Read kumam Hebreo 4 Bible Online

Hebreo 4 - kumam bible

Hebreo 4

¹Kyja'tzun atxku ju yol tzaj tma'n tu'n qkanun tuj ju ojlab'l in tq'o'n Dios, qkwentin ok qib', mya yajku at jun qe mi'n kanun tuj ojlab'l.

²Porke ikx qe ma tzaj q'ma'n tqanil kolb'il qe, ik tza'n tzaj q'ma'n kye; pero aju yol kyb'i aj Israel minti' ajb'en kye porke minti' xi kyoksla'n tej kyb'inte.

³Pero aqeqo' ma qoksla ex ma qo kanun tuj ojlab'l ik tza'nx o tma Dios: Kyja'tzun tzaj nq'oje kyi'j, ex xi nma'ne jun nyole axix tok kye, tu'n mi'n kyokx tuj tx'otx' jatum tu'n kyojlan wu'ne, chi Dios. Tma Dios jlu maske otoq b'ant taq'un atxix tej tb'ant twitz tx'otx'.

⁴Porke tuj Tu'jil at jatum in tma'n ti'j twuqin q'ij kyja': Ex ojlan Dios tuj twuqin q'ij tej tb'aj b'ant tkyaqil taq'un.

⁵Ex ma kyb'iye jatum in tma'n: Mlay che okx tuj tx'otx' jatum tu'n kyojlan wu'ne, chi tuj Tu'jil.

⁶Atx te yol tu'n kykanun junjun tuj ojlab'l in tq'o'n Dios, pero aqeju o q'manjtz tqanil kolb'il kye ojtxi, minti' e kanun tuj ojlab'l tu'n tlaj minti' xi kyniman tyol Dios.

⁷Kyja'tzun tten in tzaj tq'o'n Dios juntl q'ij: Tuj q'ij ja'lo, chi tuj Tu'jil. Aju yol lu in tzaj tma'n Dios qe, otoq txi tma'n ojtxi, ex tb'ajlenxi nimku ab'q'i o tma juntl maj noq tu'n ju tyol David, ik tza'n ma kyb'iye in tma'n tuj Tu'jil: Qa ma kyb'iye aju in tma'n Dios ja'lo, mi'n kub' kykyuwsa'ne kyanmiye.

⁸Porke noqwit xi tq'o'n Josué ojlab'l kye aj Israel, miwtlo o yolin Dios ti'j juntl q'ij.

⁹Kyja'tzun, atx jun ojlab'l kye qe xjal etzan tu'n Dios, ik tza'n te Dios tej tojlan tuj twuqin q'ij.

¹⁰Porke aju ma kanun tuj ojlab'l in tq'o'n Dios, ax ikx ma tz'ojlan tu'n mi'n taq'nantl, ik tza'n te Dios o tz'ojlan tej tb'ant taq'un.

¹¹Qq'o'nktzun tilil tu'n qkanun tuj ju ojlab'l lu, tu'ntzun mi'n qkub' tz'aq ik tza'n kye, ex tu'n mi'n qok ik tza'n kye minti' xi kyniman ju yol.

¹²Porke aju tyol Dios itz'te ex at tipumal, ex mas at ttzi' twitz jun spad kab' pak' ttzi'; ex in pon xuyl max tujxi qanmi, ex ti'j qxew, ex ti'j tyaqamil qximlal, ex max tujxi qb'aqil, ex nne'l tnik' ti'j qximb'etz ex aju qaj tu'n qb'inchante.

¹³Ex minti' jun tch'isb'en Dios miwt q'ancha'l twitz, ex minti' jun maqsi'n; tkyaqil q'ancha'l twitz Dios jatum tu'n qpon q'ol tajlal.

¹⁴At jun tnejel pal qe ma' toklen, ma tz'okx max tuj kya'j, ate Jesús aju Tk'wa'l Dios, kyja'tzun tten, qtzyumxix aju yol ma qoksla.

¹⁵Tu'nju at jun tnejel pal qe b'a'n q'aq'an tk'u'j qi'j tu'n tlaj minti' qipun, porke tuj tkyaqil ok jlu tuj joyb'il ti'j ik tza'n qe, pero minti' b'inchan il.

¹⁶Qo laq'extzun ttxlaj Dios ex qe'k qk'u'j ti'j tu'n qpon twitz tq'uqb'il jatum ta' t-xtalb'il, tu'ntzun ttzaj q'aq'an tk'u'j qi'j ex tu'n qk'monte jun xtalb'il tuj tq'ijlalil ok tul tajb'enxix qe.