Read kumam Filemón 1 Bible Online

Filemón 1 - kumam bible

Filemón 1

¹Aqine Pablo, pres qine tu'n tlaj Jesucrist. Ma tzul erman Timoteo wuk'ile, kyja'tzun in xi qtz'ib'ane ju u'j lu teya Filemón, at-xix qk'u'je ti'ja ex junx in aq'nana quk'ile.

²Ax ikx in xi qtz'ib'ane te qerman Apia ex te Arquipo, aju soldad junx quk'ile, ex kye kykyaqil okslal nno'k kychmon kyib' tuj tjaya.

³Awt Qman Dios tuk'ix Qajaw Jesucrist che tzaj q'onte xtalb'il kyeye ex tu'n tqe'xix kyk'u'je.

⁴Kukx in xi nq'o'ne chjonte te Dios, aju Dios in chin ajb'ene te, in xi nq'o'ne chjonte ti'ja Filemón, ex in tzaj nna'ne tuj nna'j Diose,

⁵porke in nb'i'ne at tk'ujlalila ti'j Qajaw Jesús, ex kyi'j kykyaqil okslal, ex at tokslab'la ti'j Qajaw Jesús.

⁶Chin kub'sale twitz Dios kyi'j qeju ma che okslan tu'nju ma txi tchik'b'a'na tokslab'la kye; chin kub'sale kyi'j tu'n telxix kynik' ti'j t-xtalb'il Dios ma tzaj tq'o'n qe noq tu'n Jesucrist.

⁷Porke tu'nju tk'ujlalila erman, ma qo tzalaje nim ex ma qe'xix qk'u'je, porke ma q'uqb'anjtz kyk'u'j okslal tu'na.

⁸Kyja'tzun maske at woklene tu'n Crist tu'n t-xi nma'ne alkye tu'n tb'inchanteya,

⁹pero tu'nju at nk'ujlalile ti'ja, mas b'a'n chin kub'sale twitza, porke aqine Pablo tij xjal qine, ex presin qine ja'lo tu'n tlaj Jesucrist.

¹⁰Chin kub'sale twitza ti'j nk'wa'le Onésimo, aju ma tz'ok te nk'wa'le tuj okslab'l tuj presb'il weye.

¹¹Ojtxi minti'xix ajb'en Onésimo teya, atzun ja'lo at tajb'en teya ax ikx weye.

¹²K'ajeltzun nsama'ne tuk'ila; k'momtzuna mer ik tza'n ax qine ok chin tk'ma'ya.

¹³Ma wajb'eye tu'n tten Onésimo junx wuk'ile, tu'n tajb'en weye te t-xela tuj presb'il weye, porke pres qine tu'n tlaj tqanil kolb'il,

¹⁴pero mi'n waje tu'n nb'inchanteye qa na'nxtoq nyoline tuk'ila, ex mi'n waje tu'n ttzaj tq'o'na jun xtalb'il weye lajwers, noq o'kx waje tu'n ttzaj tq'o'na tu'n tkyaqil tk'u'ja.

¹⁵B'alo tu'n jlu el tpa'n tib' Onésimo ti'ja kab' q'ij, tu'n tajtl tuk'ila tu'n tten te jumajx.

¹⁶Ok tpontl tuk'ila, mlay tentl ik tza'n jun majen tk'ayin tib', noq o'kx tu'n tten ik tza'n jun erman k'ujla'n tu'na. Porke mas at toklen ja'lo twitz jun majen. At-xix nk'u'je ti'j, ex atzun teya mas at-xix tk'u'ja ti'j. Mya noq o'kx at tk'u'ja ti'j Onésimo tu'nju tmajena, pero ikx tu'nju okslal ti'j Qajaw.

¹⁷Qatzun tuk'ila qine tuj twitza, k'moma Onésimo ik tza'n ax qine.

¹⁸Ex qa at mya b'a'n ma tb'incha teya, ex qa at tk'as tuk'ila, q'ontza tuj nkwente.

¹⁹Aqine Pablo ma kub' ntz'ib'ane jlu tu'n nq'ab'e, aqine chin chjolte k'as; maske ikx teya nim tk'asa wuk'ile, jaku b'ant tu'n t-xi nma'ne tu'n toka te nmajene, pero mlay txi nma'ne.

²⁰Kyja'tzun erman, kuchiwt tu'n tb'inchanteya jun xtalb'il weye, tu'nju okslala ti'j Qajaw; q'uqb'ama nk'u'je tu'nju okslal qo' ti'j Crist.

²¹Kyja'tzun ma txi ntz'ib'ane jlu teya tu'nju q'uql nk'u'je ti'j qa kxel tnimana nyole, ex b'a'n wu'ne mas ok tb'incha'ya twitzju ma txi nma'ne teya.

²²Ax ikx at juntl tu'n t-xi nma'ne teya, b'inchama tten nposadiye; porke q'uql nk'u'je ti'j Dios ok chin pole juntl maj kyuk'ile noq tu'n kyna'j Diose.

²³In xi q'olb'e'na tu'n Epafras, junx ta' wuk'ile tuj pres tu'n tlaj Jesucrist.

²⁴Ax ikx in xi q'olb'e'na tu'n Marcos, ex tu'n Aristarco, ex tu'n Demas, ex tu'n Lucas, aqeju junx in che aq'nan wuk'ile.

²⁵Awt t-xtalb'il Qajaw Jesucrist ten tuj kyanmiye. Ikxwitju.