Read kumam Hebreo 5 Bible Online

Hebreo 5 - kumam bible

Hebreo 5

¹Porke tkyaqil tnejel pal in jaw sk'et kyxol xjal, ex nno'k q'o'n tu'n tyolin kyi'j xjal twitz Dios, atzun taq'un tu'n t-xi tq'o'n oyaj ex chojb'il tu'n tchjet kyil xjal.

²At tpasens kyi'j qe xjal minti' ch'in b'a'n kyu'n ex o che el txalpuj, porke ikx te minti'xix tipun;

³ex tu'n tlaj minti'xix tipun, ilxix ti'j tu'n t-xi tq'o'n chojb'il tu'n tchjet til, ax ikx tu'n tchjet kyil xjal.

⁴Ex mya tu'nx te xjal nno'k tq'o'n toklen tu'n tok te tnejel pal; noq o'kx tu'n Dios in txkonjtz ex nno'k q'o'n toklen, ik tza'n te Aarón.

⁵Ax ikx te Crist, minti' jaw tniman tib' tu'n tok te tnejel pal, noq o'kx xi q'o'n toklen tu'n Dios tej t-xi q'ma'n te: Aya Nky'ajale, ma chin oke te tmana ja'lo.

⁶Ax ikx in tma'ntl tuj Tu'jil: Aya k'okel te pal te jumajx. Ax toklena k'okel ik tza'n te Melquisedec, chi tuj Tu'jil.

⁷Tuj tq'ijlalil tej tten Crist twitz tx'otx' o na'n Dios ex o kub'sanxix wen, ex jaw tq'ajq'ajel twi' kyuw, ex jaw oq' twitz Dios, tu'nju at tipumal Dios tu'n tklet Crist tuj kamik tu'n; ex tzaj tb'i'n Dios tqanb'etz tu'nju niman Dios tu'n.

⁸Maske Tk'wa'l Dioste, pero b'ant tu'n tu'n t-xi tniman tyol Dios tu'nju nimku ik'x tu'n.

⁹Ex tej ttz'aqet-xix tuj tkyaqil, kyja'tzun ok te kolol te jumajx kye kykyaqil qeju in che niman te.

¹⁰Porke ax Dios o q'mante tu'n tok te tnejel pal, ax toklen ik tza'n te Melquisedec.

¹¹At nimku tu'n nyoline ti'j jlu, ex mlay pujet naj porke minti' nno'kx naj tuj kywi'ye.

¹²Porke mawtlo che oke te xnaq'tzal ja'lo, porke ma b'et-xi q'ij t-xilen kyoksla'ne, pero jlu noq o'kx kyajb'ile tu'n kyxnaq'tzanjtze juntl maj ti'j ju tnejel xnaq'tzb'il ti'j tyol Dios; ex ma che oke ik tza'n tal ne' kukx tu'n t-xi' kych'u'ye ex mlay txi' wab'j kyu'ne.

¹³Porke alkye kukx tch'u'n, mlay tz'el tnik' ti'j ju yol tz'aqlxix, tu'nju ne'x ta'.

¹⁴Atzunju wab'j in ajb'en kye qeju ma che ch'iy, ex ma tz'ok kynab'l tu'nju nimxi tzik' kywitz ti'j, kyja'tzun nne'l kynik' ti'j alkyeju b'a'n ex alkyeju mya b'a'n.