Read kumam Hebreo 10 Bible Online

Hebreo 10 - kumam bible

Hebreo 10

¹Porke ate tley Moisés noq t-xlekumal aju tb'anil attoq tulel, mya aku te ley q'olte tb'anil; kyja'tzun, aqeju in che pon k'ulul mlay che ok tz'aqlxix tu'nju aylex chojb'il kukx in kyq'o'n tkyaqil ab'q'i.

²Ex noqwit at tumel tu'n kyok xjal te tz'aqlxix tu'n ley, owtlo kyaj kykolin tu'n kyq'onte chojb'il; porke b'i'xwitlo kyaj saqix tuj kyanmi qeju in che k'ulun, ex miwtlo in tzaj kyna'ntl ju kyil.

³Pero tu'nju kukx in kyq'o'n chojb'il tkyaqil ab'q'i, kyja'tzun, kukx in tzaj kyna'n kyil tkyaqil ab'q'i.

⁴Ex mlay najset ju il tu'n kychk'el tor ex kychk'el tman chip.

⁵Kyja'tzun, tej tul Crist twitz tx'otx' xi tma'n te Dios: Minti' taja kyi'j alumaj in che'x q'o'n te chojb'il, ex mi kyi'j qe oyaj ti'j twitz awal, pero ma tb'inchaya jun nximlale.

⁶Minti' tzalaja kyi'j qe chojb'il in che kub' patit ex qe chojb'il il.

⁷Xitzun nma'ne: Lu qine lu Dios, ma chin ule b'inchalte ju tajb'ila ik tza'n ju yol tz'ib'an wi'je tuj Tu'jil, chi Crist.

⁸Tnejel in tma'n: Minti' taja kyi'j qe chojb'il ex qe oyaj ex qe chojb'il in che kub' patit ex qe chojb'il il, ex minti' tzalaja kyi'j. Aqe jlu in che q'onjtz ik tza'n in tma'n ley.

⁹Ex te tkab'in in tma'n: Lu qine lu, Dios, ma chin ule tu'n nb'inchanteye aju tajb'ila. Atzun jlu in tma'n, ma tz'el ti'n Dios ju chojb'il aju in tma'n ojtxi ley; ex aju t-xel ma tz'ok tq'o'n, ax te Crist ma tz'ok te chojb'il.

¹⁰Ex tu'nju tb'incha Crist tajb'il Dios, ma qo el tpa'n tu'n qajb'en o'kx te, tu'nju noq junx maj xi tq'on tib' Jesucrist tu'n tkyim te chojb'il il.

¹¹Ax tok tkyaqil q'ij in che ajb'en qe pal judiy, ex kukx in xi kyq'o'n axju chojb'il nimku maj, ex mlay b'ant tu'n tnajset il kyu'n qe chojb'il lu.

¹²Atzunte Jesucrist noq junx maj xi tq'on tib', ok te jun chojb'il tu'n tnajset il, ex kub'tzun qe' tuj tb'anq'ab' Dios,

¹³ex atzun in ayon ti'j ja'lo tu'n tkub' kyi'j aj q'oj ti'j.

¹⁴Porke tu'n junx chojb'il ma che ok tz'aqlxix tu'n te jumajx aqeju ma che el tpa'n Dios tu'n kyajb'en o'kx te.

¹⁵Ex ax in tchik'b'a'n Xewb'aj Xjan qe; porke nej in tma'n ju yol lu:

¹⁶Atzunju yol lu kyjel b'ant ti'j wu'ne kyuk'il tuj tq'ijlalil tzul, chi Qman: K'okex nq'o'ne nleye tuj kyanmi, ex kb'el ntz'ib'ane tuj kynab'l.

¹⁷Ax ikx in tma'n: Ex te jumajx mlay tzaj nna'ntle kyil tuk'ix ju kyb'inchb'en mya b'a'n, chi Qman.

¹⁸Kyja'tzun, qa ma kub' najset kyil, ya mya il ti'j tu'n tchjet juntl maj il.

¹⁹Kyja'tzun, erman, at qoklen tu'n qokx tuj ju Lugar Mas Xjanxix noq tu'nju tchk'el Jesucrist.

²⁰Atzun qo okex tuj ju b'e ak'aj te chwinqlal, aju o tb'incha Crist qe tu'n qokx ti'jxi ju xb'alun te maqb'il tkub' tuj tmij tja Dios; aju xb'alun te maqb'il atzun in yolin ti'j t-ximlal Crist.

²¹Ate Jesús jun qpal ma' toklen kawil qib'aj, aqo' etzan tu'n Dios.

²²Kyja'tzun qo laq'e'x ttxlaj Dios tuk'il qanmi axix tok, ex q'uqlxix qk'u'j ti'j tu'n qokslab'l, ex tx'jo'maj tuj qanmi tu'n Crist tu'n mi'n ttzaj qna'ntl qil, ex tx'jo'maj qximlal tu'n a' saq.

²³Kukx tqe' qk'u'j ti'j Dios, ex mi'n jawje' qk'u'j ti'j, porke te Dios in japunxix tyol tu'n.

²⁴Qo ximan ti'j tu'n qkyuwsante qib' qxolx tu'n qk'ujlante qib' ex tu'n qb'inchante b'a'n.

²⁵Ex mi'n txi qkolin tu'n tok qb'uyin qib', ik tza'n junjun ma che naq'et minti' in nno'k kyb'uyin kyib'; ex qq'om qnab'l qxolx, axixpe jlu tu'n qb'inchante, porke in laq'ex ttzaj tq'ijlalil tu'n tul Qajaw.

²⁶Ex qa tu'n qex qgan kukx in qo b'inchan il ex otoq tz'el qnik' ti'j ju yol axix tok, minti' juntl chojb'il tu'n tchjet il.

²⁷Noq o'kx tzul nim xob'ajil qib'aj, porke tzul jwisi ex ktzajel tq'oj Dios kyi'j kykyaqil qeju in che q'ojin ti'j Dios tu'n kynaj tuj q'aq'.

²⁸Porke ojtxi qa at jun xjal minti' in xi tniman tley Moisés, ex qa at kab' ox xjal testiw ti'j qa ax tok minti' in xi tniman xjal ley, b'i'x in kub' t-sentens xjal tu'n tkyim, minti' tumel tu'n tko'pj.

²⁹¿Yajtzun ja'lo, chi tok kyu'ne? ¿Myapelo mas kyuw tcastiw xjal tzul, aju xjal nne'l ik'un Xewb'aj Xjan tu'n, aju q'ol xtalb'il, ex qa in kub' yajan Tk'wa'l Dios tu'n, ex qa nno'k tq'o'n tchk'el Crist te minti' tajb'en? Porke aju tchk'el Crist atzunju in kyuwsante ju yol ma kyaj b'ant ti'j tu'n Dios kyuk'il xjal, ex tu'nju tchk'el Crist otoq kyaj saqix tanmi xjal.

³⁰Porke b'a'n qu'n, ate Qman o q'mante: Wu'ne k'ajel t-xel, aqine chin q'olte castiw, chi Qman. Ax ikx in tma'n tuj Tu'jil: Qe xjal etzan tu'n Qman kb'el kycastiw tu'n.

³¹Puro xob'ajilxix qa ma kub' tz'aq jun xjal tjaq' tcastiw Dios.

³²Pero kyna'ntze tkyaqilju o b'aj kyi'je k'itzqetoq spik'b'anjtz tuj kynab'le tu'n tyol Dios; nim e yajlanjtze kyu'n xjal, ex ik'x kyu'ne.

³³At junjun maj e ok yaso'ne ex e b'aj yajla'ne kywitz kykyaqil xjal, ex at junjun majtl tzajxix kyb'ise kyi'j kyuk'ile tej kylonteye in che yajlanjtz.

³⁴Tzajxix kyb'ise kyi'j kyuk'ile e okx tuj pres; ex tej ttzaj orden tu'n tel kyi'n xjal tkyaqilju at kyeye, ik'x kyu'ne ex e tzalaje, porke b'a'n kyu'ne at jun kyetzb'ile tuj kya'j mas tb'anilxix ex mlay naj.

³⁵Kyja'tzun, kukx qe'k kyk'u'je ti'j Dios, ex qa kukx in qe' kyk'u'je ti'j Dios, ma'xix jun oyaj ktzajel tq'o'n Dios kyeye.

³⁶Il ti'j tu'n tten kypasense, tu'ntzun kyb'inchanteye aju tajb'il Dios; oktzun kyk'ma'ye aju ma tzaj ttziyan Dios kyeye.

³⁷Porke in tma'n tuj Tu'jil: Aju xjal at tulel, ch'ix tul. Mlay we', tzul naj.

³⁸Ex aju xjal ma tz'ok te tz'aqlxix wu'ne, noq tu'n tokslab'l k'anq'il. Ex qa ma kyaj tkolin tokslab'l, mlay chin tzalaje ti'j, chi Dios.

³⁹Atzun qe' mya junx ato' kyuk'il qeju in kyaj kykolin kyokslab'l ex in che naj. Atzun ato' kyuk'il qeju junx qokslab'l kyuk'il tu'n tklet qanmi.