Read kumam Tito 3 Bible Online

Tito 3 - kumam bible

Tito 3

¹Na'nxa kye okslal tu'n kyten tjaq' tkawb'il gobierni ex tjaq' kykawb'il aj sanjelal, ex tu'n t-xi kyniman, noq b'anin kyten tu'n kyb'inchante tkyaqil aq'untl b'a'n.

²Q'manxa kye tu'n mi'n kyyolin mya b'a'n ti'j juntl, ex tu'n mi'n kyq'ojin, noq o'kx tu'n kyten b'a'n kyuk'il kykyaqil, ex tu'n kyyek'unte kyib' mans qe kyuk'il kykyaqil xjal.

³Porke ikx qe nej, minti' qnab'l, ex mib'an qo niman, ex tzpetni qo'; ik tza'n majen qo' in xi qniman aju in pon qk'u'j ti'j, ex o ajb'en te junxilchaq achb'il; kukx in qb'incha'n aju mya b'a'n, ex kukx in tzaj tlo'ch qk'u'j kyi'j txqantl; ik'b'il qo', ex nne'l qik'un qib' qxolx.

⁴Pero tej ttzaj q'aq'an tk'u'j Dios qi'j, aju Klol qe, ex tej ttzaj tyek'un tk'ujlalil qi'j,

⁵ma qo klet tu'n, pero mya tu'nju atwit qb'inchb'en tz'aqlxix, noq o'kx tu'nju tzaj q'aq'an tk'u'j qi'j. Ma qo klet tu'nju tx'ajb'il qe tej qitz'j tkab'maji'n, ex tu'nju ma qo ok te ak'aj tu'n Xewb'aj Xjan.

⁶Ma tzaj tq'o'n Dios Xewb'aj Xjan qe, nimxix ma tzaj tq'o'n noq tu'n Jesucrist aju Klol qe,

⁷tu'ntzun qok te tz'aqlxix tu'n Dios noq tu'nju t-xtalb'il, ex tu'n qk'monte chwinqlal te jumajx ik tza'n jun etzb'il, aju in qo ayon ti'j.

⁸Aju yol lu axix tok ex b'a'n tu'n tqe' qk'u'j ti'j, ex wajb'ile tu'n t-xi tkyuwsa'na ju yol lu, tu'ntzun tok tilil kyu'n qe okslal qe ti'j Dios tu'n kyb'inchante b'a'n. B'a'n tkyaqil jlu ex at tajb'en kye xjal.

⁹Pero pa'nmil tib'a kyi'j xjal in che q'ojin tu'n tlaj jun yol minti' tnab'l, ex in che yolin ti'j alkye qe kyxe'chel ex alkye kyiyjil xjal ojtxi, in che q'ojin tu'n tlaj tley Moisés, nim in che yolin ti'j. Noqx gan tkyaqil jlu ex minti' tajb'en.

¹⁰Qa at jun xjal ma kub' tq'o'n jun pab'l tib' kyxole, kawinxa jun maj ex qa kab' maj, qa minti' ma txi tb'i'n tyola, lajo'mexa kyxole,

¹¹porke b'a'n tu'na, jun xjal ikju ma tz'el tzpet, ex in b'inchan il, ex tkub' t-sentens tu'nx tib'.

¹²Ok t-xi nsama'ne Artemas tuk'ila ex qa Tíquico, tz'ok tililx tu'na tu'n tul naja wuk'ile tuj tnam Nicópolis, porke ma kub' nximane ax tu'n ntene tuj jb'alil.

¹³Tz'ok tililx tu'na tu'n t-xi tq'o'na ch'in onb'il kye Zenas aju pjul ley, tuk'ix Apolos, tu'n tajb'en kye ok kyxi' tuj kyb'e, ex q'onxa aju k'ajb'el kye.

¹⁴Ax ikx b'a'n tu'n tel kykano'n qerman tu'n kyaq'nan tujxix tumel, tu'ntzun tknet aju in ajb'en kye ex tu'n kyonin kye txqantl qa at jun il ti'j kye, kyja'tzun tu'n tok twitz kyaq'unb'en.

¹⁵Kykyaqil qeju ate' wuk'ile in xi q'olb'e'na kyu'n. Q'onxa nq'olb'eb'le kye qeju at kyk'ujlalil qi'j, junx qokslab'l kyuk'il. Awt Dios q'onte t-xtalb'il kyeye kykyaqile. Ikxwitju.