Read kumam 2 Timoteo 3 Bible Online

2 Timoteo 3 - kumam bible

2 Timoteo 3

¹Ax ikx tz'elx tnik'a ti'j jlu: Tuj mankb'il tq'ijlalil tzul nim yajb'il.

²Ok che ul xjal o'kx tok kyk'u'j kyi'jx, ex o'kx tok kyk'u'j ti'j pwaq, ex in jaw kyniman kyib', ex jawni qe, ex yasul qe, ex mib'an che niman tyol kyman, ex minti' in kyq'o'n chjonte ti'j ju in kyk'mo'n, mib'an che niman te Dios,

³ex minti' kyk'ujlalil, ex minti' in chewix kyk'u'j, ex si'mil yol qe, ex minti' in kyjak'un kyib', ex minti' ch'in kylastmi kyi'j xjal, ex nne'l kyik'un aju b'a'n,

⁴ax in che ok meltz'aj kyi'j kyuk'il, tx'u'j kywi', ex in jaw kyniman kyib', mas tok kyk'u'j ti'j achb'il ex mya ti'j Dios.

⁵Mer nimal Dios che ke'yin, pero minti' kyaj ti'j tipumal tu'n kyklet. Pa'nmil tib'a kyi'j jlu.

⁶Kyxol jlu at junjun cheb'a nno'kx kylamon kyib' tuj kyja xjal, jurat in kub' kysb'u'n qe xu'j minti' kynab'l ex aj ilxix qe. Qe xu'j lu mer ik tza'n jawo'n qe tu'nju in pon kyk'u'j ti'j nimku,

⁷nim kygan tu'n kyxnaq'tzan, ex minti' nne'l kynik' ti'j ju yol axix tok.

⁸Ikxtzun kymod xjal lu ik tza'n Janes tuk'ix Jambres,[1] e q'ojin ti'j Moisés. Ikx qe jlu in che q'ojin ti'j ju yol axix tok, mya tuj tumel ta' kynab'l, ex mlay che k'met tuj okslab'l.

⁹Ex mlay che'x laq'e' mastl, ex kykyaqil xjal k'elel kynik' kyi'j qa minti' kynab'l, ik tza'n ojtxi el kynik' xjal ti'j Janes ex Jambres qa minti' kynab'l.

¹⁰Atzun teya ma tz'ok lpe'ya ti'j nxnaq'tzb'ile, ex ti'j nb'inchb'ene, ex ti'j nnab'le, ex ti'j wokslab'le, ex ti'j npasense, ex ti'j nk'ujlalile, ex nnik'x tu'na ik tza'n weye.

¹¹Ex o tena wuk'ile tuj yajb'il weye ex tuj tkyaqilju ik'x wu'ne tuj tnam Antioquía ex tuj Iconio ex tuj Listra; nim yajb'il ik'x wu'ne, ex tuj tkyaqil ma chin klete tu'n Qajaw.

¹²Ex kykyaqil qeju kyajb'il kukx tu'n kynimante Jesucrist, ok che yajlanjtzel.

¹³Atzun qe xjal mya b'a'n ex qe sb'ul, kyja' kyxi laq'e' mastl tuj mya b'a'n, in che sb'un ax ikx kye in che sb'unjtz.

¹⁴Atzun teya ax tu'n tkyaj tena tuj ju xnaq'tzb'il ma tk'ama ex ma qe' tk'u'ja ti'j, porke b'a'n tu'na alkye ma xnaq'tzan teya.

¹⁵Ex atxix tuj tne'yila el tnik'a ti'j ju Xjan Tu'jil, tu'ntzun jlu ma tzaj q'o'n tnab'la tza'n tten tu'n tkleta tu'n tokslab'la ti'j Jesucrist.

¹⁶Tkyaqil aju tz'ib'an tuj Tu'jil, a Dios o q'mante ex at tajb'en te xnaq'tzb'il qe, ex tu'n qmayonjtz tu'n mi'n qb'inchante mya b'a'n, ex tu'n tjiqumanjtz ti'j qnab'l, ex tu'n qxnaq'tzanjtz tu'n qb'et tuj tumelxix,

¹⁷tu'ntzun tten tnab'l ju xjal in ajb'en te Dios, ex b'anin tten tu'n tb'inchante tkyaqil aq'untl b'a'n.