Read kumam Hebreo 11 Bible Online

Hebreo 11 - kumam bible

Hebreo 11

¹Tu'n qokslab'l in qe'xix qk'u'j ti'j tu'n qk'monte aju in qo ayon ti'j, ex tu'n qokslab'l in qe'xix qk'u'j ti'j qa axix tok aju minti' q'ancha'l.

²Qe xjal e ten ojtxi, noq tu'nju at kyokslab'l o yolin Dios kyi'j qa b'a'n qe.

³Tu'n qokslab'l nne'l qnik' ti'j, tkyaqilju at o b'ant tu'n tyol Dios; kyja'tzun tten, tkyaqilju q'ancha'l ja'lo minti' ajb'en jun ti'xti q'ancha'l tu'n tb'ant.

⁴Tu'n tokslab'l Abel xi tq'o'n jun oyaj te Dios, mas b'a'n oyaj lu twitzju oyaj xi tq'o'n Caín; ex tu'n jlu o yolin Dios ti'j qa tz'aqlxix Abel, ex b'a'n ela tuj twitz Dios aju oyaj xi tq'o'n; kyja'tzun, maske o kyim Abel pero kukx tyolinjtz ti'j tu'nju at tokslab'l.

⁵Tu'n tokslab'l Enoc aj q'i'n ex minti' kyim, ex minti' knet porke ax Dios aj q'inte; ex na'nxtoq taj q'i'n in tma'n tuj Tu'jil qa o tzalaj Dios ti'j.

⁶Pero qa minti' qokslab'l mlayx tzalaj Dios qi'j, porke qa taj xjal tu'n tpon laq'e' ttxlaj Dios, ilxix ti'j tu'n tokslan qa at Dios, ex qa a Dios in tzaj q'onte jun oyaj kye qeju in che jyon ti'j.

⁷Tu'nju at tokslab'l Noé tzaj q'ma'n te tu'n Dios ti'j ju na'nxtoq tyek'unjtz, ex tu'nju at tchi Dios tuj twitz tb'incha Noé jun matij barc jatum tu'n kyklet qeju ate' tuj tja. Ex tu'n tokslab'l Noé kub' kysentens kykyaqil xjal, ex ok q'o'n Noé te tz'aqlxix tu'n Dios noq tu'n tokslab'l.

⁸Tu'nju at tokslab'l Abraham xi tniman ju txokb'il te tu'n Dios tu'n tetz tuj ttanmi, tu'n tpon tuj jun lugar jatum tu'n tk'monte jun tetzb'il. Etztzun minti' b'a'n tu'n jatum tu'n tpon.

⁹Tu'nju at tokslab'l Abraham o ten tuj ju tx'otx' tzaj ttziyan Dios te, ik tza'n noq te tposad tuj kytx'otx' junxitl xjal, ex o ten tuj jun ja xb'alun ja tuk'ix Isaac ex tuk'ix Jacob, ax ikx kye at kyoklen ti'j ju tx'otx' tzaj ttziyan Dios.

¹⁰Porke in ayontoq Abraham ti'j ju tnam at qe t-simyentil, ax Dios ximal ti'j ex ax b'inchalte.

¹¹Ax ikx te Sara, maske otoq tijin ex minti' tal, pero noq tu'nju at tokslab'l tk'am tipumal tu'n tok ten tal, ex itz'j jun tal tu'nju xi toksla'n qa ax tok tu'n tjapun tyol Dios tzaj q'ma'n te.

¹²Kyja'tzun tten, maske otoq tijin Abraham wen, pero nim xjal e je'l poq'l ti'j ik tza'n kyajlal qe che'w twitz kya'j, ex ik tza'n ttxa tz'a'n ttzi mar mlay b'ant tajlanjtz.

¹³Kykyaqil qe jlu e kyim tuj kyokslab'l, minti' kyk'am aju tzaj ttziyan Dios kye; noq o'kx xi kyke'yin ik tza'n najchaq, xi kyoksla'n ex e tzalaj ti'j. Kyja'tzun tzaj kychik'b'a'n qa stranjer xjal qe ex b'etin xjal qe twitz tx'otx'.

¹⁴Porke aqeju in che yolin ikju in kychik'b'a'n qa in che jyon ti'j jun kytanmi.

¹⁵Noqwit kukx e ximan ti'j ju tnam jatum e je'tz, owtlo che aj meltz'aj juntl maj jatum e je'tz.

¹⁶Pero aju kyajb'il tu'n kypon tuj jun tman mas b'a'n, atzun ta' tuj kya'j; tu'ntzunju minti' in ch'ixwi Dios tu'n tok te Kydios, porke ma b'ant jun tnam te kye tu'n.

¹⁷Tej tprobarinjtz Abraham tu'n Dios, xi tq'o'n Abraham Isaac ik tza'n jun chojb'il noq tu'nju at tokslab'l. Maske otoq tk'am Abraham ju yol tzaj ttziyan Dios te, pero b'ant tten tu'n t-xi tq'o'n o'kxku jun tk'wa'l ik tza'n jun chojb'il.

¹⁸Ex otoq tzaj q'ma'n te tu'n Dios: O'kx qe tk'wa'l Isaac che okel te tiyjila, chi Dios.

¹⁹Kub' t-ximan Abraham qa at tipumal Dios tu'n kyjaw anq'in xjal tu'n kyxol kyimni; ex o tk'am tk'wa'l juntl maj, mer ik tza'n otoq jaw anq'in kyxol kyimni.

²⁰Tu'nju at tokslab'l Isaac kub' tky'iwla'n Isaac Jacob tuk'ix Esaú tu'n kyk'monte jun ky'iwb'il kyja'toq ttzaj.

²¹Ax ikx te Jacob tej ch'ixtoq tkyim, kub' tky'iwla'n kykab'il tk'wa'l José tu'nju at tokslab'l, ex o k'ulun twitz Dios mok'l tib'aj tky'aqo'ch.

²²Atzunte José, tej ch'ixtoq tkyim o yolin ti'j qa attoq kyeletz aj Israel tuj tx'otx' Egipto, ex kyaj tma'n kye tu'n kyetz q'i'n qe tb'aqil. O yolin ti'j jlu tu'nju at tokslab'l.

²³Tej titz'j Moisés xi ewan tuj ox xjaw kyu'n qe tman tu'nju at kyokslab'l, porke o kyil mejortoq ke'yin ju tal ne' Moisés. Ex minti' e xob' maske otoq txi tq'o'n rey orden tu'n kykub' b'yo'n qe tal q'a.

²⁴Tej tch'iy Moisés minti'tl o tajb'e tu'n tok tb'i tal tme'jel rey tuj Egipto, tu'nju at tokslab'l Moisés.

²⁵Mas o tajb'exix Moisés tu'n tyajlanjtz kyuk'il qe xjal etzan tu'n Dios, ex mya tu'n ttzalaj ti'j ju achb'il in tq'o'n il aju noq te kab' q'ij.

²⁶Kub' t-ximan Moisés tu'n tyajlanjtz tu'n tlaj tb'i Crist ex mas q'inumab'lxix jlu twitzju kyq'inumab'l aj Egipto; ex atzun tok tk'u'j ti'j ju oyaj ktzajel tq'o'n Dios te.

²⁷Tu'nju at tokslab'l Moisés etz tuj tx'otx' Egipto, minti' o xob' twitz ju tq'oj rey, porke tkyuwsa tib', mer ik tza'n in ke'yin ti'j ju Dios minti' q'ancha'l.

²⁸Tu'nju at tokslab'l Moisés kub' tik'sa'n ju Xjan Q'ij, ex xi tma'n kye aj Israel tu'n tok chitet chik' ttzi kyja, tu'ntzun mi'n kynaj qe nej k'wa'lb'aj tu'nju anjel b'yol xjal.

²⁹Tu'nju at kyokslab'l aj Israel, e ik'tz tuj Mar Kyaq Ke'yin ik tza'n in che b'et twitz tx'otx' tzqij; ax ikx kye aj Egipto o kyajb'e tu'n kyik'tz, pero e b'aj naj tuj a'.

³⁰Tu'nju at kyokslab'l aj Israel, e kub' tz'aq qe ma tij muro ti'j tnam Jericó tb'ajlenxi kyb'etin wuq q'ij ti'jele.

³¹Ate xu'j Rahab, aju jawni twitz kyuk'il xinaq, minti' o naj kyuk'il qe xjal mib'an che b'in, tu'nju at tokslab'l xu'j, porke b'a'n e k'monjtz qe ke'yil tx'otx' tu'n.

³²¿Ex alkye txqantl kxel nma'ntle? Ex mlaylo kanun q'ij tu'n t-xi ntx'olb'a'ne ti'j Jedeón, ti'j Barac, ti'j Sansón, ti'j Jefté, ti'j David, ti'j Samuel ex kyi'j qe t-sanjel Dios.

³³Tu'nju at kyokslab'l kub' kyi'j txqantl nasyon kyu'n, ex e kawin tuj tumelxix, ex o kyk'am aju tzaj ttziyan Dios kye. O maqset kytzi' b'alun kyu'n,

³⁴ex ju q'aq' in julin wen o yupj kyu'n, ex e kolpaj tu'n mi'n kykyim tu'n spad. Maske minti' kyipun pero o kyk'am kyipumal, e ok nim kyipumal tuj q'oj, e je'l oq qe soldad stranjer xjal kyu'n.

³⁵Qe xu'j kyk'am juntl maj kykyimni tej kyjaw anq'in. Atzun qe txqantl xjal e b'aj k'ixb'isa'n tu'n kykyim, minti' kub' tuj kywitz tu'n kytzoqpet, tu'ntzun kykamb'ante jun anq'ib'l mas b'a'nxix.

³⁶Ex txqantl e ok yaso'n ex e b'aj asyalin, ax ikx e ok k'alo'n tu'n caden ex e okx q'o'n tuj pres.

³⁷At junjun e ok xo'n tu'n ab'j, ex at junjun e kub' tu'n sier, ex at junjun e ok tuj joyb'il kyi'j, ex at junjun e kyim tu'n spad; ex at junjun noq in che b'etje' tok kyxb'alun ttz'umal ẍne'l ex ttz'umal chip, meb'a xjal qe, e k'ixb'isanjtz ex e yajlanjtz.

³⁸B'a'n qe jlu, pero minti' tumel tu'n kyten kyxol qe mastl xjal mya b'a'n, kyja'tzun noq in che b'etje' kyuj lugar minti' kynajb'il xjal tuj ex kywi witz ex t-xe pik, ex t-xe jul.

³⁹Kykyaqil qe jlu tma Dios kyi'j qa b'a'n qe tu'nju at kyokslab'l, ex minti' o kyk'am aju tzaj ttziyan Dios kye.

⁴⁰Tu'nju at juntl mas b'a'n b'anin tu'n Dios te qe, tu'ntzun kyok tz'aqlxix junx quk'il.