'j Crist, kypa'nmil kyib' ti'j mya b'a'n, chi ju tz'ib'an.

²⁰Tuj jun nintz ja at junxilchaq makb'il in che ajb'en; at makb'il q'an pwaq, ex at makb'il saq pwaq, ax ikx at makb'il tze' ex at makb'il tx'otx'; at junjun makb'il tb'anilxix, ex at junjun myaxix tb'anil, part kyajb'en.

²¹Kyja'tzun, qa at jun tpa'n tib' ti'j ju mya b'a'n lu ex minti' in tz'ilix tu'n, k'okel te jun makb'il tb'anilxix, tekuxix Qajaw ex at tajb'en te Qajaw, ex b'anin tten tu'n tajb'en tuj tkyaqil aq'untl b'a'n.

²²Tel oqa ti'j kyachb'il ku'xun, tz'ok tililx tu'na tu'n tb'inchanteya aju tz'aqlxix ex tu'n tten tokslab'la ex tu'n tten tk'ujlalila ex tu'n tten tmojb'ab'l tib'a kyuk'il txqantl, junx kyuk'il qeju in che kub'san twitz Qajaw, aqeju saq tuj kyanmi.

²³Mi'n tz'ok tmojtza'na kyyol xjal minti' kynab'l ex minti' ch'in b'a'n kyu'n; porke b'a'n tu'na, tu'n jlu in tzaj kyq'oj xjal.

²⁴Porke aju tmajen Qajaw mya b'a'n tu'n tq'ojin, noq o'kx tu'n tok mans kyuk'il kykyaqil ex tu'n tten tnab'l tu'n tq'onte xnaq'tzb'il, ex tu'n tten tpasens.

²⁵Ex mans tyol tu'n t-xi tka'win qeju in che q'ojin ti'j, mya yajku tz'ajtz ti'j kyanmi tu'n Dios tu'n tel kynik' ti'j ju yol axix tok,

²⁶tu'ntzun tjaw kyke'yin kywitz ex tu'n kytzoqpet tuj tk'ob'il tajaw il jatum tzyu'n qe tu'n kyb'inchante alkyeju tajb'il tajaw il.