Read kumam 2 Timoteo 4 Bible Online

2 Timoteo 4 - kumam bible

2 Timoteo 4

¹Kxel nkyuwsa'ne teya twitz Dios ex twitz Qajaw Jesucrist; porke tu'n Jesucrist che okel qe xjal tuj xjel tza'nx qeju itz' ikx qe kyimni ok tyek'unte tib' tuj tkawb'il.

²Kyja'tzun kxel nkyuwsa'ne teya tu'n t-xi tpakb'a'na tyol Dios, noq b'anin ttena, qa at amb'il ti'ja ex qa minti' amb'il ti'ja, pero il ti'j tu'n tyolina; na'ntza kyil xjal, mayonxa qe tu'n mi'n kyb'inchante mya b'a'n, q'onxa kynab'l tu'n tkyaqil tpasensa ex tuk'ix xnaq'tzb'il kye.

³Porke tzul tq'ijlalil mlay tzik'x kyu'n aju b'a'n xnaq'tzb'il, noq o'kx k'okel kyq'o'n nim xnaq'tzal kye ik tza'nx ju kyex kyajb'il, tu'nju at-xix kygan tu'n kyb'inte junxitl yol,

⁴ex mlay txi kyb'i'ntl aju yol axix tok, noq o'kx che elel txalpuj tu'n t-xi kyb'i'n ju yol la'jb'il.

⁵Atzun teya, kukx tu'n tten tnab'la, tzik'xku tu'na tuj tkyaqil, tz'aq'nana, pakb'anxa tqanil kolb'il, japunx tu'na aju tajb'eb'la.

⁶Ex ch'ix tpon or tu'n nkub'e ik tza'n jun oyaj, ex in laq'ex ttzaj tu'n wik'e tzalu twitz tx'otx'.

⁷Ma tz'ok tililxix wu'ne ik tza'n jun soldad tu'n tkub' ti'j mya b'a'n wu'ne, ma japun b'aj ju wojqelb'ile, ma tz'ok nkwentine ju okslab'l.

⁸Ja'lotzun at jun coron b'anin te weye tu'nju ma chin b'ete tuj tumelxix, aju ktzajel tq'o'n Qajaw weye tuj tq'ijlalil ok tul juntl maj, porke ate Qajaw jwes tz'aqlxix. Mya o'kx weye ktzajel tq'o'n oyaj, ax ikx kye kykyaqil qeju tok kyk'u'j ti'j ju tulel.

⁹Aya Timoteo, tz'ok tililx tu'na tu'n tul naja ke'yilte weye.

¹⁰Porke ma chin kyaj koline tu'n Demas tu'nju ma tz'ok tq'o'n tk'u'j ti'j ju te twitz tx'otx' ex ma txi' tuj tnam Tesalónica. Atzunte Crescente ma txi' tuj tx'otx' Galacia, ax ikx te Tito ma txi' tuj tx'otx' Dalmacia.

¹¹Junx te Lucas at wuk'ile. Tik'a q'ilte Marcos tu'n ttzaj tuk'ila, tu'nju at tajb'en weye tu'n tajb'en tuj aq'untl.

¹²Atzunte Tíquico ma txi nsama'ne tuj tnam Efeso.

¹³Oktzun ttzaja, q'intza nxb'alune ẍjo'w, aju kyaj nq'o'ne tuj tja Carpo tuj tnam Troas. Ex q'intza qe libro kyuk'ix qe libro tz'u'm; atzun mas il ti'j qe libro tz'u'm.

¹⁴Ate Alejandro aju tx'inol k'uxb'il, nimku mya b'a'n tb'incha wi'je. Awt Qajaw q'onte chojb'il te ti'j ju tb'inchb'en.

¹⁵Ax ikx teya kwentin ok tib'a te, ex nimxix in jaw q'ojl ti'j ju yol in xi qpakb'a'ne.

¹⁶Tej npon q'i'ne tnejel maj twitz kawil tu'n nyoline te kolb'il wib'e, mi jun o ten wuk'ile te onil weye; in kyaj koline kyu'n kykyaqil; kuchiwt minti' kyil ti'j jlu.

¹⁷Ex ate Qajaw o ten wuk'ile ex tzaj tq'o'n wipumale tu'ntzun t-xi npakb'a'ne tqanil kolb'il kye kykyaqil, tu'ntzun kyb'inte kykyaqil xjal mya judiy. Kyja'tzun in klete tuj ttzi b'alun.

¹⁸Ate Qajaw klolte weye te tkyaqil mya b'a'n, ex ok chin kletele tu'n, tu'n wokxe tuj tkawb'il tuj kya'j. Nimanxwit tb'i Qajaw tuj tkyaqil tab'q'iyil te jumajx. Ikxwitju.

¹⁹Q'onxa nq'olb'eb'le te Prisca ex te Aquila, ex kye qeju ate' tuj tja Onesíforo.

²⁰Ate Erasto ma kyaj ten tuj tnam Corinto, atzunte Trófimo o yab't ex kyaj nq'o'ne tuj tnam Mileto.

²¹Tz'ok tililx tu'na tu'n ttzaj naja na'nxtoq tul jb'alil. In xi q'olb'e'na tu'n Eubulo, tu'n Pudente, tu'n Lino, tu'n Claudia ex kyu'n kykyaqil erman.

²²Tenwt Qajaw Jesucrist tuk'ila. Tenwt t-xtalb'il Dios kyuk'ile kykyaqile. Ikxwitju.