Read kumam Tito 1 Bible Online

Tito 1 - kumam bible

Tito 1

¹Aqine Pablo, tmajen Dios qine ex apostol qine te Jesucrist, ma chin tzaj sama'ne tu'n Dios tu'n tkyuwsanjtz kyokslab'l qeju sk'o'maj qe, tu'n telxix kynik' ti'j ju yol axix tok, tu'ntzun tb'ant kyniman te Dios,

²ex tu'n tqe' kyk'u'j ti'j tu'n tten kychwinqlal te jumajx. Porke atxix ojtxi, na'nxtoq ttzaj xe't qe tab'q'iyil, tzaj ttziyan Dios tu'n tten qchwinqlal, ex mib'an te Dios nik'an yol.

³Atzun ja'lo tujxix tq'ijlalil ma tzaj tchik'b'a'n Dios tyol, aju Dios Klol qe ex atzunju ma tzaj q'mante tu'n t-xi npakb'a'ne ju yol lu.

⁴In xi ntz'ib'ane jlu teya Tito, axix tok nk'wa'le, junx qokslab'l. Awt Qman Dios tuk'ix Qajaw Jesucrist aju Klol qe che tzaj q'onte xtalb'il teya, [ex tzajwit q'aq'an kyk'u'j ti'ja] ex tu'n tqe'xix tk'u'ja.

⁵Kyja'tzun xi nma'ne teya tu'n tkyaja tuj tx'otx' Creta, tu'n tkyaj b'ant ti'j tu'na aju atx taj, ex tu'n tok tq'o'na anciano tuj junjun tnam, ik tza'n xi nma'ne teya.

⁶B'a'n tu'n tok te anciano aju minti' tpaltil, ex noq junx t-xu'jil at, ex qa okslal qe tk'wa'l ex qa minti' in che yolin xjal kyi'j tk'wa'l qa tzoqpi'n qe tu'n kyb'inchante noq alkye kyajb'il ex qa mib'an che b'in.

⁷Porke aju kwentil taq'un Dios tuj tkwent ta' tkyaqil taq'un Dios, kyja'tzun il ti'j tu'n tten minti' tpaltil, mya jawni twitz, mya jurat in jaw kyaqpaj, mya k'al q'e'n, mya q'ojlel, ex minti' in pon tk'u'j ti'j jun kamb'ab'l mya tuj tumel,

⁸noq o'kx b'a'n q'on posad, at tk'ujlalil ti'j ju b'a'n, at tnab'l, tz'aqlxix, b'a'nxix tten tchwinqlal, ex tkwent tib',

⁹tzyu'nx tu'n aju yol axix tok ik tza'n o xnaq'tzanjtz, ikx te tu'n tq'onte kynab'l mastl tu'n jun xnaq'tzb'il tz'aqlxix ex tu'n tkub' ti'j kynab'l qeju in che q'ojin ti'j.

¹⁰Tu'nju at nimku xjal mib'an che b'in, in che yolin noqx gan, ex sb'ul qe, ik tza'n qe xjal judiy mas in che yolin.

¹¹Il ti'j tu'n tmaqet kytzi' jlu, porke in xitj kynab'l enter jun ja xjal kyu'n, in kyq'o'n jun xnaq'tzb'il mya b'a'n tu'n kykamb'ante pwaq mya tuj tumel.

¹²At jun pakb'al kyxol aj Creta ax kyxjalil o tma: Qe xjal aj Creta kukx in che nik'an yol, ik tza'n jil qe, mya b'a'n qe, kye che wa'n ex ky'aj qe, chi xjal.

¹³Ax tok aju yol tma xjal lu; kyja'tzun kyuwx kawinxa qe, tu'ntzun kyten tuj kyokslab'l minti' kypaltil,

¹⁴ex tu'n mi'n t-xi kyb'i'n kyla'jb'il xjal judiy, ex tu'n mi'n t-xi kyniman kyxnaq'tzb'il xjal aqeju nne'l kypa'n kyib' ti'j ju yol axix tok.

¹⁵Kykyaqil qeju saq tuj kyanmi, saq ta' tkyaqil kyu'n; atzun kye qeju najni kyanmi ex mya okslal qe, tkyaqil nno'k kyq'o'n te tz'il, ex ma tz'ilix tuj kynab'l ex tuj kyanmi.

¹⁶In kyma'n qa ojtzqi'n Dios kyu'n, ex tu'n kyb'inchb'en nne'l qnik' kyi'j qa mya ax tok kyyol. Puro ik'b'il qe ex mib'an che niman ex minti' kyajb'en tu'n kyb'inchante jun b'a'n.