Read kumam Hebreo 13 Bible Online

Hebreo 13 - kumam bible

Hebreo 13

¹Kukx tu'n tten kyk'ujlalile kyxolxe porke kyerman kyib'e.

²Mi'n tzik' tna'l kyu'ne tu'n kyq'onteye kyposad xjal tuk'ix ju at tajb'en kye, porke at junjun kyb'incha jlu, xi kyq'o'n kyposad anjel ex minti' b'a'n kyu'n qa anjel qe.

³Kyna'ntze qeju ate' tuj pres, ik tza'n ax qeye ate'ye tuj pres junx kyuk'il; ex kyna'ntze qeju in che yajlanjtz, ik tza'n ax qeye in che yajlanjtze.

⁴Nimanxwit ju mejeb'le'n kyu'n kykyaqil, ex mi'nwt tknet jun kyyaẍ, porke jun tz'il jlu; porke aqeju yaẍil ex qe aj pajil kb'el kycastiw tu'n Dios.

⁵Mi'n pon kyk'u'je ti'j pwaq; che tzalaje ti'j ch'in at kyeye ja'lo; porke in tma'n Dios: Mlay kyaj nkoline, ex mlay kyaj nq'o'ne.

⁶Kyja'tzun in qe'xix qk'u'j tu'n t-xi qma'n: Ate Qman onil weye; mlay chin xob'e. Minti' jun mya b'a'n jaku kyb'incha xjal wi'je.

⁷Kyna'ntze qe nejenel e ten kyxole, aqeju e q'mante tyol Dios kyeye; che ximane ti'j kyaq'unb'en ex tza'n tten japun b'aj kychwinqlal, ex tenx kyokslab'le ik tza'n kye.

⁸Axte Jesucrist ew, ex ja'lo, ex te jumajx.

⁹Mi'n txi kyq'on kyib'e tu'n kyxi q'i'ne tuj junxilchaq xnaq'tzb'il mya b'a'n; porke b'a'n tu'n tkyuwset qanmi tu'nju t-xtalb'il Dios; mya tu'nju ley b'anin ti'j alkyechaq chib'j b'a'n t-xi' qu'n ex alkye mya b'a'n; porke minti' jun b'a'n o kykamb'a qeju o qe' kyk'u'j ti'j ju ley lu.

¹⁰At jun qe q-altar, aju minti' kyoklen pal ti'j tu'n t-xi kychyo'n aju chojb'il in kub' patit tib'aj, aqeju pal in che ajb'en tuj ja xb'alun te nab'l Dios ojtxi.

¹¹Porke aju kychk'el alumaj nno'kx q'o'n tuj Lugar Mas Xjanxix tu'n tnejel pal te chojb'il il, atzun kyximlal in kub' patit ti'jxi campament.

¹²Kyja'tzun, ax ikx te Jesús kyim ti'jxi tnam tu'n kyel pa'n qe xjal tu'n tu'nku tchk'el, tu'n kyajb'en o'kx te Dios.

¹³Qo extzun tuk'il Jesús ti'jxi campament, tzik'xku qu'n aju yasb'il qe tu'n tlaj, ik tza'n te ik'x tu'n.

¹⁴Porke minti' jun qtanmi tzalu te jumajx, noq o'kx in qo ayon ti'j ju qtanmi ktzajel yek'un.

¹⁵Kyja'tzun, kukx tu'n tjaw qnimsa'n tb'i Dios noq tu'n Jesucrist, ik tza'n jun oyaj tu'n t-xi qq'o'n te; atzunju yol in tma'n qtzi' tu'nju in jaw qnimsa'n tb'i.

¹⁶Ex mi'n tzik' tna'l kyu'ne tu'n kyb'inchanteye aju b'a'n ex tu'n kyonine kyib'e kyxolxe; porke ate jlu jun oyaj in xi kyq'o'ne te Dios in tzalaj ti'j.

¹⁷Kynimanxe qe nejenel kyeye, ex kyb'inxe kykawb'il; ex atzun qe kwentil kyeye tu'n mi'n kyel tzpete, b'a'n kyu'n atzun qe che q'ol tajlal twitz Dios. Kynimanxe tu'ntzun kykwentin tuj tzalajb'il ex mya tu'n kyb'isun; ex qa ma che b'isun tu'nju minti' in xi kynimane, mlay kykamb'aye ch'in b'a'n ikju.

¹⁸Che na'ne Dios qi'je, porke q'uql qk'u'je ti'j in qb'incha'ne b'a'n ik tza'nx in tma'n qanmiye, qajb'ile tu'n qb'inchanteye aju b'a'n tuj tkyaqil.

¹⁹Ex chin kub'salxixe kywitze tu'n kyna'ne Dios wi'je, tu'ntzun npon naje juntl maj kyuk'ile.

²⁰Ate Dios q'olte qmojb'ab'l qib', ex tu'n Dios jatz anq'in Qajaw Jesús kyxol kyimni, ate Jesús Pastor kyi'j ẍne'l ex ma' toklen, aju tchk'el ok te kyuwsab'l teju yol ma kyaj b'ant ti'j tu'n Dios te jumajx.

²¹Awt Dios q'onte kynab'le tuj tkyaqil aq'untl b'a'n, tu'ntzun kyb'inchanteye aju tajb'il, ex ax kq'olte qipumal tu'n qb'inchante aju b'a'n tuj twitz, noq tu'n Jesucrist. Nimanxwit ju tb'i tuj tkyaqil tab'q'iyil te jumajx. Ikxwitju.

²²Chin kub'sale kywitze erman tu'n tten kypasense tu'n t-xi kyb'i'ne ju yol lu te q'ob'l kynab'le; porke mya nim yol ma txi ntz'ib'ane kyeye.

²³B'a'n tu'n kyb'inteye, ma tzoqpet qerman Timoteo; qa ma tzul naj, junx qo xe'le tuk'il tu'n qpone ke'yil kyeye.

²⁴Kyq'onxe jun q'olb'eb'l kye kykyaqil nejenel ate' kyxole ex kye kykyaqil okslal. Qe okslal tuj Italia in che'x q'olb'e'ne kyu'n.

²⁵Tenwt t-xtalb'il Dios kyuk'ile kykyaqile. Ikxwitju.