Read kumam Hebreo 12 Bible Online

Hebreo 12 - kumam bible

Hebreo 12

¹Kyja'tzun, qq'onkj tkyaqil iqtz tuk'ix ju il tok qi'jele, qo qelan tuk'il qpasens tuj ju ojqelb'il tkub' qwitz, porke nim kyajlal testiw ate' qi'jele.

²Qq'o'nk qwitz ti'j Jesús aju nejenel qwitz tuj qokslab'l, ex kyaj tz'aqet-xix qokslab'l tu'n, ik'x tu'n twitz crus tu'n tkamb'ante jun tzalajb'il otoq tzaj yek'un te, minti' ok tq'o'n tkwent ti'j tch'ixwi, ex ja'lo ma kub' qe' ttxlaj tq'uqb'il Dios tuj b'anq'ab'aj, jatum in kawin Dios.

³Che ximane ti'j Jesús aju ik'x kyq'oj aj il tu'n. Kyja'tzun mi'n che sikte ex mi'n b'aj kyk'u'je.

⁴Porke na'nx kywe'xixe tu'n kyq'ojine tuk'il il ex na'nx tik'x kyu'ne ik tza'n te Crist ik'x tu'n ex kyim.

⁵Ex aju yol ma tzaj q'ma'n kyeye tu'n tok kynab'le, o tzik' tna'l kyu'ne, pero tu'nju k'wa'lb'aj qeye in tzaj q'ma'n ju yol lu, in tma'n tuj Tu'jil: Nk'wa'l, mi'n tz'el tik'una qa ma kub' kawina tu'n Qman, ex mi'n tzaj b'aj tk'u'ja qa ma tz'ok ilina tu'n.

⁶Ex ate Qman in che kub' tkawin qeju k'ujla'n qe tu'n, ex in che b'aj tasyalin kykyaqil qeju in che tk'mo'n tu'n kyok te tk'wa'l, chi tuj Tu'jil.

⁷Tzik'xku kyu'ne ok kykub' kawine tu'n Dios, tu'nju k'wa'lb'aj qeye. Ex ¿atpe jun k'wa'lb'aj minti' in kub' kawin tu'n tman?

⁸Kykyaqil qe k'wa'lb'aj in che kub' kawin; atzun kyeye qa minti' in che kub' kawine tu'n Dios, myatzun tk'wa'l Dios qeye, sik'aj k'wa'l qeye.

⁹Ex at juntl tumel, at qe qman tzalu twitz tx'otx', o qo kub' kawin kyu'n ex at kychiyilal tuj qwitz. ¿Yajtzunte Qman Dios tuj kya'j myapelo mas tuj tumel tu'n t-xi qniman, tu'ntzun qanq'in?

¹⁰Ax tok o qo kawinjtz kyu'n qman mya nim q'ij ik tza'nx ju kyajb'il; atzunte Dios in qo kub' tkawin tu'n tajb'en qe, tu'ntzun qok xjan ik tza'n te Dios xjan.

¹¹Ax tok, aju kawb'il qe ja'lo minti' in qo tzalaj tu'n, noq o'kx in qo b'isun; ex te tib'ajxi in qo kyaj ten tuj txub'txaj ex in qo b'et tuj tumelxix tu'nju kawb'il qe.

¹²Kyja'tzun, kynuqpinxe kyq'ab'e aju nne'l jilj, ex kykyuwsame kyqane minti' tipun.

¹³Che b'ete tuj jun b'e jiqun ti'j tu'ntzun mi'n tetz jolpaj kyqane kox, noq o'kx tu'n tb'anix kyqane.

¹⁴Tz'ok tililx kyu'ne tu'n tten kymojb'ab'l kyib'e kyuk'il kykyaqil xjal; tz'ok tililx kyu'ne tu'n tel kypa'n kyib'e ti'j tkyaqil mya b'a'n; ex qa minti' ma tz'el kypa'n kyib'e ti'j, mlayx kyile twitz Qajaw.

¹⁵Ten kykwente kyi'je, mya yajku at jun kyxole mi'n kanun tuj t-xtalb'il Dios; ten kykwente kyi'je tu'n mi jun kyeye tz'ok ik tza'n tlok' tze' puro k'a, mya yajku tz'ok te jun xitb'il kye txqantl.

¹⁶Ten kykwente kyi'je tu'n mi'n tok jun kyeye aj pajil ex tu'n mi'n tok ten tnab'l ti'j ju te twitz tx'otx'; ik tza'n te Esaú, noq tu'n ch'in twa xi tk'a'yin toklen, aju toklen te nej k'wa'lb'aj.

¹⁷Porke b'a'n kyu'ne, te tib'ajxi o tajb'etl Esaú tu'n tk'monte ky'iwb'il, aju ky'iwb'il in tzaj q'o'n te nej k'wa'lb'aj, pero minti' tzaj q'o'n te, ex minti' tumel tu'n tch'expet aju otoq b'ant tu'n, maske o qanin ti'j ex jaw oq'.

¹⁸Ex mya'tzun ma che pone t-xe witz Sinaí, ik tza'n qe aj Israel, b'a'n tmakonjtz ju witz ex in k'ant q'aq' ti'j, ex at tuj qlolj ex tzaj nim kyq'iq',

¹⁹ex o kyb'i xjal in q'ajt chun, ex o kyb'i xjal in yolin Dios. Ex tej kyb'inte xjal in yolin Dios, e kub'san tu'n mi'n tyolin mastl kye,

²⁰porke minti' kyipa tej tyolin Dios kyuk'il. Chi Dios tzaj tma'n: Qa at jun xjal ex qa jun jil ma pon t-xe witz, il ti'j tu'n tok xo't tu'n ab'j ex qa tu'n tok xayut tu'n lans.

²¹Ex xob'ajilxix aju ok kyke'yin; kyja'tzun tma Moisés: In chin xob'e ex in chin lu'lune.

²²Atzun kyeye ja'lo ma che ule t-xe witz Sión, ma che ule tuj ju tnam Jerusalén tb'i, at tuj kya'j, jatum ta' aju Dios itz', ex ma che ule junx kyuk'il anjel nim kyajlal in che tzalaj wen,

²³ex ma che ule kyuk'il qe nej k'wa'lb'aj kychmon kyib', aqeju tz'ib'an kyb'i tuj kya'j, ex ma che ule twitz Dios aju in che ok kykyaqil xjal tuj xjel tu'n, jatum ta' kyanmi qe xjal b'a'n ma che ok q'o'n te tz'aqlxix tu'n Dios.

²⁴Ex ma che ule twitz Jesús aju tzaj tx'olb'ante ju ak'aj yol ma kyaj b'ant ti'j tu'n Dios kyuk'ile, ex ma che kanune ti'j tchk'el el chitj, mas b'a'n twitz ju tchk'el alumaj xi tq'o'n Abel.

²⁵Ten kykwente kyi'je tu'n mi'n tel kyik'une Dios aju in yolin quk'il. Porke qa minti' e klet qe xjal el kyik'un tyol Dios tej tyolin kyuk'il twitz tx'otx', pyor qe mlay qo klet qa ma tz'el qik'un Dios aju in tzaj yolin qe ja'lo max tuj kya'j.

²⁶Aju tq'ajq'ajel twi' Dios o yukch tx'otx' tu'n ojtxi; atzun ja'lo ma tzaj ttziyan juntl yol in tma'n: Kyyukchtel juntl maj tx'otx' wu'ne, ex mya noq o'kx tx'otx', ax ikx kya'j kyyukchtel, chi Dios.

²⁷Aju yol lu: Juntl maj, atzun in tma'n tu'n tel q'i'n tkyaqilju b'a'n tyukch, aqeju b'incha'n qe, tu'ntzun kykyaj ten qeju minti' in che yukch.

²⁸Kyja'tzun qq'onx chjonte te Dios tu'nju ma qk'am jun kawb'il mlay yukch, qq'onx chjonte ex qo ajb'en te Dios tu'n ttzalaj qi'j ex tu'n tten tchi tuj qwitz ex tu'n qniman te.

²⁹Porke ate Qdios ik tten ik tza'n jun q'aq' in b'aj tz'e'y tkyaqil tu'n.